भांगरभूंय | प्रतिनिधी
संवसारभरांतल्यो अंतरिक्ष संघटना जायत्या तरांचीं संशोधन करतात. आतां मंगळा विशीं एक नवें संशोधन केलां. एका संशोधनांतल्यान मंगळाचेर उदक आसा अशें दिसून आयलां. ह्या संशोधना प्रमाण मंगळाच्या मातये सकयल खोल उदकाचो व्हड सांठो आसपाक शकता. मंगळाच्या पृश्ठ भागा खाला खड्ड्यांनी उदकाचो इतलो व्हड सांठो आसपाक शकता की, जातूंत दर्या भरपा इतलें उदक आसपाक शकता, अशें नासाच्या इनसाइट लँडरच्या डेटाचेर आधारीत अभ्यासा वेल्यान ही म्हायती मुखार आयिल्ल्याचें संशोधकांनी म्हणलां.
नासाच्या इनसाइट लँडराच्या डेटाचेर आदारून संशोधन केलां. ह्या संशोधना प्रमाण मंगळाच्या पृश्ठासकयल १० ते २० किलोमीटर मेरेन उदकाचो भूंयगत सांठो आसा असो निश्कर्श काडला. इनसाइट लँडर २०१८ ते २०२२ मेरेन आपलें मिशन पुराय जायसर कार्यरत आशिल्लें. ताणें दिल्ल्या डेटाक लागून शास्त्रज्ञांक हो उदकाचो सांठो सोदून काडपाक मदत जाल्या.
मजगतीं, मंगळाच्या पृश्ठा सावन सुमार ११ ते २० किमी. सकयल हें उदक आसा. हें उदक उज्याच्या खडपांत आडखळून उरलां. हांगा उदक तिगोवन दवरपा इतलें तापमान आसता. हे संबंदीं कॅलिफोर्निया विद्यापिठाच्या शास्त्रज्ञांनी केल्ल्या संशोधनांत कांय म्हत्वाचे मुद्दे मांडल्यात.
हें संशोधन कशें जालें?
कॅलिफोर्निया विद्यापिठाचो ग्रहशास्त्रज्ञ वाशन रायट हांणी, सद्याच्या मंगल ग्रहाच्या पृश्ठाखाला उदक आसा हें भूंयकांपाच्या ल्हारांचे गतीचें विश्लेशण करून थारायलां. ह्या खडपांतल्यान सगळें उदक काडलें जाल्यार तें १-२ किलोमीटर खोल संवसारीक दर्या भरूंक शकता, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
