मंत्रीमंडळ बदलाक कळाव कित्याक?

भांगरभूंय | प्रतिनिधी

शिक्षण खात्यांतले बदल नवे शिक्षण पद्धतीक धरुन आसात. अंदू ते चालीक लावचेच आनी मंत्रीमंडळ बदल बेगोबेग जावचे. बदलां कडेन सकारात्मक रितीन पळोवपाक गोंयकार शिकतात, आडमेळीं नाकात.

पंचायती, नगरपालिका येणावळींत उण्यो पडटात हें दाखोवन दिवपाचो वावर मुख्यमंत्री डाॅ. प्रमोद सावंत हांणी केला. दोनय खात्यांक वडीर काडटना मुख्यमंत्री कोणा कडेन बोट दाखयतात हें समेस्तांक कळ्ळां. पंचायत, नगरपालिका मंत्र्यांचें खात्यां कडेन जाय तितलें लक्ष ना, हें अप्रत्यक्षपणान ते सांगतात. पंचायत, शार विकास खात्यांच्या मंत्र्यांची खातीं बदलपाक कळाव करचो न्हय. मंत्र्यां कडेन उलोवन, भासाभास करुन खातीं बदलल्यार लाव सरकाराक जातलो. 

भलायकीमंत्री विश्वजीत राणे भलायकी खातें बरे तरेन सांबाळतात. टावन अॅण्ड कंट्री प्लॅनिंग, रानां खात्याचें वजें आसाच. सगल्या बोवाळांत शार विकास यंत्रणा, खातें मात्शें कुशीक पडलां आसुये. पंचायतमंत्री मावीन गुदिन्हो हांचेंय तशेंच जालां. पंचायतच न्हय येरादारी खातेंय मोडून वच्चें पयलीं तांच्याय खात्यांत बदल करचेच. चडांत चड अर्थसंकल्पी विधानसभा अधिवेशना मेरेन मंत्रीमंडळ आसा तशेंच उरचें, उपरांत मंत्रीमंडळांत बेरीज, वजाबाकी जावची. 

नवें तंत्रज्ञान, कायद्यांतले बदल, नवीं अरिश्टां वेगीं येतना पिराय वाडटल्यांक त्रास जातात. घरच्यो जापसालदारक्यो आसतातच, त्या भायर वेंचणुको, राजकी पक्षाच्या कार्यावळींक, उक्तावणां, देव देवस्पण, राजकारणाचें चेंपण थोडें आसता व्हय? फकत मंत्रीच न्हय अधिकारीय ते परिस्थितींत चेंपणा खाला फुडें वतना आडखळटात, खातीं येणावळींत फाटीं पडटात हें सत. मंत्री उणें पडटना अधिकारी सक्षम आसल्यार येणावळ वगतार येतली. प्रशासकी सचीव, जोड सचीव, अवल सचीव, संचालक हें चक्र शासनाक भेरेवन उडयता. गरजे वेळार मंत्री मदीं पडल्यार आडावन उरिल्लो वावर जाग्यार घालपाक कळाव लागना. तें करतना कायदे, नेमावळी पाळो दिल्यार कोर्टाचीं सोंपणा एनजीओ चडना. 

खंयचीं खातीं कोणांक दिवप, कोणाक काडप हो मुख्यमंत्र्यांचो अधिकार. मंत्रीमंडळांतल्यान एकल्याकय भायर उडोवपाची मुख्यमंत्र्यांची इत्सा नासल्यार खात्यांत बदल करचो, कळाव नाका. सरकाराक रोखडींच ३ वर्सां पुराय जातात. वेंचणुकेक मतदारां मुखार वतना साबार आश्वासनां दिल्लीं. 100 टक्के नासलीं तरी 50 टक्क्यां मेरेन आश्वासनांची पूर्ती करपाक सरकार जैतिवंत जालां. कांय सरकारी येवजणी वास्तवा भायल्यो आसतात त्यो वस्तुस्थिती, परिस्थितीक धरून आसल्यार रोखड्यो चालीक लागतात. जातीकातीच्या भायल्यो आसल्यार त्यो वेगीं मुखार सरकतात. पंचायत, नगरपालिका टॅक्स एकठांय करपाक कित्याक उण्यो पडल्यो? मनीसबळ ना? टॅक्स चड आसा? अभ्यास केल्यार जापोय मेळटल्यो. वरिश्ठ नागरी केडरांतले अधिकारी रिटायर जातात तेन्ना खात्यांनी आयिल्ले नवे अधिकारी सगल्या पंचायत, नगरपालिकां मेरेन पावले ना? संचालकां कडेन उलयल्यार म्हायती मेळपाक शकता.

जिल्लो पंचायतींक मेळिल्ले अधिकार पंचायतीं परस कमी आसात? संगीत खुर्चेचो खेळ पंचायत, पालिका पावंड्यार येणावळीक, प्रशासकी वेवस्थेक जांच करपी आसा जाल्यार कायद्यांत दुरुस्ती हाडप गरजेचें. थळाव्यो स्वराज यंत्रणा घटमूट आसल्यार राज्याक बळगें मेळटा, अधिकारांचे विकेंद्रीकरण, नवो जिल्लो बेगीन मार्गाक लागचें. 

