भांगरभूंय | प्रतिनिधी
मुख्यमंत्र्यान आयज मंत्री आनी भाजप आमदारांच्यो घेतल्यो बसका
पणजी : मुख्यमंत्री डॉ. प्रमोद सावंत हांणी सोमारा मंत्रालयांत मंत्री आनी भाजप आमदारांच्यो वेगवेगळ्यो बसका घेतल्यो. हे बसकेंत मंत्रिमंडळ फेरबदला विशीं आपणें कांयच चर्चा करूंक ना, असो दावो मुख्यमंत्र्यांनी बसके उपरांत पत्रकारां कडेन उलयतना केलो. मात विधानसभा अधिवेशना उपरांत मंत्रिमंडळांत फेरबदल जावपाचे संकेत तांणी आमदारां वांगडा जाल्ले बसकेंत दिल्ल्याची म्हायती सुत्रां वरवीं मेळ्ळी.
लोकसभा वेंचणुके पयलीं मुख्यमंत्री डॉ. सावंत हांणी राज्य मंत्रिमंडळांत फेरबदल जावपाचे संकेत दिल्ले. उपरांत कांय दिसां आदीं मुख्यमंत्र्यांनी राज्यसभा खासदार तशेंच भाजप प्रदेशाध्यक्ष सदानंद शेट तानावडे हांचे वांगडा भाजपाध्यक्ष जे. पी. नड्डा हांची भेट घेतली. प्रदेश भाजपाच्या चिंबलाच्या मुख्यालयाच्या सुवाळ्याचें आमंत्रण दिवपा खातीर आपणें नड्डा हांची भेट घेतिल्ल्याचो दावो मुख्यमंत्री आनी तानावडे हांणी केल्लो. मात हे भेटेंत मंत्रिमंडळ फेरबदला विशीं चर्चा जाल्ल्याची चर्चा राजकीय पांवड्यार सुरू जाल्या. तशेंच मुख्यमंत्री डॉ. सावंत हांणी सोमारा अचकीत मंत्री आनी आमदारांची मंत्रालयात बसका आपल्ल्यान मंत्रिमंडळ फेरबदला संबंदी दुबाव आनीक घट्ट जाल्लो. मात हे बसकेंत आपणें मंत्री, आमदारां वांगडा फात विधानसभेच्या पावसाळी अधिवेशना विशीं चर्चा केली. मंत्रिमंडळ फेरबदला विशीं आपणें कांयच चर्चा करूंक ना अशें मुख्यमंत्र्यांनी पत्रकारां कडेन उलयतना स्पश्ट केलें.
हे विशीं मुखार उलयतना मुख्यमंत्री सावंत हांणी, पावसाळी अधिवेशनांत पुराय अर्थसंकल्पाक मान्यताय मेळोवन घेवपा वांगडा आमदारांचे प्रस्न आनी विवीध मतदारसंघांतल्या उदरगतीच्या कामांचेर चर्चा केल्ल्याचें तांणी सांगलें.
आमदारा वांगडा घेतिल्ले बसकेंत मुख्यमंत्र्यानी मंत्रिमंडळ फेरबदला विशीं स्पश्ट संकेत दिल्यात. आतांच्या मंत्रिमंडळांतल्यान तीन मंत्र्यांक न्हयकारून तांच्या जाग्यार तीन नव्या आमदारांची मंत्रिपदां लागपाची शक्यताय आसा. मात हे बदल येवपी १५ जुलय सावन सुरू जावपी राज्य विधानसभेच्या अधिवेशना उपरांतूच जातले, अशें एका आमदारान सांगलें.
केंद्रीय मंत्री नितीन गडकरी ११ तारखेर गोंयांत
मनोहर आंतरराष्ट्रीय विमानतळा सावन राष्ट्रीय महामार्गाक जोडपी मार्गाचें उक्तावण ११ जुलयाक सांजेवेळार ५ वरांचेर केंद्रीय रस्ते आनी महामार्ग मंत्री नितीन गडकरी हांचे हस्तुकीं जातलें अशी म्हायती मुख्यमंत्री सावंत हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
