भांगरभूंय | प्रतिनिधी
‘उटा’न घेतली गावडे हांची बाजू
मडगाव : मंत्री गोविंद गावडे हांणी सरकार वा हेर कोणाचेरूच वैयक्तीक टिका करूंक ना. तांच्या वक्तव्याचो विपर्यास केला. आदिवासी कल्याण अधिकारी, कर्मचारी योग्य तरेन काम करिनाशिल्ल्यान ते तिडक भायर काडटात. समाजा खातीर काम केल्ल्या गावडे हाचेर कारवायेची मागणी चुकीची आशिल्ल्यान सत तपासून निर्णय जावचो, अशी मागणी ‘उटा’ संघटणेचे अध्यक्ष प्रकाश वेळीप हांणी केली.
मडगांवां आयज पत्रकार परीशद घेत ‘उटा’ संघटणेन मंत्री गावडे हांची बाजू घेतली. अध्यक्ष तशेंच आदले मंत्री प्रकाश वेळीप हांणी सांगलें, उटाचे कार्यावळींत मंत्री गावडे हांणी आदिवासी समाजाच्या भावांचीं कामां जायनाशिल्ल्यान आपल्यो भावना उक्तायतना मुख्यमंत्री प्रमोद सावंत, राज्य सरकार वा हेर कोणाचेरूच वैयक्तीक टिका करूंक ना. आदिवासी कल्याण खात्याचे कांय अधिकारी कामां करिनात अशें तांणी सांगलें. गावडे हांणी समाजा खातीर बंदखण भोगली, मारूय खाल्लो. हाका लागून समाजाच्या लोकांच्या बर्या खातीर उलयतना तांणी विचार मांडले. खात्याचे मुखेली म्हणून मुख्यमंत्री प्रमोद सावंत हांणी सेगीत निर्देश दिवून लेगीत अधिकारी आदिवासी भवनाचें काम मुखार व्हरनात. तशेंच आदिवासी भावांच्यो समस्या सोडोवपाकूय आडमेळीं येतात, अशें गावडे हांचें म्हणणें आशिल्लें. मुख्यमंत्री हेच आदिवासी कल्याण मंत्री आशिल्ल्यान कामां खातीर तांकां मेळिल्ल्यान ह्यान पयलींच्या खात्याच्या संचालकांनी तुमी सरळ मुख्यमंत्र्यांक कशे मेळटात, अशें पत्रा वरवीं उटा संघटणेक विचारलां.
गावडे हांणी केल्ल्या वक्तव्याचो विपर्यास केला. तातुंतल्यान मंत्री गावडे हांचेर कारवाय जावची अशी मागणी चुकीची आसा. उटाचे कार्यावळींत मुख्यमंत्री आनी राज्य सरकारान केल्ल्या बर्या कामाचोय उल्लेख केला. वस्तूस्थिती जाणून घेतले उपरांतूच कारवाये विशीं विचार जावचो अशेंय तांणी म्हणलें.
कार्यकारी अध्यक्ष विश्वास गावडे हांणी सांगलें, गोविंद गावडे हांणी समाजा खातीर काम केलां. हाका लागून तांकां गरज आसतली तेन्ना उटा संघटणा तांचे वांगडा उबी आसतली.
पयशे घेतल्या अशें खंयच म्हणूंक ना
मंत्री गोविंद गावडे हांणी श्रमशक्ती भवना सकयल फायली मंजूर जातात अशे तरेचें वक्तव्य केल्लें. हे विशीं विचारलें तेन्ना प्रकाश वेळीप हांणी सांगलें, मंत्री गावडे हे एक जापसालदार मनीस. तांणी जे आरोप केल्यात तांची चवकशी जावप गरजेचें. मात तांणी फायल्स मंजूर जावचे खातीर पयश्यांचें दिवप- घेवप जाता अशें खंयच म्हणूंक ना,अशेंय तांणी स्पश्ट केलें.
आदिवासी कल्याण खातें हें जापसालदारकेचें खातें. हाका लागून हें खातें वेगळ्या मंत्र्या कडेन आसचें अशे तरेची भावना मुख्यमंत्र्यां कडेन ह्यान पयलींय मांडल्या. खंयच्या मंत्र्याक खंयचें खातें दिवचें हो अधिकार मुख्यमंत्र्यांचो. मात आदिवासी समाजाच्यो भावना तांचे मेरेन पावयल्यात, अशें वेळीप हांणी म्हणलें.
मुख्यमंत्री सावंत हांचे सयत भाजप प्रदेशाध्यक्ष दामू नायक, खासदार सदानंद शेट तानावडे हांचीय भेट घेवन हे घटनेचे साक्षीदार म्हणून मंत्री गावडे हांणी कसलेच तरेचें चुकीचें वक्तव्य करूंक ना आनी कोणाचेरूच टिका करूंक ना हाचें स्पश्टीकरण दिलां. मंत्री गावडे सध्या गोंयां भायर आशिल्ल्यान ते आयले उपरांत तेय आपलें म्हणणें मांडटले. मुख्यमंत्र्यांनीय आमचें म्हणणें आयकून घेतले आनी विचार करतले अशें आस्वासन दिलां.
कारवाय जाल्यार फुडलो निर्णय
मंत्री गोविंद गावडे हांचेर कारवाय करतले, अशें भाजप प्रदेशाध्यक्ष तशेंच मुख्यमंत्र्यांनीय सांगलां. ते प्रमाण कारवाय जाल्यार उटा संघटणा कितें करतली? अशें विचारलें तेन्ना संघटणे वतीन सगल्यांचे विचार जाणून घेवन फुडलो निर्णय घेतले, अशें कार्यकारी अध्यक्ष विश्वास गावडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
