भांगरभूंय | प्रतिनिधी
रमेश तवडकारः सेवा होच उद्देश आशिल्ल्याचो दावो
भांगरभूंय । प्रतिनिधी
मडगांवः आपणे केन्नाच मंत्रीपद मागूंक ना. मतदारसंघांतलीं उदरगतीचीं कामा आनी लोकांची सेवा होच उद्देश बाळगून ते प्रमाण काम चल्लां, अशें सभापती रमेश तवडकार हांणी सांगलें.
सभापती तवडकार हांणी मडगांव पत्रकार परिशद घेवन लोकोत्सवा विशीं म्हायती दिली. ह्या वेळार पत्रकारांच्या मंत्रीमंडळ फेरबदलाचेर विचारिल्ल्या प्रस्नाक जाप दितना तांणी सांगलें, मंत्रीमंडळ बदलांत आपल्याक रुची ना. आपूण केन्नाच मुख्यमंत्री करात वा मंत्री करात अशे तरेची मागणी करूंक ना. कांय प्रसारमाध्यमां परतून परतून हो मुद्दो उपस्थीत करतात. जें पद आपले कडेन आसा ताका योग्य न्याय दिवप, मतदारसंघांत उदरगतीचीं कामां करून लोकांक न्याय मेळोवन दिवपाचें काम आपूण करतां. मुख्यमंत्री जालों आनी लोकांक न्याय दिवपाक जालें ना जाल्यार त्या पदाक कसलोच अर्थ उरचो ना. अंत्योदय तत्वाचेर काम करप, लोकांच्या आनी कार्यकर्त्यांच्या पोटापाण्याचो प्रस्न सोडोवप ह्या कामाचेर आपूण लक्ष दितां. लोकांक न्याय दिवपाचो आपलो यत्न आसा. तवडकार हांकां मुख्यमंत्री जावपाचें आसा, मंत्री जावपाचें आसा अशें कोणेय उस्तून काडलें जाल्यार लेगीत आपल्याक ताचें कांयच पडून गेल्लें ना. मुख्यमंत्र्यांक वा हेर आनीक कोणाकूय आपल्याक मंत्रीपद मेळचें अशें केन्नाच सांगूंक ना आनी मागणी लेगीत करूंक ना. ते खातीर मंत्रीपदा खातीर इत्सूक आसपाचो प्रस्नूच येना. गोंय विधानसभेचें अधिवेशन जानेवारींत जातलें. हो विशय सध्या मंत्रीमंडळा मुखार आसा. मंत्रीमंडळाचे बसके उपरांत ताचेर निर्णय जातलो. ते उपरांतूच अधिवेशनाच्यो तारखो निश्चीत जातल्यो, अशें तवडकार हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
