भांगरभूंय | प्रतिनिधी
पणजी: येता ती विधानसभा वेंचणूक दोळ्यां मुखार दवरून राज्य मंत्रीमंडळांत फेरबदल करपाचो निर्णय पक्ष घेतलो. तातूंत एका-दोगांक मंत्र्यांक काडटले अशें स्वता मुख्यमंत्री डॉ. प्रमोद सावंत हांणीच शेनवारा प्रुडंट खबरां चॅनला कडेन ‘हेडऑन’ कार्यावळींत उलयतना स्पश्ट केल्ल्यान मंत्रीमंडळांत सुमारा भायर अस्वस्थताय पातळ्ळ्या. मुख्यमंत्र्यांच्या ह्या उलोवपाक लागून काडून उडयतले ते मंत्री कोण हे विशींय राजकी मळा वेल्या चर्चांक ओतो आयला.
राज्य मंत्रीमंडळांतल्या फेरबदलाची चर्चा फाटल्या कांय म्हयन्यां सावन सुरू आसा. सभापती रमेश तवडकार हांणी हे विशीं केल्लें उलोवप, उपरांत मुख्यमंत्री डॉ. सावंत आनी भाजप प्रदेशाध्यक्ष दामू नायक हांणी दिल्लींत वचून वरिश्ठ फुडाऱ्यां कडेन घेतिल्ल्यो गुपीत बसका आनी आतां येता त्या मंगळारा मुख्यमंत्री आनी दामू नायक हांची आशिल्ली दिल्ली भोंवडी हाका लागून फुडल्या कांय दिसांनी मंत्रीमंडळांत फेरबदल जातलो अशी शक्यताय उक्तायतात. पूण मंत्रीमंडळ फेरबदला विशीं पक्षा भितर सुरू आशिल्ल्या घाडामोडींक लागून कांय मंत्र्यां मदींय अस्वस्थताय पातळ्ळ्या आनी मंत्रीपदा खातीर आशेल्ल्यांच्या चेऱ्याचेर मात खोस पातळ्ळ्या.
विधानसभा वेंचणूक जिखपाचे नदरेन आंखिल्ले रणनिती प्रमाण एका-दोगां मंत्र्यांक काडून उडयतले अशें मुख्यमंत्री डॉ. सावंत हांणी म्हणिल्लें आसलें तरी सद्याचे स्थितींत तीन मंत्र्यांचो पत्तो कट करपाचें नियोजन भाजपाच्या केंद्रीय फुडाऱ्यांनी केलां. तांचे बदला मंत्रीमंडळांत कोणाक संद दिवची हाचोय निर्णय जाल्ल्याची म्हायती गोपांनी ‘भांगरभूंय’ कडेन उलयतना दिली.
मंत्रीमंडळ फेरबदलाचे फाटभुंयेर फुडले चर्चे खातीर मुख्यमंत्री आनी प्रदेशाध्यक्ष दामू नायक येता त्या मंगळारा दिल्ली वचपाचे आसात. त्या वेळार वरिश्ठ फुडाऱ्यां कडेन जावपी बसकेंत नव्या मंत्र्यांच्या सोपूतविधीची तारीख निश्चीत जातली अशेंय गोपांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
