भांगरभूंय | प्रतिनिधी
न्यूयॉर्क, खबरां संस्था ः डब्ल्यूएचओन एम- पॉक्साक वर्ल्ड हेल्थ इमरजन्सी म्हणून घोशीत केलां. मंकीपॉक्स नांवान वळखपी हे म्हामारीक एमपॉक्स ह्या नांवानूय वळखतात. १३ देशांनी नेटान पातळपी हे म्हामारीक लागून आतां मेरेन ५२४ लोकांक मरण आयलां. जाल्यार १४,००० लोकांक हाची लागण जाल्या.
फाटल्या तीन वर्सांनी दुसरे फावट मंकीपॉक्साक आप्तकालीन म्हामारी म्हणून घोशीत केलां. २०२२ त मंकीपॉक्स संवसारीक आप्तकालीन परिस्थिती घोशीत केल्या. तेन्ना संवसारांतल्या ११६ देशांनी एक लाखां परस चड प्रकरणां मुखार आयिल्लीं आनी २०० लोकांक मरण आयिल्लें. म्हत्वाची गजाल म्हळ्यार मंकीपॉक्साक लागून बायलां आनी १५ पिराये सकयल्या भुरग्यांक चड धोको आसा.
आफ्रिकेच्या कांगोस बुरुंडी, केन्या, रवांडा आनी युगांडा सयत जायत्या देशांनी एमपॉक्सचे दुयेंती नेटान वाडत आसात. ह्या दुयेंसान आतां म्हामारीचें रूप घेतलां. मंकीपॉक्स पसून वाटोवपी लसीचोय सध्या उणाव जाणवता.
मंकीपॉक्स म्हळ्यार कितें?
मंकीपॉक्स हो विशाणू माकडां वरवीं मनशां मदीं पातळटा. ह्या विशाणुचो संसर्ग एका मनशा कडल्यान दुसर्या मनशाकूय जाता. संरक्षणा बगर शरिरीक संबंद दवरल्यारूय हो प्रसार जाता. मंकीपॉक्साची लागण जाले उपरांत जोर येता आनी पुराय आंगाक पुळेर येता. सुरवातेक पुळेर मुखामळार दिसता आनी उपरांत पुराय शरिराचेर. ह्या विशाणुची सुरवात आफ्रिकेंतल्यान जाली.
मंकीपॉक्सचीं लक्षणां
मंकीपॉक्स हो एक व्हायरस. मंकीपॉक्स जाल्ल्या दुयेंतीच्या संपर्कांत आयले उपरांत हें दुयेंस नेटान पातळटा. मंकीपॉक्स जाल्यार जोर आनी आंगार उदकाचे कशे फोड येतात. हातूंत तकली दुखप, आंग दुखपाच्योय समस्या निर्माण जातात.
हे म्हामारीचेर उपाय ना
मंकीपॉक्स जाल्ल्या लोकांक हॉस्पिटलांत दाखल करपाची गजर जाणवपाक शकता. लक्षणांच्या आदाराचेर दुयेंतीचेर उपचार जातात. मात आजूनय ह्या दुयेंसाचेर कसलेच तरेचें वखद येवंक ना आनी लसूय ना. ताका लागून दुयेंतींचीं लक्षणां पळोवन उपाय करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
