भांगरभूंय | प्रतिनिधी
मुख्यमंत्री, तीन आमदार गोंयांत पावले, जाल्यार प्रवीण आर्लेकार गेले दिल्ली
भांगरभूंय । प्रतिनिधी
पणजीः केंद्रीय अर्थमंत्री निर्मला सीतारमण हांणी राजस्थानांतल्या जैसलमेरांत घेतिल्ले जीएसटी तशेंच अर्थसंकल्पपूर्व बसकेक हाजेरी रावन मुख्यमंत्री डॉ. प्रमोद सावंत शेनवारा गोंयांत आयले. तांचे वांगडा चार्टर विमानान राजस्थानाक गेल्ले आमदार जीत आरोलकार, दाजी साळकार आनी प्रेमेंद्र शेट दिल्ली वचनासतना गोंयांत आयले, जाल्यार पेडणेंचे आमदार प्रवीण आर्लेकार भाजप श्रेश्ठींच्या आदेशा प्रमाण दिल्ली पावले. ताका लागून राज्य मंत्रीमंडळ फेरबदला विशीं दिल्लींत हालचाली जाल्ल्याचें स्पश्ट जालां.
फाटल्या कांय म्हयन्यां सावन गोंयांत मंत्रीमंडळ फेरबदला सयत मंत्र्यांच्या खात्यां मदींय बदल जातले, अशी चर्चा चालू आसतनाच कांय मंत्री तशेंच भाजपाचे आमदार दिल्ली वचून पक्षाच्या वरिश्ठ फुडाऱ्यांक मेळटात. राज्यसभा खासदार तशेंच भाजप प्रदेशाध्यक्ष सदानंद शेट तानावडे हांच्या आमंत्रणा वयल्यान कांय दिसा आदींच आमदार संकल्प आमोणकार, केदार नायक आनी अपक्ष आमदार डॉ. चंद्रकांत शेट्ये दिल्ली पाविल्ले. ह्या तीन आमदारांच्या दिल्ली भोंवडे वयल्यान मंत्रीमंडळ फेरबदलाचे चर्चेक नेट आयिल्लो. त्या वेळार संसदेचें कामकाज दाखोवपा कातीर आपणें तांकां दिल्ली आपयल्लें, अशें स्पश्टीकरण तानावडे हांणी दिल्लें. ते उपरांत शुक्रारा मुख्यमंत्री डॉ. सावंत हांणी राजस्थानांत आयोजीत जीएसटी आनी अर्थसंकल्पपूर्व बसकेक वतना चार्टर विमानान आपले वांगडा जीत आरोलकार, दाजी साळकार आनी प्रेमेंद्र शेट हांकां वांगडा व्हेल्ले.
ह्या तिनूय आमदारांक वांगडा घेवन मुख्यमंत्री राजस्थान मार्गान दिल्ली वचपाची शक्यताय राजकी मळार आशिल्ली. आमदार दाजी साळकार हांणी तशी म्हायती ‘भांगरभूंय’ कडेन उलयतना दिल्ली. पूण त्याच चार्टर विमानान मुख्यमंत्री आनी हेर तीग आमदार शेनवारा सांजे वेळार गोंयांत पावले. ताका लागून भाजपाच्या वरिश्ठ फुडाऱ्यां कडेन तांची बसका राजस्थानांतूच जाल्ल्याची शक्यताय उक्तायतात.
भाजप श्रेश्ठींच्या आदेशा वयल्यान दिल्लीः आर्लेकार
भाजप श्रेश्ठीन दिल्ल्या आदेशा वयल्यान आपूण शेनवारा दिल्ली पावला. पक्षाच्या वरिश्ठ फुडाऱ्यां कडेन आपली बसका आसा, अशें पेडणेंचे आमदार प्रवीण आर्लेकार हांणी ‘भांगरभूंय’ कडेन उलयतना स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
