भांगरभूंय | प्रतिनिधी
पणजी ः आपल्या मंत्रिमंडळांतले सगळे मंत्री बरें काम करतात. काम करीना म्हूण खंयच्याच मंत्र्याक काडचें नात. एक- दोग जाणांक काडचें पडलेच जाल्यार तें फुडली विधानसभा वेंचणूक जिखपा खातीर म्हूण आसतलें अशें म्हणून मुख्यमंत्री डॉ. प्रमोद सावंत हांणी शेनवारा मंत्रीमंडळ फेरबदलाचे स्पश्ट संकेत दिलें.
प्रुडंट न्यूज चॅनलाचेर ‘हेड ऑन’ कार्यावळींत ते उलयताले. फाटल्या कांय म्हयन्यां सावन राज्य मंत्रीमंडळांत फेरबदल करपा सयत कांय मंत्र्यांच्या खात्यांत बदल जावपाची चर्चा सुरू जाल्ली. कांय दिसां आदीं सभापती रमेश तवडकार हांणी फुडल्या पंदरा दिसांनी मंत्रीमंडळांत फेरबदल जातलें अशें सांगिल्लें, उपरांत चर्चा परतून सुरू जाल्ली. कांय दिसांनी मुख्यमंत्री डॉ. सावंत आनी भाजपाचे प्रदेशाध्यक्ष दामू नायक हांणी दिल्लीक वचून केंद्रांतल्या वरिश्ठ फुडाऱ्यां कडेन हे संबंदी गुप्त बसका घेतली.
चार दिसा आदीं दामू नायक हांणी दिल्लीक वचून प्रधानमंत्री नरेंद्र मोदी आनी हेर फुडाऱ्यांक मेळून मंत्रीमंडळ फेरबदलाचेर चर्चा केली. येत्या मंगळारा मुख्यमंत्री आनी प्रदेशाध्यक्ष नायक दिल्लीक वचपाचे आशिल्ल्यान फुडल्या कांय दिसांनी मंत्रीमंडळांत फेरबदल जावपाची खात्री आसा.
हे फाटभुंयेर ‘हेड ऑन’ कार्यावळींत मुख्यमंत्र्याक हे विशीं विचारलें तेन्ना तांणी सांगलें, आपल्या मंत्रीमंडळांतले सगळे मंत्री बरें काम करतात. दरेकल्याची कामाची पद्दत वेगळी आसा. ते प्रमाण तांचें काम चालू आसा. काम करीना म्हूण खंयच्याच मंत्र्याक काडचें नात. एक- दोग जाणांक काडचें पडलेच जाल्यार तें फुडली विधानसभा वेंचणूक जिखपा खातीर म्हूण आसतलें. फुडली विधानसभा वेंचणूक जिखून सेगीत चवथे खेपे राज्यांत सरकार घडोवप हो आमच्या पक्षाचो हेत आसा. देखून सरकार घडोवपाच्या हेतान मंत्रीमंडळांत फेरबदल करपाचो निर्णय घेतला, अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
