मंडळ अध्यक्षपदार समर्थकांची नेमणूक करपाचे भाजप आमदारांचे यत्न

भांगरभूंय | प्रतिनिधी

-आयज, फाल्यां जातली मंडळ अध्यक्ष वेंचणुकेची प्रक्रियापणजी : मंडळ अध्यक्षपदाचेर समर्थक कार्यकर्त्याची वर्णी लावपाचे यत्न भाजप आमदार तशेंच मंत्र्यां कडल्यान सुरू आसात. हाचे खातीर भाजपचे मंत्री तशेंच आमदारांनी खासा रणनिती आंखिल्ल्याची म्हायती गोपांनी दिली. भाजप मंडळ अध्यक्षांची वेंचणूक प्रक्रिया आयज आनी फाल्या अशां दोन दिसांत जातली.

आयज शेनवारा मंडळ अध्यक्षपदा खातीर उमेदवारी अर्ज घेतले जाल्यार फाल्यां आयतारा वेंचणूक जातली, अशी म्हायती सुकाणू समितीचे वांगडी अॅड. नरेंद्र सावयकार हांणी दिली. भारतीय जनता पक्षाच्या सुकाणू समितीची बसका शुक्रारा जाली. हे बसकेक मुख्यमंत्री डॉ. प्रमोद सावंत तशेंच प्रदेश अध्यक्ष सदानंद शेट तानावडे हाजीर आसले. हे भायर आमदार निलेश काब्राल, आदले खासदार विनय तेंडुलकार, चंद्रकांत कवळेंकार, आमदार दिगंबर कामत, अॅड. नरेंद्र सावयकार, प्रा. गोविंद पर्वतकार, सभापती रमेश तवडकार, दामू नायक हे वांगडी हाजीर आशिल्ले. बसकेंत संघटणात्मक वेंचणुके विशीं चर्चा जाली.

आयज शेनवार आनी फाल्यां आयतारा मंडळ अध्यक्षांच्या वेंचणुकेची प्रक्रिया जातली. त्या, त्या मतदारसंघात वेंचणूक जातली. मंडळ अध्यक्षांची निवड जाले उपरांत मंडळ समित्यो स्थापन जातल्यो. हाचे उपरांत जिल्हो अध्यक्ष आनी समित्यो स्थापन जातल्यो. 10 जानेवारी मेरेन ही प्रक्रिया पुराय जातली. उपरांत प्रदेश अध्यक्षांची निवड जातली. मतदारसंघांतले पक्षाचे सक्रीय वांगडी अध्यक्षपदा खातीर मतदान करतले.

दिगंबर कामत, संकल्प आमोणकार, रूडाल्फ फर्नांडीस, अालेक्स सिक्वेरा, राजेश फळदेसाय, केदार नायक, मायकल लोबो, डिलायला लोबो हे आमदार काँग्रेसींतल्यान आयल्या. तशेंच शेतकी मंत्री रवी नायक, सुभाष शिरोडकार, बाबूश मोन्सेरात हे लेगीत पयलीं हेर पक्षात आशिल्ले. भारतीय जनता पक्षाचे चडशे आमदार वा मंत्री हेर पक्षांतल्यान आयल्यात. संघटणेचेर वर्चस्व दवरपा खातीर आपल्या समर्थकाची निवड मंडळ अध्यक्षपदाचेर जावची, अशें यत्न तांणी चलयल्या. हाका लागून पयलीं सावन भाजपात आशिल्ल्या आदले आमदार तशेंच फुडाऱ्यांची संभ्रमावस्था जाल्या. हातूंतल्यान मार्ग काडपाचे मुख्यमंत्री तशेंच हेर फुडाऱ्यांचे यत्न आसात. प्रदेश अध्यक्षा विशींचो निर्णय सुकाणू समिती तशेंच केंद्रीय नेतृत्व घेतले. मात मंडळ अध्यक्षांचो विचार घेतले. हाका लागून मंडळ अध्यक्षांची निवड म्हत्वाची थारता. मंडळ अध्यक्षपदा खातीर 45 वर्सां परस उण्या पिरायेची अट आशिल्ल्यान लेगीत आमदार, मंत्र्यां मुखार समस्या निर्माण जाल्या.