मंत्री, आमदार आसतनाच हे फुडारी संवसाराक अंतरले
भांगरभूंय | प्रतिनिधी
पणजी: गोंयचे पयले मुख्यमंत्री भाऊसायब बांदोडकार, माथाना साल्ढाणा, फ्रान्सीस डिसोझा, आदले मुख्यमंत्री मनोहर पर्रीकार हांचे उपरांत आतां पात्रांव म्हूण वळखुपी रवी नायक हांकां मंत्रीपदार आसतनाच मरण आयलें. मंत्री आसतनाच मरण आयिल्ल्या कांय मंत्र्यांचे वळेरेंत रवी नायक हांणी स्थान मेळयलां.
गोंयचे पयले मुख्यमंत्री भाऊसायब बांदोडकार हांकां 12 ऑगस्ट 1973 दिसा मरण आयलें. मुख्यमंत्री आसतनाच ते संवसाराक अंतरले. तांच्या मरणा उपरांत तांची धूव सर्गेस्त शशिकला काकोडकार हांचो मुख्यमंत्री म्हूण सोपूतविधी जालो. उपरांत मनोहर पर्रीकार हांच्या सरकारांत मंत्री आसतनाच माथानी साल्ढाणा हांकांय 21 मार्च 2012 दिसा अचकीत मरण आयिल्लें. तांच्या मरणा उपरांत तांची घरकान्न एलिना साल्ढाणा ह्यो कुठ्ठाळी मतदारसंघांतल्यान भाजपा वतीन आमदार जाल्यो.
म्हापशें मतदारसंघांतल्यान 1999 सावन सेगीत वेंचून आयिल्ले फ्रान्सीस डिसोझा हांकां 14 फेब्रुवारी 2019 दिसा मरण आयलें. अमेरिकेंत उपचार सुरू आसतनाच तांचे मंत्रीपद काडिल्लें. उपरांत अवघ्याच कांय दिसांनी ते आमदार आसतना संवसाराक अंतरले.
कांक्राच्या दुयेंसाक लागून वर्सां परस चड तेंप दुयेंत आशिल्ले मानेहर पर्रीकार हांकां मुख्यमंत्री आसतना 17 मार्च 2019 दिसा मरण आयलें. उपरांत मंगळारा रातीं शेतकी मंत्री रवी नायक संवसाराक अंतरले. फ्रान्सीस डिसोझा, मनोहर पर्रीकार हांचे प्रमाण रवी नायक लेगीत दुयेंत आशिल्ले. तरी लेगीत उपचारा खातीर तांकां हॉस्पिटलांत दाखल करूंक नाशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
