भांगरभूंय | प्रतिनिधी
अहिंसेचे पुजारी महात्मा गांधी हांची आयज पुण्यतीथ. ते निमतान भ्रश्ट अधिकारी आनी भ्रश्ट राजकी फुडाऱ्यांचेर अंकूश दवरपा खातीर राज्य आनी केंद्र सरकारान जातीन लक्ष दिवपाची गरज आसा. हे खातीर राजकी फुडाऱ्यांनी महात्मा गांधींचे विचार आपणावप गरजेचें आसा. कारण आमी स्वतंत्र भारतांत रावतात. ताका लागून आमकां आमच्याच देशांत आमच्याच लोकांच्यो गरजो आनी देशाचो विकास ह्या उद्देशान राजकी फुडाऱ्यांनी कार्य करपाची गरज आसा. राजकी फुडाऱ्यांक हे खातीर चड कश्ट वा मोटो संग्राम करपाची गरज ना. फक्त राष्ट्रपिता महात्मा गांधीची विचारांचें स्मरण करचें आनी आपली धनसंपत देशहिता खातीर समर्पीत करची इतलेंच काम जर आत्मियतेंतल्यान करीत जाल्यार गांधीजींच्या विचारांक दुजारो मेळटलो आनी देश सुजलाम सुफलाम जावपाची व्हड मजत जातली.
देश स्वतंत्र करपा खातीर देशाक 150 वर्सां लागलीं. म्हणल्यार 54750 दीस. हातूंत क्रांतीकारी विचार आनी अहिंसेचो मार्ग हातूंतल्यानूच 15 ऑगस्ट 1947 दिसा स्वतंत्र भारत उदयाक आयलो. भारत स्वतंत्र करपा खातीर महात्मा गांधी हांणी अहिंसेचो मार्ग आपणायलो आनी आपलें पुराय आंदोलन अहिंसेच्या मार्गान सुरू दवरलें आनी ब्रिटिशांक भारत सोडपाक भाग पाडलें. गांधीजीचो कार्यकाळ जल्मा सावन मरणा मेरेन सामको संघर्शमय उरलो आीन आपली पुराय जीण देशाच्या स्वातंत्र्या खातीर समर्पीत केली. 30 जानेवारी 1948 हो दीस महात्मा गांधी खातीर काळ थारलो. नथुराम गोडसे महात्मा गांधींच्या विचारा कडेन सहमत नाशिल्लो. ताका लागून 30 जानेवारी 1948 दिसा नथुराम गोडसेन दिल्लींतल्या बिर्ला भवनांत गांधींच्या प्रार्थना सभेंत गांधींजींच्या 40 मिणटां पयलीं पावलो आनी गांधीजी सभेक वता आसतना नथुरामान तीन फार पेटयले आनी महात्मा गांधींचो खून केलो आनी अहिंसेचो दिवो सदां खातीर पालवलो. उपरांत पुराय भारत स्तब्ध जालो. तेन्ना सावन 30 जानेवारी हो दीस शहीद दीस म्हूण पाळटात.
भारतांत फक्त 30 जानेवारी हो एकूच शहीद दीस नासून 150 वर्सांच्या काळांत लाखांचे संख्येन जांणी जांणी बलिदान दिलां ते पुराय दीस आमचे खातीर शहीद दिसूच आसात. महात्मा गांधी हे अहिंसेचे मुखेल मार्गदर्शक आशिल्ले. ताका लागून तांकां राष्ट्रपिता हो सन्मान नेताजी सुभाषचंद्र बोस हांणी दिलो. महात्मा गांधी, सुभाषचंद्र बोस, भगत सिंग, राजगुरू, तात्या टोपे, चंद्रशेखर आझाद, झाशीची राणी लक्ष्मीबाई, लोकमान्य टिळक, लाला लजपतराय आदीं सयत लाखांनी शहिदांच्या बलिदानान अखंड भारत उबो रावलो. हाका लागून देशांतली 140 कोटी जनता स्वतंत्रपणान जगतना दिसता.
आयज देशांतल्या राजकी फुडाऱ्यांक खऱ्या अर्थान गांधींच्या तत्वांची गरज आसा. कारण फाटल्या 20 वर्सां सावन 80 टक्के राजकी फुडारी भ्रश्टाचारी, माफीयाराज, बाहुबली, घोटाळे करप, अत्याचार, गुन्यांवीकरण, गरिबांची संपत्ती आडमार्गान हडप करप वा लुटप बी खूबशे प्रकार राजकी फुडाऱ्यांच्या आंगांत आशिल्ल्याचें दिसून येता.
ह्या 80 टक्के राजकी फुडाऱ्यांनी जर खऱ्या अर्थान गांधींजींचो मार्ग आपणायत जाल्यार देशाची भरभराट जातली. कारण महात्मा गांधी, सत्य, अहिंसा आनी विचारांचे खरे पुजारी आशिल्ले. आमी तांची जयंती, पुण्यतीथ व्हड उमेदीन मनयतात. जाल्यार तांचे विचार खऱ्या अर्थान आयचो राजकी फुडारी आचरणांत कित्याक हाडना? हो प्रस्न आयजूय देशाच्या 140 कोटी लोकांच्या मनांत भेडसायत आसता. आयज आमी विचार करीत जाल्यार मुठभर राजकी फुडारी आसात. पूण तांचे कडेन इतली संपत्ती आसा की तांच्यो सात पिळग्यो बसून खावंक शकतात. ह्या लोकांचो सगलो पयसो राज्य आनी केंद्र सरकारान एकठांय करीत जाल्यार अरबांनी रुपयांची चल-अचल संपत्ती आमकां दिसून येतली, आनी 10 ते 15 वर्सा खंयच्याच देशा कडल्यान रीण घेवपाची गरज पडची ना. हे खातीर देशांतलीं राज्य सरकारां आनी केंद्र सरकारान निसंकोचपणान राजकी फुडार्यांनी आडमार्गान जोडिल्ली कोट्यांनी रुपयांची संपत्ती सरकारी तिजोरेंत जमा करपाच्या उद्देशान खर पावलां उबारपाची गरज आसा. तेन्नाच महात्मा गांधींक आनी देशाच्या शहिदांक खऱ्या अर्थान आर्गां थारतली.
रमेश लांजेवार
9921690779
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
