भांगरभूंय | प्रतिनिधी
सभापतीपद कोणाकूच नाका; मुख्यमंत्री, दामू हांचें ह्या विशयाचेर मौन
भांगरभूंय । प्रतिनिधी
पणजी : मंत्रीपदा खातीर भाजपांत इत्सुकांची रांक आसली तरी सभापतीपदा खातीर मात कोणूच इत्सूक ना. सभापती रमेश तवडकार हांकां मंत्रीपद दिले उपरांत सभापतीपदाची माळ कोणाच्या गळ्यांत घालपाची? ही समस्या नेतृत्वा मुखार आसा. तशेंच धारबांदोडें, काणकोण, पेडणें आनी केपें ह्या चार म्हालांक सध्या तरी मंत्रीमंडळात प्रतिनिधीत्व ना. सभापतीपद आनी म्हाल पावंड्यार मंत्रामंडळांतलो असमतोल पयस करपाचो तिढो भाजपा मुखार आसा.
नव्या मंत्र्याचो सोपूत सुवाळो तशेंच खात्यां विशी मुख्यमंत्री डॉ. प्रमोद सावंत तशेंच प्रदेश भाजप अध्यक्ष दामू नायक हे कसलेंच भाश्य करपाक तयार नात. नव्या मंत्र्यांच्या सोपूत सुवाळ्याचेर मुख्यमंत्री डॉ. प्रमोद सावंत योग्य वेळार निर्णय घेतले, अशें प्रदेश अध्यक्ष दामू नायक हांणी सांगलें.
मंत्रीपदा वयल्यान काडिल्ले गोविंद गावडे हे अनुसूचीत जमातीचे (एसटी) फुडारी आशिल्ले. अनुसूचीत जमातीक (एसटी) प्रतिनिधीत्व दिवपा खातीर गोविंद गावडे बदला सभापती रमेश तवडकार हांचो आस्पाव जावपाची शक्यताय आसा. रमेश तवडकार हांकां मंत्रीपद दिल्यार सभापतीपद कोणाक दिवचे? असो प्रस्न आसा. मंत्रीपद दिल्यार खंयचेंय खातें घेवपाक तयार आशिल्ल्याचें आमदार डिलायला लोबो, प्रवीण आर्लेकार, संकल्प आमोणकार ह्या आमदारांनी सांगलां. सभापतीपदा खातीर मात कोणेंच इत्सूक आशिल्ल्याचें जाहीरपणान सांगूंक ना.
आपल्याक मंत्रीपद मेळटलें काय ना, हाची आपल्याक कसलीच म्हायती ना. मुख्यमंत्री वा पक्षान अजून मेरेन आपले कडेन चर्चा करूंक ना, अशें सभापती रमेश तवडकार हांणी सांगलें.
गोविंद गावडे हांचें मंत्रीपद गेल्ल्यान एक मंत्रीपद रितें जालां. आनीक दोगांचीं मंत्रीपदां काडून त्या जाग्यार हेर दोगांचो आस्पाव जातलो. समाज कल्याण खात्याचे मंत्री सुभाष फळदेसाय हांचें मंत्रीपद वतले, अशी चर्चा आसा.
मंत्री म्हूण आपणाक पेझाद खातीं मेळूंक ना. चिल्लर खातीं मेळ्ळ्यांत. तरी लेगीत आपणे बरो वावर केला. आपल्याक काडल्यार पक्षाचें लुकसाण जातलें. सभापतीपद दिलें जाल्यार पक्षा खातीर आपल्याक काम करप शक्य जावचें ना. आपले कडेन पक्षान ह्या विशयाचेर चर्चा करूंक ना. सभापती पदा खातीर आपूण इत्सूक ना, अशें सुभाष फळदेसाय हांणी सांगलें. हेर मंत्री तशेंच आमदारांनी लेगीत सभापतीपदा विशीं उलोवपाक न्हयकार दिलो.
मंत्रीमंडळान सध्या म्हाल पावंड्याचेर खुबूच असमतोल आसा. रवी नायक, सुभाष शिरोडकार आनी सुदिन ढवळीकार हे फोंडें म्हालांतले तीन मंत्री आसात. गोविंद गावडे मंत्री आसतना फोंडें म्हालांतले चार मंत्री आशिल्ले. बार्देस म्हालांतले नीळकंठ हळर्णकार आनी रोहन खंवटे हे दोग मंत्री आसात. दिवचल म्हालांत मुख्यमंत्री डॉ. प्रमोद सावंत आनी सत्तरी म्हालांत भलायकी मंत्री विश्वजीत राणे हे मंत्री आसात. तिसवाडी म्हालांत बाबूश मोन्सेरात हे मंत्री आसात. दिवचल, सत्तरी, सांगें (सुभाष फळदेसाय), साश्टी (आलेक्स सिक्वेरा), मुरगांव (मॉवीन गुदिन्हो), तिसवाडी ह्या म्हालांत लेगीत एकूच मंत्रीपद आसा. धारबांदोडें, काणकोण, पेडणें आनी केपें म्हालांत एकूय मंत्रीपद ना. फोंडें म्हालांत पयलीं चार मंत्रीपदां आशिल्लीं आनी आतां तीं तीन जाल्यात. म्हाल पावंड्या वयलो असमतोल उणो करपाचे नदरेन मंत्रीमंडळांत फेरबदल जातलो. हाका लागून मंत्रीपदा खातीर सभापती रमेश तवडकार हांचें पारडें जड आसा.
म्हाल पांवड्यार मंत्रीपदांचो असमतोल
फोंडें – 3, बार्देस – 2 जाल्यार दिवचल, सत्तरी, सांगें, साश्टी, मुरगांव, तिसवाडी म्हालाक 1 मंत्रीपद आसा. धारबांदोडें, काणकोण, पेडणें आनी केपें म्हालाक एकूय मंत्रीपद ना. म्हाल पांवड्या वयलो मंत्रीमंडळांतलो असमतोल पयस करपाची कसरत नव्या मंत्र्यांची निवड करतना करची पडटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