हालींच जाल्ल्या विधानसभा अधिवेशनांत मेळिल्ल्या माहितींतल्यान रिटायर्ड अधिकाऱ्यांक दोन- दोनदां सेवावाड दिल्या तें लोकां मेरेन नांवां सयत पावलें. कायद्यान सेवेंत जांकां वाड दिल्या ते अधिकारी मन लावन वावरांत घुस्पल्यात? आदलेवरी कामां करतात? ताचो नियाळ करचो. फाटल्या अणभवांतल्यान स्पश्ट जालां, रिटायर्ड जावन सेवा वाडीचेर आशिल्ले, रिटायरमेंटाक लागीं पाविल्ले अधिकारी अपेक्षे परस 50 टक्के उणें काम करतात. पिराय वाडटा तशें मंत्र्यांचेय तेंच जाल्यार अजाप जावचें न्हय. 

सरकारान एक बरी गजाल केल्या ती पिवपाच्या उदकाचें वेगळें खातें अखेर बांदलें. लागीं- लागीं धा- बारा वर्सांची ही येवजण तशीच पडून आशिल्ली. उदका पुरवण आनी पिवपाचें उदक एकठांय हाडपाचो व्हड वावर जाल्यार येणावळ येतलीच, म्हादय न्हंयेचो प्रस्न सुटावो जावपाक तांचो आदार मेळपाची शक्यताय आसा. ह्या खात्याक पिवपाच्या उदकाचे नवें जाळ विणपाक, झरे तळ्यांचे मॅपिंग करपाक लावचें. नळाच्या उदकाच्या गळतेचें प्रमाण आयजय खूब आसा, पिवपाच्या उदकाचो जार्दिन्यां शिंपपाक, मोटारी धुवपाक उपेग करतात तें बंद जावचें. तिळारीचें उदक पणजे आदीं पर्वरे वाठाराक मेळप चड गरजेचें, पणजेकारय पर्वरे रावपाक गेल्यात. ते खातीर अटल सेतूच्या तळांतल्यान पायपलायनी हाडप शक्य आसा व्हय? हें खातें सुरवेक मुख्यमंत्र्यांनी आपले कडेन दवरचें. उदकाचो एक एक थेंब वाटावपा पासत अंदू एप्रीलसावन लोकांक उलो मारचो. 

पुलीस, अर्थ खातें मुख्यमंत्र्यां लागीं आसतलींच, कोयर वेवस्थापनात मुखार वचचेंच पडटलें. पंचायत, शार विकास खातीं दिव्यांग कल्याण मंत्री सुभाष फळदेसाय सांबाळूक शकतले? येरादारी खातें सांबाळपाक येरादारीमंत्री मावीन गुदिन्हो  योग्य आसात? आमदार निलेश काब्राल हांचेर जाल्ल्या आरोपांची चवकशी पुराय जाली? आरोप खरे आसल्यार ख्यास्त जावची, नाजाल्यार तांकां मंत्रीमंडळांत घेवचें, कायदोच न्हय पर्यावरणमंत्री म्हणून तांचो वावर खूब बरो आशिल्लो. कला अकादमीचेर खूब्ब आरोप जाले, पूण कला संस्कृतीमंत्री थांबले नात. आयज कला अकादमी वेवसायिक नदरेंतल्यान मुखार गेल्या तें मुखेलमंत्र्यांचो कला आनी संस्कृती मंत्र्यांक तेंको आशिल्ल्यान. 

सहकार, शिंपणे आनी उदक सांबाळ खात्याची फेररचणूक जाल्यार तीं खातीं येणावळ दिवंक शकतात. वाडटे पिरायेचेर शेतकाम खात्यांत शेतकाममंत्री रवी नायक हांणी केल्लो वावर गोंयांक नवे दिकेन व्हरतलो. आरोपांतल्यान भायर सरत पर्यटन खात्याक मेळिल्ले पुरस्कार खातें कितें तरी करता हें दाखोवन दिवपी. पर्यटनाक अध्यात्माची जोड मेळपा पासत गांवगिऱ्यां वाठारांनी पर्यटकांक व्हरपा पासत येवजणी चालीक लागल्यात. शिगमो,  कार्नावाला खातीर पर्यटकांक गांवांनी व्हेल्यार शारांनी  येरादारीची कोयंडी जावचीना. शारांतल्या समित्यांक ह्या वावरांत आसपावन घेवंक येता. उत्सवांत राजकारणापरस थळावे, समित्यो, संस्था आसपावल्यार, गोंयच्या खाणा जेवणाक उर्बा दिल्यार गोंयकारपण पर्यटकांक दिसतलें. 

म्हायती तंत्रज्ञान, कम्युनिकेशन, उद्येग खातें विश्वजीत राणे सांबाळूंक शकत? वेवस्थापन शास्त्र शिकिल्ले विश्वजीत उद्येगांक वेगळी वाट दाखयतले? भलायकी खातें मुखेलमंत्री सांबाळूक शकतात. तंत्रीक शिक्षण, भौशीक बांदकाम, सहकार खातीं पर्यटनमंत्री रोहन खंवटे, वीजमंत्री सुदीनबाब ढवळीकार हांचे कडेन कित्याक दिवचीं न्हय? घोटाळ्यांतले दुबावीत मंत्री सरकारांत आसात जाल्यार आमदार निलेशबाब कित्याक नाका? आमदार देविया राणे, आमदार जेनीफर मोन्सेरात, आमदार आलेक्स रेजिनाल्ड लाॅरेन्स मंत्रीपदाक न्याय दिवंक शकतात. तांची चलणूक बरी आसा. शिक्षण खात्यांतले बदल नवे शिक्षण पद्धतीक धरुन आसात. अंदू ते चालीक लावचेच आनी मंत्रीमंडळ बदल बेगोबेग जावचे. बदलां कडेन सकारात्मक रितीन पळोवपाक गोंयकार शिकतात, आडमेळीं नाकात. 

– सुहासिनी प्रभुगांवकार