भांगरभूंय | प्रतिनिधी
अमेरिकेचो ह्या जुंव्याचेर ताबो नासलो तरी थंय तांच्या सैन्याचो तळ, तंत्रज्ञान केंद्रां आसात.
हातांत सत्ता एकवटली आनी देश म्हासत्ता आसा हें खबर आसलें काय ताच्या मुखेल्याक ‘हें करुं, काय तें करूं’ जाता. सोर्त फुटिल्ल्या मनशा भशेनूच. अमेरिकेचे अध्यक्ष डोनाल्ड ट्रम्पूय हाका आडवाद नात. ते सत्तेर येत सावन जें – जें करपाक लागल्यात तें तांच्या समर्थकांक आवडूंक लागलां. ह्या करण्यांनी देश खांकनवाळ जातलो, हाचो तांकां आनी खुद्द ट्रम्पसायबांकूय विसर पडला. व्हेनेझुएलाचें प्रशासन ताब्यांत आसाच, आतां अमेरिका ग्रीनलॅण्ड घेवपाक सोदता. विरोध करपी डेन्मार्क, नॉर्वे, स्वीडन, फ्रांन्स, जर्मनी, युनायटेड किंगडम, नेदर्लंड्स आनी फिनलँड ह्या 8 युरोपी देशांचेर तांणी 10 टक्के शुल्क लायलां. 1 फेब्रुवारीच्यान तें लागू जातलें. चार म्हयन्यांत ‘येस बाॅस’ म्हणलें ना जाल्यार हें शुल्क 25 टक्क्यांचेर पावतलें. हे युरोपी देश अमेरिकेन दोळे मोठे केले म्हूण भियेंतलेच अशें ना. ते वटेन अमेरिका इराणाच्या हिजाबाक हात घालूंक सोदता. आतां हे सगलेच देश एकठांय जावन रशिया, चीनाच्या आसऱ्याक वचनात जाल्यार पुरो!
ग्रीनलॅण्ड हो संवसारांतलो सगल्यांत व्हडलो जुंवो. सादारण 21 लाख 66 हजार चौखण किलोमिटरांचो. 80 टक्के झेलाचो वाठार. लोकसंख्या फक्त 58 हजार.जीडीपी साडेतीन अब्ज डाॅलर. थंय तांबें, निकेल, कोळसो, झिंक, भांगर आनी हेर बरेच धातू, खनिजां आसात. गॅस, तेल आसूं येता. नुस्तेंय आसा. जलविद्युत उत्पादना खातीर एकदम बरो वाठार. ताका लागून रशिया आनी चीनाचो ताचेर दोळो आसा, अशें अमेरिका म्हणटा. पूण हें सगलें धन भायर काडप तशें खूब कठीण. कारण सैमीक वातावरण. डेन्मार्काचो हो प्रदेश, पूण स्वायत्त. ताका दरवर्सा भरपूर अनुदान मेळटा. डेन्मार्काचो राजा मुखेली. मात ग्रीनलॅण्डाचें स्वताचें सरकार आसा. प्रधानमंत्री जेन्स फ्रेडरिक नेल्सन देश चलयतात. अमेरिकेचो ह्या जुंव्याचेर ताबो नासलो तरी थंय सैन्याचो तळ, तंत्रज्ञान केंद्रां आसात. पिटूफिक अंतराळ तळ आसा. शीम सुरक्षेचे नदरेन अमेरिकेक हें गरजेचें. 1941 सावन एके कबलाती वरवीं हें सगलें चलता. आनीकूय सैनिक तळ आसले, ते पयलींच बंद केल्यात.
ग्रीनलॅण्ड विकत घेवपाचो प्रस्ताव मांडटकच, ट्रम्प करता तें- तें फक्त आनी फक्त देशहिता खातीरुच अशें मानपी समर्थकांक तो खूब आवडलो. गोल्डन डोम प्रकल्पा खातीर ग्रीनलॅण्ड जायच, अशें निमित्त ट्रम्प हांणी मुखार केलां. गोल्डन डोम म्हणल्यार अदृश्य घुमट. थंय कोणेय अणु, बॅलेस्टीक, हायपर सोनिक क्षेपणास्त्र सोडलें जाल्यार तें उपगिरे, रडारां वरवीं पयलींच कळटा आनी क्षेपणास्त्र तें हवेंतले हवेंत नश्ट करता. म्हणल्यार तीं ह्या घुमटा भितर पावचनात. इझ्रायला कडेन असलोच डोम आसा. मात तज्ञांच्या मतान ते खातीर पुराय ग्रीनलॅण्ड ताब्यांत घेवपाची गरजूच ना. सध्या थंय जें कितें आसा ताचो विस्तार करूं येता, पूण तें समाजीक, राजकी नदरेन कायदो माड्डुवपी थारतलें. ग्रीनलॅण्ड विकत वा ताब्यांत घेवप हें आंतरराष्ट्रीय कायदो, युनो संविधान, नाटो कबलात, मनीस हक्क नेमांचें उक्तेंपणी उल्लंघन थारतलें. संवसारीक शांतीकायेचेरुच न्हय, तर वेपार, नात्यांचेर परिणाम जातले. ही झुज घोशित करपा सारकीच गजाल!! ग्रीनलॅण्ड म्हणटा, आमची जमीन विकपाक, दादागिरी करपाक आमी दिवचे नात.
तरीय अमेरिकेन युरोप आनी हेर देशांक वेठीक धरून दादागिरी करपाचें थारायलेंच जाल्यार तणाव वाडूं येता. नाटो फुटूं येता. हाचो फायदो चीन, रशिया घेतलीच आनी तशें जाल्यार अमेरिका थयथयाट करतली. दशावतारी नाटकांतले लढाये सारकी. धा देशां मजगतीं जाल्ली ही लढाय मनीस जातीक मात मजा दिवचे बदला, दुख्ख, घाय दितली!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
