भांगरभूंय | प्रतिनिधी
गोंय विधानसभेचें पावसांतलें वर्सुकें अधिवेशन (अदमासपत्रकी विस्तारीत) राज्यपालांनी आपयलां. आमकां उलोवपाक वेळ उणो मेळटा, उण्या दिसाचें अधिवेशन असो बोवाळ विरोधी पक्षाच्या मुखेल्यांनी चलयला. कला अकादमी, येरादारीची कोंयडी, अपघात, धिरयो, सुणीं, काळजाचे वाडपी दुयेंती, रस्ते, स्मार्ट सिटींतलो पाटो प्लाझा, आदिवासीं पासत आशिल्ल्या येवजण्यांवरी मुखेल विशय भासाभासेक येतले. त्या विशयां परस गोंयाक उमळशीक आसा मंत्रीमंडळांत बदल जाल्लो पळोवपाची. वत, पावस, शिंयांतल्यान येवपी बदलांचेर भासाभास जावपाची गरज आसा. तेच भासाभाशेंत आसतलो आमचे फुडले पिळगेचो फुडार. फुडाराची भास संवसारांत जाता तेन्ना गोंयान फाटीं कित्याक रावप?
विधानसभा अधिवेशनाचें कामकाज लायव्ह आसता तेन्ना आमदारांनी उतरांचो सांबाळून उपेग केल्यार विद्यार्थी तांची देख घेतले. आमदार चुकल्यार आवाज वाडोवन तें उतर कामकाजांतल्यान काडून उडोवपाक अणभवी आमदार सभापतीपदार आसप गरजेचें. सभापतींक पदवी मेरेनचें शिक्षण आसल्यार तांकां कायदे, संविधान शिकोवपाची गरज नासता. पुस्तकां, दिसाळीं वाचपाची आवड आशिल्ले सरकारी अधिकारी, मंत्री, सभापतींचो आदार. गोंय सरकारांत तशे अधिकारी, कर्मचारी आसात. नव्या लोकप्रतिनिधी, मंत्र्यांकय ते मजत करतात.
मोबायलार मेळपी दिसाळीं चलता भोंवतना आयकुपाची कला, कौशल्यां पर्यटन मंत्री रोहन खंवटे हांकां खबर आसा. फाटल्या पंदरा वीस दिसांनी आमदार गोविंद गावडे हांणी पुस्तकां वाचल्यांत आसतलीं, ते सरकाराच्या आदाराक येतले हातूंत दुबाव ना. सांगत व्हय ते ताजमहाल आनी शहाजनाची काणी विरोधी पक्ष मुखेल्यांक? सभाघराक? कोण आदिवासी? कोण गोंयचो मुळपुरुस? कोण कुणबी? कोण वेळीप? कोण धनगर? कोण दलीत? हाचे परस कोण पाचवो, धवो, तांबडो, काळो, भगवो, निळो खांबो तें सांगपाक गोविंदबाब अनमनचे नात. उतरांनी शिंवर करचे परस आवाज, दोळ्यांचे भासेन मुख्यमंत्री सांगतात तेच भाशेचो उपेग केल्यार आदले कला आनी संस्कृती मंत्री फुडारांत, मुख्यमंत्री, राष्ट्रपतीय जावंक शकतात. पिरायेन ल्हान आशिल्ल्यान 2027 चे विधानसभा वेंचणुके खातीर मतदारसंघ बदलपाची तयारी तांणीय सुरू केल्या व्हय? तांचेर बदलपी मंत्रीमंडळ, विस्तारांतल्यान वेगळी जापसालदारकी येवंक शकता.
आमदार म्हणून तांची कळाशी पावसांतल्या विधानसभेंत दिसतली. आमदार निलेश काब्राल, आमदार आलेक्स रेजिनाल्ड लाॅरेन्स विधानसभेचें “ रेड बूक “ हातांत घेवन आसतात. आमदार विजय सरदेसाय आतां लोकसभेचे विरोधी पक्ष मुखेली खासदार राहुल गांधींक संविधान, रेड बूक शिकोवपाक वतले काय ना ती म्हायती आमदार रेजिनाल्डबाब सांगूंक शकतले. आमदार निलेश काब्राल अणभवांतल्यान कुडचड्याक मंत्रीपद मेळयतले. आपल्याक बारीक खातीं दिलीं पूण आपल्या खात्यान कितें जोडलां, मोडलां ती म्हायती दिवपाक दिव्यांग कल्याण मंत्री सुभाष फळदेसाय दितले. जैतांतल्यान स्वयंपूर्णा, अन्नपूर्णा, आदिवासी ग्रामच न्हय दुदग्राम सांगें तालुक्यांत ते हाडूंक शकतात, मुख्यमंत्र्यांच्या फाटल्यान लागिल्ल्यान.
विधानसभा अधिवेशना आदींय गोंय विधानसभेक नवे सभापती मेळूंक शकतात. वेंचणूक लागीं येता तेन्ना पक्षांतरांचीं सपनां कांय आमदारांक पडटलीं. विरोधी पक्ष मुखेल्यांच्या पक्षांतराचो इतिहास गोंयां मुखार आसा. आदलेवरी कदेलां, पेपरवेटस विधानसभेंत नासत पूण चुलते, बापूय विरोधी पक्ष मुखेली युरी आलेमांव हांकां ती देख दितले. तांचो वेवसाय बदल्ला, तांच्या पयलींच्या वेवसायाची काणी आमदार निलेशबाब काब्राल हांकां खबर आसतली. कांय काणयो ना निलेशबाब, ना गोविंदबाबू विधानसभेंत सांगचें नात. गितां, कवितेंतल्यान मना काळजाचेर पडिल्ले घावे मांडपाची तांक निलेशबाब, गोविंदबाबांक आसा.
