भांगरभूंय | प्रतिनिधी
नांवांचो गैरवापर करून व्हॉट्सअॅपा वरवीं फटोवपाचो प्रकार
भांगरभूंय | प्रतिनिधी
पणजी: सध्या गोंयांत बरोच बोवाळ चालू आसा. गोंयचे जायते मंत्री तशेंच आमदारांच्या नांवांचो गैरवापर करून लोकांक व्हॉट्सअॅपा वरवीं टार्गेट करपाचो प्रकार सुरू आसा.
हे विशीं दाबोळीचे आमदार आनी येरादारी मंत्री मॉवीन गुदिन्हो हांणी पुलीस स्टेशनांत अनवळख्या आड कागाळ नोंद केल्या. तांची व्हॉट्सअॅपा वरवीं कोणें तरी फेक प्रोफायल करून तांच्या वळखीच्या लोकां कडेन पयशे मागले. तेन्ना संबंदितांनी मंत्री गुदिन्हो हांकां संपर्क करून हे विशीं विचारलें. तेन्ना हो प्रकार उक्ताडार आयलो. तांणी अनवळख्या आड पुलिशेंत कागाळ केल्या. उपरांत असोच प्रकार फोंडेंचे आमदार आनी शेतकी मंत्री रवी नायक हांचे वांगडाय जालो. तांणीय पुलिशेंत कागाळ केल्या. जाल्यार कुडचडेंचे आमदार निलेश काब्राल आनी मांद्रेंचे आमदार जीत अरोलकार हांच्याय नांवान लोकांक फटयिल्ल्याचें उक्तें जालें. मजगतीं, अनवळख्यान फलोत्पादन महामंडळाचे संचालक चंद्रहास देसाय हांचे कडेन मयेंचे आमदार प्रेमेंद्र शेट हांणी फेक व्हॉट्सअॅप प्रोफायल करून संपर्क करपाचो यत्न केलो. हे विशीं कळटाच शेट हांणी +977 9702833748 ह्या नंबरा वयल्यान कोणेंय संपर्क करून पयशांची मागणी केल्यार ताका ब्लॉक करचें, अशें सांगलें.
बिरेस्तारा सकाळ सावन हो प्रकार सुरू आसा. ताका लागून लोकांनी सादूर रावचें, अश्या फेक प्रोफायलांक बळी पडचें न्हय अशें कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
