मंत्री काब्राल हांकां माफी मागचीच पडटली

भांगरभूंय | प्रतिनिधी

पेडणें म्हाल नागरीक समितीः पत्रादेवी हुतात्मा स्मारकाचेर फुलां ओंपून आंदोलन सुरू

भांगरभूंय । प्रतिनिधी

पेडणें: . पेडणेंच्या आमदाराचो अपमान तो पुराय पेडणें म्हालाचो अपमान अशें आमी मानतात. ताका लागून मंत्री निलेश काब्राल हांणी आमदार प्रवीण आर्लेकार आनी सगळ्या पेडणेंकारांची माफी मागचीच पडटली., अशें पेडणें म्हाल समितीचे सदानंद वायंगणकार हांणी सांगलें.

भौशीक बांदकाम मंत्री निलेश काब्राल हांणी थळावे आमदार प्रवीण आर्लेकार हांचो अवमान केल्ल्या प्रकरणांत पेडणें म्हाला नागरीक समिती वतीन दुसऱ्या टप्प्यांतल्या आंदोलनाक सुरवात केल्या. मंत्री काब्राल आनी आर्लेकार हांची माफी मागली ना जाल्यार फुडलें आंदोलन खर करपाची शिटकावणी समितीच्या वांगड्यांनी दिल्या. पेडणें म्हाल नागरीक समितीन पत्रादेवी हुतात्मा स्मारकाक फुलां ओंपून दुसऱ्या टप्प्यांतल्या आंदोलनाक सुरवात केली, ह्या वेळार समितीच्या वांगड्यांनी वयली शिटकावणी दिली.

सोमारा 4 एप्रीलाक एके भौशीक कार्यावळीक मंत्री काब्राल आयिल्ले. त्या वेळार तांणी पेडणें मतदारसंघाचे आमदार प्रवीण आर्लेकार हांकां एकेरी आनी जरबीन उलोवन तांचो अपमान केलो. त्या वेळार थंय मांद्रें मतदारसंघाचे आमदार जीत आरोलकार लेगीत आशिल्ले. हे घडणुके वेळार तांणी मान खाला घातिल्ली सगळ्यांनी पळयल्या. हें प्रकरण तापतां अशें दिशिल्ल्यानूच मंत्री काब्राल हांणी आर्लेकार आपलो इश्ट आसा, अशें सांगून प्रकरण न्हिवोवपाचो यत्न केलो, अशें वायंगणकार हांणी सांगलें.

हे घडणुकेचो निशेध करचे खातीर समितीन ते घडणुकेच्या तिसऱ्या दिसा म्हणल्यार  बुधवारा 6 एप्रीलाक सगळ्या पेडणेंकारां वतीन पेडणें म्हाल समिती  वतीन 20 जाणांच्यो सयो आशिल्लें निवेदन प्रधानमंत्री, राज्यपाल आनी मुख्यमंत्र्यांक भेटोवपाचे निवेदन पेडणें उपजिल्होधिकारी कार्यालयांत हाजीर रावनाशिल्ल्यान पेडणें मामलेदार मळीक हांच्या कार्यालयांत दिलें. ते उपरांत तें निवेदन ई मेली वयल्यान राष्ट्पती भवन, प्रधानमंत्री कार्यालय, राज्यपाल आनी मुख्यमंत्र्यांक धाडलें. त्या निवेदनांत वयली घडणूक नमूद करून काब्राल हांणी 8 दिसां भितर माफी मागची अशें म्हणिल्लें. पूण तशें कांयच जावंक ना. ते खातीर आंदोलन टप्प्या टप्प्यान वाडोवचें पडटलें, अशें वायंगणकार हांणी सांगलें.

समितीन 14 एप्रीलाक घेतिल्ले बसकेंत थारिल्ले प्रमाण 16 एप्रीलाक पत्रादेवी हुतात्मा स्मारका कडल्यान सुरवात जाली. हें आंदोलन 15 ऑगस्टाक तेरेखोल किल्ल्या वयल्या हुतात्मा स्मारकाचेर सोंपतलें. बसकेंत चार म्हयन्यांचें आंदोलन करचें अशें थारिल्लें.. ते प्रमाण ह्या आंदोलनाक सुरवात केल्या, अशी म्हायती वायंगणकार हांणी दिली.

दर 15 दिसांनी राष्ट्पती भवन, प्रधानमंत्री कार्यालय, राज्यपाल, मुख्यमंत्री आनी मंत्री काब्राल हांकां माफी मागी मेरेन वा 15 ऑगस्ट मेरेन निवेदनां धाडटले. 15 ऑगस्टा उपरांत पेडणेंकारां कडल्यान अशी तयारी करून घेतले जे वरवीं ते संविधानीक पदा वयल्या व्यक्तींक, लोकप्रतिनिधींक वा सरकारी अधिकाऱ्यांक पत्रां बरयतना, आरे प्रधानमंत्री, आरे राज्यपाल, आरे मुख्यमंत्री, आरे मंत्री निलेश काब्राल, आरेमामलेदार अशा एकेरी नांवान उल्लेख करपाक सुरवात करतले. आमच्या लोकप्रतिनिधीक मंत्री काब्राल हांकां मान दिवपाक कळना जाल्यार हेरांक कित्याक मान दिवचो, अशें वायंगणकार हांणी सांगलें.

ह्या वेळार आरटीआय कार्यकर्ते राजन घाटे, साईनाथ आपुले, महादेव पटेकार, महेश वायंगणकार, मळीक आनी हेर मानेस्त हाजीर आशिल्ले.

मंत्री काब्राल हांणी फक्त आमदार आर्लेकार हांचो अपमान केलो म्हूण न्हय जाल्यार पुराय पेडणेंकारांचो अपमान केला. जर मंत्री काब्राल हांणी आमदार आर्लेकार हांची माफी मागली ना वा दिलगिरी उक्तायली ना जाल्यार ज्या ज्या वेळार आंदोलन जातलें, तातूंत आमी वाटो घेवन आंदोलनाची धार अदीक खर करतले, अशें साईनाथ आपुले हांणी सांगलें.

सरकारान मंत्र्यांक प्रशिक्षण दिवचें: राजन घाटे

आमदार प्रवीण आर्लेकार हांकां मंत्री निलेश काब्राल हांणी दिल्ले वागणुकेचो राजन घाटे हांणी निशेध केला. भाजपा सरकारांतलोच एक मंत्री एका भाजपा आमदाराच अपमान करता, हें दुर्दैवी आसा. सरकारान आपल्या आमदार, मंत्र्यांक कशें उलोवचें, कशें वागचें हाचें प्रशिक्षण दिवचें. तशेंच असो प्रकार परतून घडचो ना, हाची जतनाय घेवची. ताकतिकेन मंत्री काब्राल हांणी माफी मागची अशी तांणी मागणी केली. तेचवरी म्हादय न्हंये विशीं सरकार सामकें फट उलयता, असोय दावो घाटे हांणी केलो.