भांगरभूंय | प्रतिनिधी
खबरां संस्था
इस्तांबुलः मँचेस्टर सिटीन यूईएफयए चॅम्पियन लीग सर्तींत पयलेच फावट वस्तादपण मेळयलें. फायनलींत तांणी इंटर मिलानाक 1-0 अशें हारयलें. ट्रेबल जिखपी व्हो आठवो पंगड आसा. इस्तांबुलांत जाल्ले हे फायनलींत मँचेस्टर सिटीचो एकसुरो गोल 68व्या मिनटाक रोड्रीन केलो. खेळाच्या पयल्या हॉफात मीडफिल्डर केवीन डी ब्रुइन दुखापतीक लागून खेळपाक शकलो ना.
इंटर मिलान 6वे फावट आनी मँचेस्टर सिटी दुसरे फावट हे लीग सर्तीचे फायनलींत पावल्लो. 2021 वर्सा मँचेस्टर सिटीक फायनलींत चेल्सीन 1-0 अशें हारयल्लें.
रियल मॅड्रीड हे लीग सर्तीतलो सगळ्यांत येसस्वी पंगड आसा. ताणे 14 फावट यूईएफए करंर आपल्या नांवार केला. 4 फावट तो उपजैतिवंत आशिल्लो. एसी मिलान हे वळेरेंत दुसरे सुवातेर आसा. तांणी सात फावट ही सर्त जिखल्या. लिव्हरपूल आनी बायर्न म्यूनिकाक दरेकी 6 फावट ही सर्त जिखल्या.
मँचेस्टर सिटी ट्रेबल जिखपी दुसरी इंग्लिंश टीम थारल्या. मँचेस्टराच्या पयलीं मँचेस्टर युनायटेडान ही सर्त जिखल्ली. चॅम्पियन लिगा शिवाय मँचेस्टर सिटीन इंग्लिश प्रीमियर लीग आनी एफए कप जिखला. दोनूय पंगडान लीग, कप आनी चॅम्पियन मेळून तीन मुखेल करंड जिखल्यात. ताका ट्रेबल म्हणटात.
14 फावट ही सर्त जिखपी रिलय मॅड्रीड हे स्पेनिश पंगडाक लेगीत ट्रेबल जिखपाक शक्य जालें ना. बार्सिलोना हे स्पेनिश पंगडान ही कामगिरी दोन फावट केल्ली. आतां मेरेन 8 युरोपियन पंगडांनी ट्रेबल जिखला, मँचेस्टर सिटी ट्रेबल जिखपी आठवो पंगड आसा. आमी इतिहार रचला. ताची आमकां खोस आसा, अशें मँचेस्टर सिटीचो कॅप्टन एल्काय गुडोअनान सांगलें. फायनल दोनूय पंगडांक कुस्तार आशिल्ली. दोनूय पंगडांक जिखपाची 50-50 टक्के चान्स आशिल्लो. फकत एका गोलान फायनलीचो निर्णय आमच्या फावराद लागलो अशें ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
