भांगरभूंय | प्रतिनिधी
-7 दिसांची मुजत, गाडेधारकांचेर संकश्ट
फोंडेंः मंगेशी देवळा मुखार आशिल्ले सुमार 80 गाडे काडपाचो अादेश उच्च न्यायालयान दिल्लो. थळावे पंचायतीन ते खातीर गाडे धारकांक स्वता सुवात रिती करपाक 7 दिसांची मुजत दिल्या. उच्च न्यायालयाच्या आदेशाक पाळो दिवपाक पंचायत मंडळान कांय दिसां पयलीं सगले गाडे काडपाचो थाराव घेतिल्लो. अदमासे 60-70 वर्सां पसून वेवसाय करपी गाडेधारक आनी तांच्या कुटुंबियांचेर अातां व्हड संकश्ट आयलां.
मंगेशी देवळा लागसार जायत्या वर्सां पसून वेवसाय करपी गाडेधारकांक वेलींग-प्रियोळ पंचायतीन 20 एप्रील दिसा नोटीस धाडून गाडे काडपा खातीर 7 दिसांची मुजत दिल्या. ताचे पयलं 20 ऑक्टोबर दिसा पंचायतीन कारणां दाखयात नोटीस दिल्ली. पूण फकत 7 गाडेधारकांनी नोटिसीक जाप दिली. उच्च न्यायालयान गाडे काडपाचो आदेश दिल्ल्यान 16 एप्रील दिसा पंचायत मंडळाच्या बसकेंत थाराव घेतलो. गाडेधारकांक दिल्ली मुजत शुक्रारा सोंपतली.
मंगेशी देवस्थानाचे कर्नाटक राज्यांत रावपी एक महाजन मंगेशी पोरूं दाखल जाले. त्या वेळार देवळाच्या वाठारांत आशिल्ल्या गाड्यांच्या मदल्यान अचकींत एक भुरगे मोटारी मुखार आयले. ब्रेक लायिल्ल्यान अपघात टळ्ळो. पूण त्या महाजनान देवळा लागसार आशिल्ले गाडे काडपाक उच्च न्यायालयांत याचिका दाखल केल्ली. ते याचिकेची सुनावणी मंगळारा सकाळी जाली. त्या वेळार पंचायत मंडळान घेतिल्लो थाराव तशेंच गाडे धारकांक दिल्ल्यो नोटीसो न्यायालयांत सादर केल्यो. न्यायालयान कायद्या प्रमाण गाडेधारकांचेर कारवाय करपाचो आदेश मंगळारा दिल्ल्याची म्हायती खासा सुत्रां कडल्यान मेळ्ळ्या.
——————
मंगेशी देवळा लागसार आशिल्ले मोट्या प्रमाणांत गाडे फाटल्या 60-70 वर्सां पसून कार्यरत आसात. सद्दा हजारांनी भावीक तशेंच पर्यटक देवळाक भेट दितात. ताका लागून थंय सद्दा लाखांनी रुपयांचो वेव्हार जाता. पूण उच्च न्यायालयान गाडे काडपाचो आदेश दिल्ल्यान कांय गाडेधारकांनी स्वता गाडे काडपाक सुरवात केल्या.
लोकसभा वेंचणुकेचे फाटभुंयेर गाडे धारकांचो प्रस्न गंभीर जाला. पर्यटन खात्या वतीन कांय वर्सां पयलीं वाठारांत थळाव्या लोकां खातीर खासा गाडे उबारिल्ले. ते खातीर कोट्यांनी रुपया खर्च केल्ले. पूण अजून मेरेन सरकारान मंगेशी देवळा लागसारचे गाडे स्थलांतर करूंक नात. 5-6 वर्सा गाडे बंद अवस्थेंत आसात. वेलिंग प्रियोळ पंचायत, मंगेशी देवस्थान समिती तशेंच पर्यटन खात्यान बसका घेवन हाचेर उपाय काडपाचो यत्न केल्लो. पूण वेळ सोंपिल्ल्यान त्या यत्नांक येस मेळूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
