भांगरभूंय | प्रतिनिधी
हिं दी सिनेमळा वेले मंजूळ आवाजाचे पार्श्वगायक एस पी बालसुब्रह्मण्यम हांची आयज पांचवी जयंती. पांच वर्सां फाटीं 25 सप्टेंबर 2020 दिसा पिरायेच्या 74 व्या वर्सा एस पी बालसुब्रमण्यम हांकां कोरोनान मरण आयिल्लें. तांच्या मरणाक लागून रसिकां मदीं दुख्ख पातळिल्लें. कारण एस पी बालसुब्रमण्यम हे रसिकांचे आवडटे पार्श्वगायक आशिल्ले. तांचे मरण रसिकांक खूब दुख्ख दिवन गेलें. एस पी बालसुब्रमण्यम हांचो जल्म 4 जून 1946 दिसा आंध्र प्रदेशांतल्या नेल्लोर हांगा मेहुआ ह्य गांवांत जालो. तांचे पुराय नांव श्रीपती पंडितराध्युला बालसुब्रमण्यम अशें आशिल्लें. एस पी बालसुब्रमण्यम हांचे बापूय हरिकथा गायक आशिल्ले.
आंध्र प्रदेशांत हें परंपरीक लोकसंगीत आसा तातूंत कविता, कथा, गायन, नाच हाचे सयत सगल्या प्रकारांचो आस्पाव आसता. एस पी बालसुब्रमण्यम हांचे बापूय नाटकांतूय काम करताले. एस पी बालसुब्रमण्यम हांकां एक भाव आनी दोन भयणी आसात. एस पी बालसुब्रमण्यम हांणी व्हड जावन इंजिनियर जावचें अशी तांच्या बापायची खूब इत्सा आशिल्ली. पूण ती पुराय जावंक शकली ना. एस पी बालसुब्रमण्यम हांकां ल्हानपणा सावनूच गायनाची आवड आशिल्ली. ताका लागून तांणी गायनातूच करियर करप अशें थारायलें आनी तांणी वेवसायीक गायनाक सुरवात केली. 1964 वर्सा तांकां गायनांत पयलें इनाम फावो जालें. उपरांत तांचें नांव सगली कडेन पावलें. सुरवातेक तांणी आपले आवयभाशेंत म्हणल्यार तेलगू भाशेंत पदां गावपाक सुरवात केली. उपरांत तांणी तमीळ, मळ्याळम आनी कन्नड ह्या दक्षीण भारतीय भाशांनीय पदां गावपाक सुरवात केली. दक्षीण भाशेंत तांणी गायिल्लीं पदां लोकप्रीय जावंक लागलीं. तांची लोकप्रियतना दिसानदीस वाडूंक लागली. तांच्या मंजूळ आवाजान रसिकांक पिशें केलें. तांचो आवाज आनी तांणी गायिल्लीं पदां रसिकांक इतली आवडलीं की रसिकांनी तांकां दक्षीणेंतलो मोहम्मद रफी अशी पदवी दिली.
दक्षीणे कडल्यान तांणी आपलो मोर्चा हिंदी सिनेमळा वटेन वळयलो. हिंदी सिनेमळार प्रवेश केले उपरांत तांकां ‘एक दुजे के लिये’ ह्या सिनेमांत गावपाची संद मेळ्ळी. ह्या सिनेमांत तांणी गायिल्लीं सगलीं पदां खूब गाजलीं. आयजूय ह्या सिनेमांतलीं तांणी गायिल्लीं पदां प्रेक्षकांच्या ओंठार आसात. ह्या सिनेमांत तांणी गायिल्लें ‘हम बने तुम बने एक दुजे के लिये….’ ह्या पदा खातीर तांकां सर्वोत्कृश्ट पार्श्वगायकाचो राष्ट्रीय पुरस्कार मेळ्ळो. एस पी बालसुब्रमण्यम हांच्या पयल्याच सिनेमाक राष्ट्रीय पुरस्कार मेळिल्ल्यान तांचे नांव देशभर जालें. एस पी बालसुब्रमण्यम हांणी गायिल्ल्या पयल्याच सिनेमांतलीं पदां गाजिल्ल्यान तांकां खूबशा सिनेमांनी गावपाची संद मेळ्ळी. खूबशे संगीतकार तांकां आपले कडेन पदां गावपा खातीर गळ घालूंक लागले. मुखार तांणी खूबशा सिनेमांनी पदां गायलीं आनी तीं पदां लोकप्रीय जालीं. हिंदी सिने मळार तांचे आतां बरें बस्तान बशिल्लें. पत्थर के फुल, बागी, हम आपके है कौन? साजन, रोजा ह्या सिनेमांनी तांणी गायिल्लीं पदां खूब गाजलीं. सलमान खानाचो पयलो सिनेमा आशिल्ल्या ‘मैने प्यार किया’ ह्या सिनेमांत तांणी सलामानाचो आवाज जावन पदां गायलीं. ह्या सिनेमांत तांणी गायिल्लीं सगलीं पदां गाजलीं. सलमान खानाक सुपरस्टार करपाक एस पी बालसुब्रमण्यम हांचो मोलाचो वांटो आशिल्लो अशें म्हणत जाल्यार कांयच चुकचें ना. सलमान खानाच्या खूबश्या पदांक तांचोच आवाज आशिल्लो. सलमान खान आनी एस पी बालसुब्रमण्यम हे जणू एकाच नाण्याच्यो दोन वटो आशिल्ले.
1990 च्या दसकांत तांणी गायिल्लीं सगलीं पदां लोकप्रीय जालीं. एस पी बालसुब्रमण्यम हांणी 16 भाशांतल्यान 40 हजारां परस चड पदां गायल्यांत. 8 फेब्रुवारी 1981 दिसा सकाळीं 9 ते रातचीं 9 अशीं 12 वरां सुमार 21 कन्नड पदां रेकॉर्ड करून तांणी संवसारीक विक्रम केलो, जो गिनीज बूक ऑफ वर्ल्ड रेकार्ड हातूंत नोंद जाला. एस पी बालसुब्रमण्यम हांणी सुमार पांच दसकां आपल्या मंजूळ आवाजान रसिकांचेर मोनेळ घाली. तांच्या आवाजाची मोहिनी अशी आशिल्ली की जो तांचो आवज आयकता तो तांच्या मोगांत पडटा. ताकां खूबशे पुरस्कार मेळ्ळे. तांकां सुमार अर्दो डझन राष्ट्रीय पुरस्कार मेळ्ळ्यात. तशेंच खूबशे फिल्मफेर, स्क्रीन पुरस्कार मेळ्ळे. भारत सरकारानूय तांकां पद्मभूषण हो मानाचो पुरस्कार भेटोवन तांचो भोवमान केलो. रसिकांचे आवडटे आनी रसिकांच्या मनांत आदराचें स्थान आशिल्ल्या ह्या गायकाक कोरोनान अचकीत मरण आयिल्ल्यान रसिकांक मोटो धक्को बशिल्लो. मंजूळ आवाजाचे ज्येश्ठ पार्श्वगायक एस पी बालसुब्रमण्यम हांकां नमळायेचीं आर्गां.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
