भांगरभूंय | प्रतिनिधी
रमेश तवडकार : आपलीं खंयचींच कामां आडकून उरूंक नात
मडगांव : मुख्यमंत्री डॉ. प्रमोद सावंत हांचे कडेन आशिल्ल्या आदिवासी कल्याण खात्या कडल्यान आपलीं सगळीं कामां जातात. पक्षान दिल्ल्या दिल्ल्या सभापतीपदाची जापसालदारकी आपलें सक्षमपणान पुराय केल्या. आपल्याक मंत्रिपद दिवचें काय ना, हो निर्णय मुख्यमंत्री आनी पक्षाचो आसतलो. ताचेर भाशण करप आतां योग्य थारचें ना, अशें सभापती रमेश तवडकार हांणी सांगलें. यांनी सांगितले.
तवडकार हांणी मंत्रिपदाचेर विचारलेल्या प्रस्नाचेर उलयतना सांगलें, आपूण सध्या सरकारांत आसां. आपल्या कडेन सभापती पदाची जापसालदारकी दिल्या. ती आपणें बरे भशेन सांबाळ्ळ्या. सभापती पदाचो बरो वापर आतां मेरेन आपणें केला. आपल्याक मतदारसंघांतल्या खंयच्याय कामा खातीर वा हेर कामां खातीरूय खंयचीय आडमेळीं आतां मेरेन येवंक़ ना. मतदार संघांतल्या ५ हजार तरणाट्यांक आपल्याक सक्षम करपाचें आसा. राजकीय बळ फाटल्यान आसले बगर हें शक्य ना. हाका लागून गरजेचें तें राजकीय फाटबळ आपल्याक कायमचें मेळ्ळां. हाका लागून मंत्रीपद गरजेचें आसा अशें ना. मंत्रीपद दिवप वा दिवप ना हो पक्षाचो आनी मुख्यमंत्रीचो अधिकार. आपूण सभापती पदाचेर आशिल्ल्यान हाचेर कसलेच तरेचें भाशण करचे ना. मंत्रिमंडळ विस्तार वा कोणाक मंत्री करचें हो विशय पक्षाचो आनी मुख्यमंत्र्यांचो. आमी ताचेर चर्चा करून ताका वेगळें चित्र दिवप योग्य न्हय.
आपूण समाजीक काम करपाक पुरायेन गुंथलां. आपूण पक्षाचो एक कार्यकर्तो. २००५ सावन आपूण आमदार म्हणून काम करतां. आपणें सगले तरेची परिस्थिती पळयल्या. आदले मुख्यमंत्री मनोहर पर्रीकर हांच्या मंत्रिमंडळांतूय मंत्री म्हणून काम करपाची संद आपल्याक मेळ्ळ्या. मंत्री पदाचो विशय हो सरकार आनी पक्षाचो. हाचेर मंत्रिपद मेळटलें वा ना हाचेर चर्चा करप योग्य थारचें ना. पक्षान विश्वासान आपल्याक सभापती पदाची जापसालदारकी दिल्या. हाचे भायर वेगळी जापसालदारकी दितले काय, हाची आपल्याक कल्पना ना, अशें तवडकार हांणी सांगलें.
समाजीक कार्य आनी आदिवासी समाजा खातीर आपूण १९९६ सावन काम करतां. एसटी दर्जाक लागून गाकुवेध हे संस्थे वतीन काम केलें. उपरांत आठ संघटणा एकठांय येवन समाजाचे प्रस्न मांडपा खातीर उटाची स्थापना जाल्ली. मात तात्वीक मतभेद आशिल्ल्यान ते संस्थेची आपणें कसलेच तरेचो संबंध दवरूंक ना. समाजीक काम करतना आदिवासी समाजा खातीर काम केल्ल्यान हेरूय समाजा खातीर काम करता. आदिवासी कल्याण खात्याचो कारभार मुख्यमंत्र्यां कडेन आसा. आपलो एखादो प्रस्न आसल्यार आपणें मुख्यमंत्र्यां कडेन मांडल्यार तो सोडयता. आदिवासी कल्याण खात्याकडेन खंयचेंय काम आसल्यार तातूंत कितल्योय समस्या आसल्यो आनी कळाव जालो तरी तें काम पुराय जालें असो महजो अणभव अशेंय सभापती तवडकार हांणी सांगलें.
आदिवासी भवन हो विशय आपणें हातांत घेवंक ना. ते विशीं कळाव कित्याक जालो, कोणें न्यायालयांत याचिका दाखल केली, हें खात्याच्या संचालकांक सांगपाक जातलें? आदिवासी भवन हें आदिवासी समाजांतल्या भुरग्यांक बर्यो सेवा शारांतूय मेळचे खातीर उबारतात. त्योच सुविधायो आपणें काणकोण सारख्या ग्रामीण वाठारांतूय उपलब्ध करून दिल्यात. हाका लागून हो विशय तांणीच सांबाळ्ळो. समाजाच्या उदरगती खातीर विवीध कल्पना आपणें चालीक लायल्यात अशेंय तवडकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
