भांगरभूंय | प्रतिनिधी
फोंडें: फोंडें-पणजी राष्ट्रीय म्हामार्गार मंगेशी हांगा घातक जंक्शनाचेर काल (शुक्रारा) सांजवेळा जाल्ल्या भिरांकूळ अपघातांत दोनूय वाहनांच्या ड्रायव्हरां सयत बसीतले कांय प्रवासी जखमी जाले. जखमींक मडकयच्या भलायकी केंद्रांत दाखल केल्यात.
मेळिल्ले म्हायती प्रमाण कामाक्षी ट्रॅव्हल्स क्रमांक जीए 02 टी 4933 ही बस मंगेशीचे दिकेन वताली. त्याच वेळार दुदाची येरादारी करपी टेम्पो क्रमांक जीए 02 टी 7235 हो पणजेचे दिकेन वतालो. मंगेशी हांगासरल्या घातक जंक्शनाचेर दोनूय वाहनांचो एकामेकाक मुखा वेल्यान धपको बसलो. ह्या अपघातांत बसीचो ड्रायव्हर प्रकाश नायक (60, रा. तळावली) हो बसींत आडकून पडिल्लो.
जाल्यार टेम्पोचो ड्रायव्हर असल्म (30, रा. हावसींग बोर्ड मडगांव) हो लेगीत ह्या अपघातांत गंभीर जखमी जालो. बसीतले आठ प्रवासी लेगीत जखमी जाल्यात, आनी तांकां उपचारा खातीर मडकयच्या भलायकी केंद्रांत दाखल केल्यात.
कांय गंभीर जखमींक फोंडें जिल्हो हॉस्पिटलांत दाखल केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
