मंगळुरच्या कोंकणी शिक्षकां खातीर गोंय राजभास  खात्यान  घेतलें शिबीर

भांगरभूंय | प्रतिनिधी

भांगरभूंय । प्रतिनिधी
मंगळूरः मंगळुरच्या विश्व कोंकणी केंद्रान केल्ले सूचोवणे प्रमाण गोंय सरकारच्या राजभास खात्यान कर्नाटकांतल्या शाळांनी कोंकणी विशय शिकोवपी शिक्षक वर्गा खातीर कोंकणी प्रशिक्षण शिबीर घेतलें. कोंकणीचें व्याकरण आनी पाठ्यपुस्तकां तयार करपा संबंदी ह्या शिबिरांत मार्गदर्शन केलें. गोंयचो ज्येश्ठ कोंकणी शिक्षक आनी कवी प्रकाश नायक हांच्या फुडारपणा खाला हें शिबीर जालें.
मंगळुरच्या विश्व कोंकणी केंद्राचो अध्यक्ष नंदगोपाळ शणै हांणी हें शिबीर घडोवन हाडपा खातीर फुडाकार घेतलो. कोंकणी शिक्षण मुखेली डॉ कस्तुरीमोहन पै हांणी शिबीर आयोजीत करपाचो प्रस्ताव सादर केल्लो. उषा मोहन पै हांणी शिबिराचें संयोजन केलें. केंद्रचो मुखेल कार्यवाहक गुरुदत्त बंटवाळकार हांणी शिबीर आयोजीत करपा खातीर मजत करपी गोंयचे राजभास खातें आनी हेरांचे उपकार मानले.
कर्नाटकांत 6वे सावन 10वे मरेन कोंकणी विशय घेवपाक मेळटा. ते खातीर एनईपी 20 ची कोंकणी पाठ्यपुस्तकां तयार करपा संबंदी चर्चा जाली. कोंकणी शिक्षिका ऐश्वर्या भट्ट हिणे शिक्षकांक कोंकणी शिकोवपाक येतात त्या आडमेळ्यांची म्हायती दिली.