भांगरभूंय | प्रतिनिधी
पणजी : आदल्या खाण लिज धारकांनी लिज क्षेत्रा भायर डंप केल्ल्या लोहखनिजाच्या सांठ्याची म्हायती एकठांय करून ती सुचीबद्ध करतले, अशें लोहखनीज सरकाराचे वळेरेंत हाडपाचो निर्णय मंत्रिमंडळ बसकेंत घेतलो. मुख्यमंत्री डॉ. प्रमोद सावंत हांणी बसके उपरांत ही म्हायती दिली. ह्या वेळार जलस्त्रोत मंत्री सुभाष शिरोडकार हाजीर आशिल्ले. अश्या खनिजाचे पावणे विशीं मागीर निर्णय घेतले अशेय मुख्यमंत्र्यानी स्पश्ट केलें.
आदल्या लिज धारकांनी लिज क्षेत्राच्या भायर डंप केल्ले लोहखनिजाच्या सांठ्याची म्हायती दिवंक नाशिल्ली. लोहखनीज अशेंच पडून आशिल्लें. मंत्रिमंडळाच्या निर्णया उपरांत हे लोहखनिज सरकाराचे वळेरेंत येतले. हाका लागून हाचें मुल्यांकन करप, वेवस्थापन करप सुरळीत जातलें. हे खातीर गोंय खनीज धोरण 2013 प्रमाण हांचे नियमन करतले. हे खातीर आदल्या लीज धारकां कडल्यान अश्या लोहखनिजाची म्हायती घेतले.
तशेंच मंत्रिमंडळ बसकेंत गोमेकॉ रक्तपेढींत वैजकी अधिकार्यांच्यो 4 सुवातो कंत्राटी तत्वाचेर भरपाक मंजुरी दिल्ली. नव्या पशुवैजकी महाविद्यालया खातीर कुर्टी सध्या आशिल्ले हॉस्पिटलाचे इमारतीची दुरुस्ती आनी नुतनीकरणाक मंजुरी दिली. गोंय लोकसेवा आयोगाच्या भरती नेमांतल्या बदलांक मंजुरी दिली. गृह निर्माण मंडळांत कायदो आनी आयटी विभाग सुरू करपाकूय मंजुरी दिल्ल्याचें मुख्यमंत्र्यांनी सांगलें.
विवीध पदांचे नियुक्ती खातीर मंजुरी
इएसआय हॉस्पिटलांत फिजिओथेरपीस्ट आनी फार्मासिस्टाची कंत्राटी पदार नियुक्ती करपाक मंजुरी दिली. गोमेकॉंतल्या विवीध विभागांत एक लेक्चरर आनी तीन सहाय्यक प्राध्यापकांची कंत्राटी पदार नियुक्ती करपाक मंजुरी दिली. तशेंच आदिवासी कल्याण खात्यांत तीन कनिश्ठ अभियंतांचे नियुक्तीक मंजुरी दिल्ल्याचें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
