मंत्रीमंडळ बदलतलेंच, प्रशासनाक जागयात

भांगरभूंय | प्रतिनिधी

राजभास संचालनालय मुख्यमंत्र्यांनी आपले कडेन दवरचें. राजभास कोंकणीक अभिभाशेचो पांवडो मेळोवन दिवपाचे दिकेन तांचीं पावलां पडटात.

केंद्रीय मंत्री नितीनजी गडकरी हांचे सुचोवणे प्रमाण मुख्यमंत्री डाॅ. प्रमोद सावंत हांणी मंत्र्यांच्या वावराचो नियाळ केला. डिसेंबर 2024 अखेरे मेरेन मंत्रीमंडळांत बदल जावंक जाय आशिल्ले, पूण मात्सो कळाव जालाे. ‘बेटर लेट दॅन नेव्हर’. जावपी बदल समेस्तांक सरकारा कडेन सकारात्मक रितीन पळोवंक लायतले अशी आस्त आसा.
चुको कोण करिना, चुकतात तुमी आनी आमीय, निमाणें मनीस न्हय? मनीसपणाक काळें खत लावपी, फाटल्या दारान पयसो जोडपी, फटोवपी, मड्याचे ताळवे वयलें लोणी खावपी गोंयांतय आसात. सरकारांत रोखडे जावपी बदल तांकां दिश्टी पडचे नात, थिरायेन पावलां मारतल्यांक ते दिसतात. आयचे जिणेंत कोणे कोणाच्या केन्ना हाताक हात लावप हाका म्हत्व आसा. ताचे फाटली मोख कितें समजून घेवपाची तांक अणभवांतल्यान येता. मनशाच्या आवाजाचेंय तशेंच. दुसऱ्याचो आवाज वळखुवप ही एक कला, कौशल्य त्या आवाजांतली थरथर, भावना समजुपाची.
मुख्यमंत्र्यांची हालींची चलणूक, तांचो आवाज सरकारांत बदल घडोवन हाडपाची ते मनाची तयारी करतात अशें सांगपी. तशी तांकां बदल घडोवन हाडपाक भिवपाची गरज ना, केंद्रांत सरकार भाजपाचेंच आसा.
बदल जाले ना, जाल्यार सरकारांतलो एक गट खुबळावन घालपी आसा हाची जाणविकाय मुख्यमंत्र्यांकय जाल्या. मात तातूंतल्यान सरकाराक भिरांत आसा अशें न्हय. सभापती रमेश तवडकार हांची अस्वस्थताय तांकां मंत्रीपदा कडेन वचपाची इत्सा आसा हें कळीत करपी.
गोंय विधानसभेचे सभापती परतून वेंचून आयिल्ले ना, सभापती प्रतापसिंह राणे हांकांच तें शक्य जाल्लें. हो इतिहास. सभापती तवडकार हांकां 2027 त वेंचून येवप तशें कठीण नासलें तरी मंत्रीपद मेळ्ळ्यार उदरगत चड करूंक येता हें तांकां खबर आसा.
वाडपी पिराय तीन चार मंत्र्यांच्या कामकाजाची आडखळ. घोशणा त्योच त्योच करप, चालीक लागप 20 ते 30 टक्के. विधानसभेंतलें, नित्याचें तांचें वावुरप आनी खात्यांतल्या निधीच्या, वावराचो नियाळ घेतल्यार मंत्रीपदार आसूनय ते उणें पडटात हें दिसून आयलां. कांय वेळार तेच सरकाराक लजेक घालपी. मुख्यमंत्र्यांक त्याय मंत्र्यांच्या खात्यांत लक्ष घालचें पडिल्ल्यान तांचेर चेपण येता.
मुख्यमंत्र्यांची आपल्या खात्या कडेन आडनदर जाता. बेकायदो बांदकामां कायदो जालो तरी कायदेशीर जायना, तीं बांदतल्यांक कायद्याच्या चपक्यांत येवपाची इत्साच ना, बरोच तेंप तो प्रस्न सुटावो जावपाचो उरला.
रिटायर जाल्ले, रिटायरमेंटाचे वाटेर आशिल्ले सरकारी कर्मचारी सेवा सारकी दिनात ताका जापसालदार खात्याचे मंत्री थारतात. मंत्र्यांच्या प्रायव्हेट सेवेंत आशिल्ले वाडटे पिरायेचे कर्मचारी धुल्लांत लिपतात. तांकां पर्याय मेळ्ळ्यात. आदल्यांक घरा धाडपाक हरकत ना.
कसिनो गेमींग तशेंच हेर खात्यांची कोट्यांनी रुपयांची येणावळ आयली ना. जापसालदार कोण? सोदून काडून कारवाय जावची. कसिनो रेगुलेटरी आॅथोरिटीची बांदावळ करातच बेगीन. कायद्याचो मुखेल वांटोच चालीक लागलो ना जाल्यार उपेग कितें?
