भांगरभूंय | प्रतिनिधी
विरोधकांच्या आरोपा वेळार पक्ष वांगडा रावानाशिल्ल्याचो दावो
भांगरभूंय । प्रतिनिधी
पणजीः विरोधक आरोप करतना पक्ष मात आपले वटेन उबो रावना. पक्षाचे काय पदाधिकारी अश्या वेळार आपल्याक सांगात दिनात, अशी खंत मंत्री बाबूश मोन्सेरात आनी गोविंद गावडे हांणी बिरेस्तारा जाल्ले भाजप कोअर समितीचे बसकेंत उक्तायली, अशी म्हायती बसकेक हाजीर आशिल्ल्या गोपांनी ‘भांगरभूंय’ कडेन उलयतना दिली.
फाटल्या कांय वर्सां गोंयांत घडिल्ल्या विवीध प्रकरणमां वयल्यान विरोधी आमदारांनी कांय मंत्र्यांक परतून परतून लक्ष्य केले. गोवा फॉरवर्डाचे आमदार विजय सरदेसाय हांणी मंत्री गोविंद गावडे हांकां कला अकादमीच्या नुतनीकरण कामा वयल्यान, जाल्यार मंत्री बाबूश मोन्सेरात हांकां दक्षीण गोंय जिल्होधिकारी कार्यालयांतले नोकर भरती वयल्यान कातरेंत धरला. तशेंच काँग्रेस, आपच्या आमदारांनी लेगीत ह्या दोनूय मंत्र्यांचेर सेगीत आरोप करप चालूच दवरलां. ह्या काळांत मुख्यमंत्री ह्या नात्यान डॉ. प्रमोद सावंत हांणी आपली बाजू लावन धरली, पूण भाजपाच्या चिन्नाचेर विधानसभा वेंचणुकेंत वेंचून येवन लेगीत पक्षाचे कांय पदाधिकारी, कार्यकर्ते मात आपल्या वांगडा रावनात, अशी खंत ह्या दोनूय मंत्र्यांनी बसकेंत उक्तायली.
एके वटेन आमच्या आमच्या मतदारसंघांत पक्षाचें काम वाडोवपाचें निर्देश आमकां दितात. ते प्रमाण आमी पक्षाचो दरेक उपक्रम मतदारसंघांत चालीक लायतात. पक्षाचें काम प्रामाणीकपणान करतात. तरी लेगीत पक्षा कडल्यान आमकां अशी वागणूक कित्याक मेळटा, असो प्रस्न उपस्थीत करून संकश्टाच्या काळांत मंत्र्यांच्या फाटल्यान पक्षानूय उबो रावपाक जाय, अशी भुमिकाय तांणी स्पश्ट केलें. ताचेर प्रदेशाध्यक्ष सदानंद शेट तानावडे आनी मुख्यमंत्री डॉ. प्रमोद सावंत हांणी दोनूय मंत्र्यांची समजूत काडिल्ल्याचें आनी फुडारांत सगळ्याच मंत्र्यां वांगडा रावपाचे निर्देश तांणी पदाधिकारी, कार्यकर्त्यांक दिले, अशें गोपांनी सांगलें.
खंवटे – सिक्वेरा मदीं किजील
पर्वरी मतदारसंघांतल्यो कांदळीं व्हड प्रमाणांत मारतात. कांय प्रकल्पांक पर्यावरण खात्या कडल्यान परवाने दितात. ताका लागून पर्वरेच्यो कांदळी मारपाचें प्रमाण वाडलां, असो दावो मंत्री तशेंच पर्वरीचे आमदार रोहन खंवटे हांणी केलो. ताचे वयल्यान खंवटे आनी पर्यावरण मंत्री आलेक्स सिक्वेरा हांचे मदीं किजील जालें, अशें गोपांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
