भांगरभूंय | प्रतिनिधी
फाल्यां सरकारी खात्यांतल्या कनिश्ठ कर्मचाऱ्यांचो पगार एक लाख रुपया लेगीत केलो तरी तो भ्रश्टाचार हो करतलोच हें सत्य आासा.
भ्रश्टाचार म्हळ्यार भ्रश्ट आचार. अर्थांत हळशीक वेव्हार. हें उतर आमकां आतां संवकळीचें जालां. सरकारी खातीं हीं भ्रश्टाचारांचीं उगमस्थानां अशें म्हळ्यार अतिताय जावची ना. सरकारी खातें मागीर जावं ते शार आनी नगर नियोजन खातें आसूं वा पुलीस, महसूल, आरटीओ, म्हायती आनी प्रसिध्दी खातें, सेल्स टॅक्स, आयकर सगल्या खात्यांक भ्रश्टाचाराची लागण जाल्ली आसा. पंचायतींनी आनी नगरपालिकांनी लेगीत हो रोग व्हड प्रमणांत पातळिल्लो आसा.
हालींच हडफडें ह्या गांवांत बर्च बाय रोमियो लेन ह्या नायट क्लबाक उजो लागून 25 लोकांक मरण आयलें. ते बरोबर गोंयचें सरकारी प्रशासन खडबडून जागें जालें. आजी- माजी मंत्र्यांनी हड्ड्यार हात बडोवन सांगलें, सरकारी खात्यांनी चलिल्ल्या भ्रश्टाचाराक लागून हो उजो लागलाे, आनी त्या संबदीत सरकारी अधिकाऱ्यां आड खर कारवाय जावंक जाय अशी मागणी केली. ह्या बेकायदो नायट क्लबा संबदान विधासभेंत एका भापज पक्षाच्या आमदारान मुद्दो उपस्थीत केल्लो आनी त्या क्लबा आड कारवायेची मागणी केल्ली. त्या वेळार थळावो आमदार आनी स्वता मुख्यमंत्री सभाघरांत हाजीर आशिल्ले. पूण त्या क्लबा आड कारवाय करपाक प्रशासनान कसलींच पावलां उखलूंक नात. पूण त्या नायट क्लबाक उजो लागलाे आनी 25 जाण संवसाराक अंतरले ही बातमी कळना फुडें सगलेच खडबडून जागे जाले. तेन्नाच जर सरकारान चवकशी करून कारवाय केल्ली जाल्यार ही दुर्घटणा घडची नाशिल्ली.
थळाव्या आमदाराक ह्या नायट कल्बा विशीं सगली म्हायती आसुंकूच जाय. पूण तो आपूण साव कसो दाखयता आनी संबदीत आशिल्ल्या अधिकाऱ्यां आड कारवाय करपाची मागणी करता. हें तो लोकांक दाखोवपा खातीर करता. तो हे दुर्घटणेक तितलोच जबाबदार आसा. ताचीय चवकशी जावंक जाय.
आतां सरकारान उत्तर गोंय दर्यादेगेर आशिल्ल्या हेर नायट क्लबां विशीं कारवाय करपाक सुरवात केल्या. इतलो तेंप प्रशासन खंय न्हिदिल्लें? थळाव्या आमदाराक बेकायदेशीर रितीन चलपी नायट क्लबा संबदान कांयच खबर नाशिल्लें?
अशें जावंकूच शकना. हप्तो मेळ्ळो की वाचा बंद जाता हे सत्य आसा. उत्तर दर्यादेग वाठारांत हप्त्यांचें राज्य चल्लां अशें सगलेच जाण आतां उलोवंक लागल्यात. ह्या दर्गादेग वाठारांत आनिकूय खूबशे नायट क्लब बेकायदेशीर रितीन चालू आसात. सरकारी अधिकरी ह्या बेकयदेशीर नायट क्लबां आड कारवाय करपाक लागल्यात ही बरी गजाल.
सगल्यांक खबर आसा की, सरकारी खात्यांनी, पंचायतींनी आनी नगरपालिकांनी भ्रश्टाचार भरपूर प्रमाणांत चलता. दुडू दिले बगर कसलोच परवानो वा हरकत ना दाखलो मेळना. आयज पंचायत वांगडी, नगरसेवक, पंचायत सचीव वा तलाठी पयश्यांनी गब्बर जाल्ले आसात. आलिशान घरांनी रावतात आनी पॉश गाडयांनी भोंवतात. तांकां चार ओळी इंग्लीशींतल्यान धड बरोवंक वा उलोवंक येना, पूण रुबाब मात व्हडलो. आयकर खातें हांची कित्याक चवकशी करिना?
पर्यटन उद्देग हो गोंयच्या अर्थीक वेवस्थेचो एक मुखेल कणो आसा. गोंयचे हजारांनी लोक ह्या पर्यटन उद्देगाचेर निंबून आसात. पर्यटन वेवसाय हें तांच्या उपजिविकेचें माध्यम आनी साधन. देखून ह्या पर्यटन उद्देगाचो विकास जावप, ताची भरभराट जावप हें तितलेंच म्हत्वाचें. ह्या पर्यटन उद्देगाचो विकास जावचो, गोंयांत चडांत चड देशी आनी विदेशी पर्यटक येवचे हे खातीर सरकार खूब वावुरता. पूण भ्रश्टाचाराक लागून अश्या नायट क्लबांनी वा बार अॅण्ड रेस्टॉरंण्टांनी उजो लागपाच्यो घडणुको घडपाक लागल्यो जाल्यार ताचो परिणाम पर्यटन वेवसायाचेर जाले बगर रावचो ना. देखून कायद्याचे फास्केंत रावन ताका खरपणान पाळो दिवप खूब गरजेचें आसा.
ह्या देशांत नीतीमुल्यांक अर्थ उरूंक ना. एका तेंपार शिश्य आपल्या गुरूक नमस्कार करून फुडें वतालो. आयज शिश्य गुरुच्या पोटार पांय दिवन मुखार वचपाक लागल्यात. काळ बदल्ला. मनीस बदल्ला. भ्रश्टाचार हो जिणेचो एक भाग जाला. भ्रश्टाचाराचीं पाळांमुळां समाजांत रुतल्यांत हें सत्य आसा. तें आमी न्हयकारूंकना शकनात. फाल्यां सरकारी खात्यांतल्या कनिश्ठ कर्मचाऱ्यांचो पगार एक लाख रुपया लेगीत केलो तरी तो भ्रश्टाचार हो करतलोच हें सत्य आासा.
अनील कामत शंखवाळकार
9763718518
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
