भांगरभूंय | प्रतिनिधी
देखून देशांत मनांतलो बदल हो भ्रश्टाचार ना करपाचो सगळ्यांत म्हत्वाचो भाग. लोकांची भ्रश्टाचाराआड सक्रिय भुमिका आसप सामकें गरजेचें.
भ्रश्टाचार हो समाजा खातीर सोरपाभशेन आसा, जाका पळोवन बेगीन ताचो नाश करप गरजेचें आसता, पूण भ्रश्टाचारा विशीं तितली जागृताय कित्याक दवरनात, हो गंभीर प्रस्न आसा. फकत सरकाराचे कायदे वा लोकांच्या आंदोलनांनी भ्रश्टाचाराचो नाश जावपाक मजत जायना; ताका लागून दर मनशाच्या मनांत आनी वृत्तींत बदल करचो पडटा.
भ्रश्टाचार हें फकत भायलें झगडें न्हय तर तो अंतर्मना कडेन जोडिल्लो आसा. देखूनूच सरकार आनी जनता दोगांयनी एकठांय येवन भ्रश्टाचारा आड जागृताय वाडोवप, प्रामाणीकपणाचें मोल ल्हानपणा सावन शिकोवप, लोकशिक्षण आनी नैतिक मोलांचें संवर्धन करप, भ्रश्टाचार करप्यांचेर कडक कारवाय करप आनी मानसिकतेंत स्वता खातीर, समाजा खातीर, देशा खातीर असो विचार रुजोवप गरजेचें आसा. ह्या मानसिक प्रतिबंधांक लागून भ्रश्टाचाराच्या मुळांक तोंड दिवपाक मेळटलें. भारतांत भ्रश्टाचार हो दीर्घकाळ आनी गुंतागुंतीचो प्रस्न जाला. सरकारी वेव्हार, भौशीक सेवा, विकास योजना आनी रोजगार ह्या सगळ्या क्षेत्रांत भ्रश्टाचारान समाजीक आनी आर्थीक उदरगतीक आडखळ हाडल्या.
कांय कायदे आनी ई-गव्हर्नन्सक लागून पारदर्शकताय वाडोवपाचो यत्न जालो आसलो तरी, जायत्या सुवातींनी काळो बाजार, रॅकेटिंग आनी घोटाळे आजुनूय भौशीक विस्वासाक हानी पावयतात. कायदो लागू करप गरजेचें आसलें तरी प्रशासनांतल्यो त्रुटी आनी लोकांची उदासीनताय भ्रश्टाचारा आड झुजपांत व्हड अडचण हाडटात. देखून देशांत मनांतलो बदल हो भ्रश्टाचार ना करपाचो सगळ्यांत म्हत्वाचो भाग. लोकांची भ्रश्टाचाराआड सक्रिय भुमिका आसप सामकें गरजेचें. लोकशायेंत सरकार लोकांक खातीर आसता, देखून नागरिकांनी भ्रश्टाचाराची खबर तशेंच म्हत्वाची म्हायती सरकार आनी पुलीस हांचे मेरेन पावची आनी नेमांचें सक्तीन पालन करचें. तंत्रज्ञानाचो वापर करून ई- गव्हर्नन्स, डिजिटायझेशन, डिजिटल पेमेंट्स, आनी सोशल मिडिया ह्या सारक्या माध्यमांनी भ्रश्टाचाराचेर नियंत्रण दवरपाची तांक वाडल्या. ह्या प्रकारान पारदर्शकताय वाडोवन आनी लोकांच्या जागृतायेक लागून भ्रश्टाचाराचेर निमणो पर्याय सोदपाक मेळटलो. भारतांतली सामाजिक आनी अर्थीक विशमता, तशेंच राजकी पक्षांतले भ्रश्टाचाराचे आरोप ह्या समस्येक आनीक गुंतागुंतीचें रूप दितात. फकत मनाचो बदल पुरो ना जाल्यार अर्थीक आनी सामाजीक सुदारणा लेगीत करप गरजेचें. सरकार आनी लोक ह्या दोगांयनी मेळून ही समस्या तोंड दिवपाक स्पश्ट धोरणां चालीक लावंक जाय.
भ्रश्टाचार ना करपा खातीर ईमानदारी, न्याय, आनी जबाबदारी ह्यांचे मूळ संस्कार दर एका नागरिकाच्या मनांत रुजल्या बगर भारताच्या बऱ्या फुडारा खातीर झुज अपूर्ण उरतले. शासनान योग्य धोरणां चालीक लायली आनी लोकानी सक्रिय सहकार्य दिल्यास, हो व्हड समाजीक प्रस्न निश्चितच सुट्टले.
प्रमिला प्रसाद फळदेसाय
9011834847
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