एकदां मुख्यमंत्री, कला संस्कृती मंत्र्यांनी पणजे पाटो प्लाझा वाठारांत भोंवचें. श्यामाप्रसाद मुखर्जी लायब्ररी मुखार उंच कसिनो बिल्डींग जाल्या, ती कला आनी संस्कृतीक सोंपोवची ना मूं? उंच मळबाक तेंकपी बिल्डिंगो पाटो प्लाझार उबारपाक बंदी गरजेची. पणजेंतल्या हेर वाठारांनी जावपी बिल्डिंगो, राबित्याच्या वाठारांत उबारपाचे वाटेर आशिल्ल्यो वेवसायीक बिल्डिंगो कोणा खातीर? सरकारान सोदचें. पणजे मांडवी न्हंयचे देगे वयलें शार. उंच उंच बिल्डिंगो जाल्यार भुंयकांपान मोडूंक शकतात.
टावन अॅण्ड कंट्री प्लॅनींग खात्या खाला भलायकी मंत्री विश्वजीत राणे घुसमट्टात. घरची जापलसालदारकी वाडल्या, देवस्पणय करचें पडटा. तांचे तकले वयलें वजें दुसऱ्याक दितना तो मंत्री रियल इस्टेटींत आसचो ना हाची जतनाय घेवची. ते सादूर जाल्यात, आपलोच न्हय सरकाराचो डिफेन्स करतात. विधानसभा अधिवेशनांत तांची कुशळटाय दिसता. 2027 वर्सा 27 आमदारांचे बळगें भाजपाक मेळोवन दिवपाक भलायकी मंत्री म्हत्वाचे.
कला आनी संस्कृती खात्याचें मंत्रीपद गोविंदबाब गावडे हांकां दिवपा फाटल्यान आशिल्ली मोख पुराय जावपाचे वाटेर आसा. पर्यटन मंत्री रोहन खंवटे अध्यात्म पर्यटन 2025 त हाडटलेच, तयारी जाली. उद्देग खातें भलायकी मंत्री वा पर्यटन मंत्र्यां कडेन दिवप बरें.
आमदार दिगंबर कामत सभापतीपद घेत व्हय? सभापती तवडकार हांकां समाजकल्याण, दिव्यांग, अनुसुचीत जमाती कल्याण, येरादारी हीं खातीं दिल्यार बऱ्या वावराची तांचे कडल्यान अपेक्षा आसा. मंत्री सुभाषबाब फळदेसाय हांकां शार विकास, खेळ आनी युवा वेव्हार, पंचायत खातीं दिल्यार ते खात्यांक आनीक उंचेल्या पांवड्यार व्हरूंक शकतात. आमदार निलेश काब्राल, आमदार आलेक्स रेजिनाल्ड लाॅरेन्स, आमदार संकल्प आमोणकार मंत्रीमंडळांत येतलेच. मुख्यमंत्र्यांक शाबासकी दिवंक, अचूक उतरांनी विशय मांडपाक ते शिकले. एक अस्तुरी मंत्रीमंडळांत, सरकारांत आसल्यार शांतिकाये वांगडा सरकाराची चलणूकय बरी जातली.
अर्थसंकल्प मांडटना मंत्र्यांच्या तोंडार ताचें पडबींब दिसचें पडटा. व्हिज्युअल्स पळयल्यार मुख्यमंत्र्यांक कोण न्हिदतात, कोण सिरीयस आसात तें कळटलें.
तान लागता तेन्ना बांयो खणच्योच पडटात, त्यो वेळार खणल्यो ना जाल्यार उदका पासत वळवळे काडचे पडटले. उदका पुरवण, वेवस्थापन खातें, मनीसबळ साधनसुविधा पुरवण खातीं राज्योत्सव 2025 दिसा चालीक लागचीं. वेळार बदल जाल्यार जैतय मेळटलें. मुख्यमंत्री मात्शे खरशेल्यात, तयार जाल्यात आपल्या खांद्या वयलें वजें देंवोवपाक.
राजभास संचालनालय मुख्यमंत्र्यांनी आपले कडेन दवरचें. राजभास कोंकणीक अभिभाशेचो पांवडो मेळोवन दिवपाचे दिकेन तांचीं पावलां पडटात.
शिक्षण खातें बदलाचे वाटेर आसा, गोंयचें समाजमन बदलता, संस्कृताय हाडपाची, संस्कृतीक प्रदुशण पयस करपाचे गरजेंतल्यान. प्रशासनांत बदल जावपाक लागल्यात. मंत्रीमंडळांत बदल जातलेच. तीन म्हन्या भितर प्रशासनांत बदलाचें वारें व्हड प्रमाणांत येतलें हेंवूय दिसपाक लागलां. गिन्यांनी उबंत पडिल्लो खणपट्ट्यांचो प्रस्न सुटावो करपाक प्रदुशण विरयत उद्देग हाडपाक आधार दितले हो विस्वास मुख्यमंत्र्यांनी अर्थसंकल्पांत दिला. पयशांची तजवीज जाल्ली पूण तो खर्च करपाक फाटीं कोण, कित्याक पडले हाचो अभ्यास जाला. त्या अभ्यासा इतलोच अर्थसंकल्पी अधिवेशनांत कोण कशे बसले, उठले, हांसले ताचेर एक नदर मारची.
कोयर, दर्यादेग वेवस्थापन वेगीं फुडें वचपाक कमी शिकिल्ले मंत्री उपेगाचे. स्मार्ट सिटी जांकां बंदखण दिसता तांकां ते बंदखणीतल्यान भायर सरपाक कळ्ळां. ते उलोवपाक लागल्यात, सरकाराचो तेय खांबो.

सुहासिनी प्रभुगांवकार
9881099260