भांगरभूंय | प्रतिनिधी
मडगांव : केंद्रांत जांची सत्ता आसता, तांचीच सत्ता गोंयांत आसता. ह्यान फुडेंय आमचेंच सरकार येतलें. विरोधकांनी कितलेय हाताक हात मेळयले तरी ताचो मात पसून उपेग जावचो ना. हेच विरोधक मंत्रीपद दितां म्हणीत जाल्यार धांवत आमचे कडेन येतले, अशें भलायकी मंत्री विश्वजीत राणे हांणी सांगलें.
मालभाट मडगांवच्या अर्बन आयुशमान भलायकी मंदिराचें मंत्री विश्वजित राणे हांचे हस्तुकीं उक्तावण जालें. मंत्री दिगंबर कामत हांचे सयत संचालक रूपा नायक, भलायकी अधिकारी बाप्तिस्ता मास्कारेन्हस, मुख्याधिकारी मधु नार्वेंकार आनी हेर ह्या वेळार हाजीर आशिल्लीं.
विश्वजित राणे हांणी सांगलें: सांगें, तुयें, सांवड्डेंच्या हॉस्पिटलांत गरजेच्यो सुविधा दितात. भलायकी मंदिरांत आयस्टड मशीन उपलब्ध करतले. सामान्य जनतेक कितें जाय हें समजून घेवपाची गरज आसा. भाजप सरकार राज्यांत आनी देशात आशिल्ल्यान अणभवी नेतृत्व आसा. सर्वसामान्य लोकांचीं बांदकामां नियमीत करतात. भलायकी सेवा ही लोकांच्या घरां मेरेन पावयतात. समाजीक न्याय हो शब्द वापरून जायना जाल्यार ते खातीर यत्नूय करचे पडटात. राज्यांत ४५० कोटींचीं वखदां फुकट दितात. एआयचोवापर करून मॅडिकल रिपोर्ट तयार करतले.
ह्यान फुडें सरकार आमचेंच येतलें. कोणे कितलीय तयारी केली तरी कांयच जावपाचें ना. मतदारसंघाचेर प्रभाव आशिल्ले आमचे फुडारी आशिल्ल्यान ते फक्त लोकां खातीर काम करतात. हात हातांत घेतले म्हणून सत्ता मेळना. मंत्रीपद दितां म्हणून सांगल्यार, ते रोखडेच धांवत येतले. विरोधक कितें करतात, कोणाक मेळटात, हेंय लोकांनी पळोवचें, अशें मंत्री राणे हांणी म्हणलें.
मंत्री दिगंबर कामत हांणी सांगलें : भलायकी बरी आसल्यार सगलेंच बरें आसता. अर्बन भलायकी मंदीर हे येवजणे खाला वैजकी सेवा पुरवण केंद्र उबारलां. आमचो प्रधानमंत्री विकसीत भारताचें सपन पळयता, हे खातीर समाजाची उदरगत जावपाची गरज आसा. शिक्षण आनी भलायकी ह्या घटकांकडेन लक्ष दिवपाची गरज आसा. पयलें भलायकी मंदिर मोती डोंगरार सुरू जालें. थंय रगताची तपासणी करता. १०८ ऍम्बुलन्स, जल्मल्ल्या भुरग्यांची स्क्रिनिंग अश्यो येवजण्यो राणे हांणी लोकां खातीर हाडल्यात.
ह्या भागांत जावपी बुरशेपणाची काळजी घेवपाची सुचवणी पुलीस आनी पालिकेक केल्या. हांगा वखदां फुकट दितले. गोमेकोंत कार्डिओलॉजी विभाग बरो सुरू आसा. रस्त्याचेर गाडेकरां खातीर येवजण सुरू केल्ल्यान ते खातीर पालिकेन सर्वेक्षण सुरू केलां. उपरांत ताचो मेळावो घेवन येवजणेची म्हायती दितले. तांकां वेवसाया खातीर अर्थ साहाय्य करतलें.
म्हजें घर ही येवजण फक्त सामान्य गोंयकारां खातीर आसा. मडगांवांत प्रभागा प्रमाण बसका घेवन फॉर्म भरतले. मडगांवां नवे प्रकल्प हातांत घेतल्यात. मात कांय जाणांक ही उदरगत दिसना, अश्या शब्दांनी विरोधकांचेर कामत हांणी टिका केली.
दक्षीण गोंय जिल्लो हॉस्पिटलांत गरजेची सगली सुविधा सुरू करपा खातीर मुख्यमंत्री सावंत हांचे कडेन कॅबिनेट बसकेंत चर्चा केल्या. गोमेकॉंत अपघात जाल्यार जे तरेन सुविधा मेळटात तश्योच जिल्लो हॉस्पिटलांतूय मेळटल्यो. पांच ते स प्रस्ताव मंजुरी खातीर धाडल्यात. फुडल्या ४ म्हयन्यां भितर ते मार्गाक लागतले. विरोधकांक वेंचणुकेंत हो प्रस्न घेवपाक मेळचोच ना. ताचे पयलींच सगल्यो समस्या सुटाव्यो जातल्यो, अशें मंत्री राणे हांणी सांगलें.
दक्षीण गोंय जिल्लो हॉस्पिटलांत न्यूरोलॉजी विभाग, ऑर्थोलॉजी विभाग सुरू जावचे अशी मागणी केल्या. हे विशीं आमच्या मुख्यमंत्र्यां कडेन चर्चा करून एका म्हयन्या भितर हो प्रस्न सोडयतले, अशें मंत्री कामत हांणी म्हणलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
