भांगरभूंय | प्रतिनिधी
प्रेमेंद्र शेटः भ्रश्टाचार विरोधी संघटणांनी मुखार सरपाचो उलो
भांगरभूंय । प्रतिनिधी
दिवचलः देशभरांत आनी पुराय संवसारांत पातळिल्ल्या भ्रश्टाचाराचो त्रास सामान्य लोकांक जाता. लोकांक अशे प्रवृत्ती सावन पयस दवरून भ्रश्टाचार जावचोच ना, हे खातीर भ्रश्टाचार विरोधी संघटणांनी मुखार सरपाची गरज आसा, अशें मयेंचे आमदार प्रेमेंद्र शेट हांणी सांगलें.
अँटी करप्शन ब्युरो ऑफ इंडिया हे भ्रश्टाचार विरोधी संघटणेच्या गोंय प्रदेश कार्यालयाचें उक्तावण गोकुळवाडी सांखळे मयेचें आमदार प्रेमेंद्र शेट हांचे हस्तुकीं जालें. ह्या वेळार ते उलयताले.
ह्या वेळार सांखळेचे नगराध्यक्ष राजेश सावळ, दिवचलचे नगराध्यक्ष कुंदन फळारी, आदले सभापती राजेश पाटणेंकार, भारतीय भ्रश्टाचार विरोधी संघटणेचे राष्ट्रीय सल्लागार प्रशांत बोर्डेकार, उत्तर जिल्हो अध्यक्ष संजय विर्नोडकार, जिल्हो संचालक आकाश सातेरकार, उत्तर जिल्हो सचीव वैभवी शेट, कार्यकारी वांगडी तुषार शिरोडकार, उत्तर गोंय जिल्हो अध्यक्ष संदीप गजीनकर, माध्यम मुखेली सुनील हंडा, अफ्सरी बी, श्यामसुंदर हंडा, नुतन आसोलकार हाजीर आशिल्ले.
हे संघटणेन गोंयांत प्रभावी काम करतना खंयच्याच मळाचेर भ्रश्टाचार जावचो ना, असो तांचो धाक उरचे खातीर तांणी सक्रीय काम करचें. भ्रश्टाचार करप्यांचेर वचक बसपाकूच जाय, अशेंय आमदार शेट हांणी सांगलें. राष्ट्रीय सल्लागार प्रशांत बोर्डेकार हांणी येवकार दिलो. गोंय राज्य संघटणे वतीन राज्यांतल्या विवीध मळांचेर चालू आशिल्ल्या भ्रष्टाचाराचेर नदर दवरून ते पसून संबंदितांक आळाबंदा हाडप, तशेंच भ्रश्टाचाराक लागून सामान्य लोकांक त्रास जावचे न्हय हे खातीर वावर करतले. फाटले वर्सभर गोंयांत विवीध माध्यमांतल्यान हे संघटणेचो वावर चालूच आसा, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
