भांगरभूंय | प्रतिनिधी
पणजी : मंगळारा गोंयांत गडगड, वारें आनी जोगलां सयत पुराय गोंयांत पावसाचेर सांवार आयिल्लो पळोवपाक मेळ्ळो. ह्या घोग्यांनी झडिल्ल्यान पावसाक लागून लोकजीण विस्कळीत जाली. रस्ते, बाजार पावसाच्या उदका पोंदा गेले.
मंगळारा पुराय दीस पडिल्ल्या पवसाक लागून सैमीक लुकसाणूय बरेंच जालें. शेत पिकाचें व्हडा प्रमाणांत लुकसाण जालें. मजगतीं, फुडल्या चार ते पांच दीस राज्यांत पावसाचो नेट वडपाची शक्यताय हवामान खात्यान उक्तायल्या.
मंगळारा पडिल्ल्या घोगयांनी पावसाक लागून कुमया मरड, गिरी, उसापकर जंक्शन, खोर्ली म्हापशें ह्या वाठारांक न्हंयेंचें स्वरूप आयिल्लें. पावसाच्या उदकाच्या नेटान गाडयो व्हावून गेल्ल्याचेंय चित्र मुखार आयलें. ह्या पावसाचें उदक कांय घरांनीय भितर सरलें. तशेंच म्हापश्यां शेट्येवाडो आनी खोर्ले राखणे वणट आनी झाड कोसळून चार वाहनांचें लुकसाण जालें.
फुडले चार दीस येलो अलर्ट
हवामान विभागाकडल्यान फुडले चार दीस येलो अलर्ट जारी केल्ल्यान गोंय दर्यादेगो, कर्नाटक, केरळ, गुजरात भागांत ३५ ते ४५ प्रतिकिमी वेगान वारें व्हांवपाची शक्यताय उक्तायल्या. अरबी दर्या खवदळिल्ल्यान नुस्तेंमार्यांक फुडले पांच दीस दर्यांत वयचें न्हय म्हणून हवामान खात्यान शिटकावणी दिल्या. अरबी दर्यांत २२ मे सावन उण्या दाबाचो पट्टो तयार जावपाचो अदमास उक्तायला. २४ मे मेरेन तो आनीक खर जावन उत्तरेंत वचपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