येरादारी, अॅक्सिडेंटांचो अभ्यास चड जालो आतां अभ्यासांतल्यान आयिल्ल्यो सुचोवण्यो चालीक लावपाचो वगत आयला. पणजे, म्हापशें, मुरगांव, वास्को, दिवचले, फोंड्यां, काणकोणां, पर्वरे जंक्नशनार, बाणस्तारी, उसगांव, गोंयचे उत्तर, दक्षीण शिमेर तक्टे, स्पीडब्रेकर गरजेचे. भौशीक बांदकाम खात्या प्रमाण येरादारी खात्याच्या विभाजनाचो, नव्या विभागांचो विचार सरकारान करचो.
पर्वरेक गोंयचें दुसरें राजपाटण हो पावंडो मेळपाक जाय. पर्वरी दुसरी पणजी जाल्या. सचिवालय, विधानसभा, मंत्रीमंडळ प्रकल्प एकेच सुवातींत आशिल्ल्यान, लोकवस्ती वाडिल्ल्यान उदरगतय जाली हें सत. पर्वरे, सांखळी, फातोड्डें हे नवे मतदारसंघ बांदतना धारगळ, पैंगीण हे आदले मतदारंघ आतां व्हड जाल्यात आसतले. ते मतदारसंघ 2027 त परत बांदतना तिसरो, चवथो जिल्हो जातलो. सरकारी कार्यालयां, कामकाजाचें विकेंद्रीकरण हो येरादारीचे कोंयडेचेर उपाय. सरकारी अधिकारी, कर्मचाऱ्यांक शार पांवड्यार ई बशी, ई टॅक्सी सुरू करुंक येतात. भुरगेपणांत रस्त्याच्या उजव्यान दाव्यान चलपाक आतां पालकांनी शिकोवचें, शिक्षकांचेर शिक्षणाचें वजें वाडलां.
सरकार बदलता, सुदारता तेन्ना प्रशासनांत चवथी उपरांत येवपी व्हड बदलांक आपणावपाक समेस्तांनी तयार रावचें. मंत्रीमंडळ बदल आनी बदलपी प्रशासनाचें चीत्र विधानसभेंत दिसतलें. मुख्यमंत्री डाॅ. प्रमोद सावंत हांचेर जीएसटीच्या बदला खातीर केल्ले समितीची जापसालकी आसा. ते समितींतल्यान तांची वळख देशांतल्या चडशां राज्यांक जाल्या. प्रदेश भाजपाध्यक्ष नवे आशिल्ल्यान पक्षाच्या वावरांतय मुख्यमंत्र्यांक लक्ष घालचें पडटा.
मंत्रीमंडळ बदलपाक कळाव जाता तो ते अती बिझी उरिल्ल्यान. तांच्या जाहीर उलोवपांतल्यान खंयचे मंत्री बदलतले, उरतले, खातींय बदलतलीं तें तांच्या लागींच्यांक, पक्ष कार्यकारीणीक होलमलां. अन्न आनी वखदां प्रशासन संचालनालयाच्या अधिकाऱ्यांनी हाॅटेलां, गाडे, दुकानां तपाशिल्ल्यान येणावळ आयल्या, सुदारपय जालां. बाजारांत आंबे जुलय म्हयन्यांत दिसतात तेन्ना ते गोंयचे, गोंया भायले हें समजून घेवचे. आंबे, फळां, भाज्ज्यो ताज्ज्यो उरच्यो हेखातीर वखद, उदकाच्यो दवरिल्ल्यो बाटल्यो तपासच्यो. फळां, भाज्ज्यो, कड्डण, फरसाण, मिठायच न्हय ड्रायफ्रुटस तपासात. फरसाणाचे पोतयेर खावपाचें तेल कसलें वापरलां तें बरोवपा पासत अधिसुचोवणी काडची. उदकाच्या रित्या बाटल्यांनी तेल घालून विकतात तें समा आसा व्हय?
फाटल्या तीन चार म्हयन्यांनी कांय मंत्री वेगीं वावर करतात, तातूंतल्यान जाल्ले बदलूय दिसतात. तांकांय कळ्ळां दोन वर्सां भितर, आदींय विधानसभा वेंचणुको जातल्यो.
खासदार सदानंद तानावडे हांकां केंद्रीय मंत्रीमंडळांत सुवात मेळूंक शकता. ते उंचेले शिक्षण घेतिल्ले. केंद्रीय अर्थ मंत्रालयांत तांकां राज्यमंत्रीपद मेळ्ळ्यार ते त्या पदाक न्याय्य दितले. तांचे कडल्यान मुख्यमंत्री राज्याचे प्रस्न सोडोवन घेवंक शकतात, राज्यसभेंतल्यान केंद्रीय मंत्र्यांक मेळून. तांकां मुख्यमंत्र्यांचो तेंको आसा मंत्रीमंडळ, मंत्र्यांचीं खातीं बदलपाक.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
