भांगरभूंय | प्रतिनिधी
गोंय दिव्यांग हक्क संघटणेची जागृताय कार्यावळी वेळार मागणी
पणजीः सरकार दिव्यांगा खातीर पर्पल फेस्टांचेर कोट्यांनी रुपया खर्च करता. पूण भौशीक सुवातो दिव्यांगा खातीर सुलभ नाशिल्ल्याकारणान हेर सामान्य लोकां भशेन तांकां जीण जगपाक मेळना. दिव्यांगा खातीर सुलभताय हो आता चॅरिटीचो विशय न्हय तर तांचे हक्काचो विशय देखून सरकारान सामान्य मनशां वांगडा दिव्यांगाक आस्पावन घेवपाक जाय, अशें गोंय दिव्यांग हक्क संघटणेन (ड्रॅग) हांणी मागलां.
गोंयच्यो भौशीक सुवातो आनी इमारती दिव्यांगा खातीर सुलभ करच्यो हे खातारी ड्रॅगान पणजे इन्स्टिट्यूट मिनेझीस ब्रागांजा हांगासर जागृताय कार्यावळ घडोवन हाडली. ह्या वेळार ड्रेगाचे अध्यक्ष आवेलीनो डिसा हांणी उलयतना सांगले की फाटलीं 2 वर्सा जालीं सरकार पर्पल फेस्टांचेर कोट्यांनी रुपया खर्च करता. पूण इन्स्टिट्यूट मिनेझीस ब्रागांझा (आयएमबी) ही इमारत अजूनय दिव्यांगा खातीर सुलभ करपाक सरकाराक येस येवंक ना.
मांडो आनी हे सारिकिल्ल्या कार्यावळीचो दिव्यांगजना खातीरय लाव मेळचो म्हूण आयएमबी ही इमारत सोडून दुसऱ्या थळार व्हरची अशी मागणी करपी कितलिंशींच निवेदनां आमी कला आनी संस्कृती संचालनालयाक भेटयलीं, पूण कोणाकच आमचे मागणेचें पडून गेल्लें ना. पर्पल फेस्टांचेर कोट्यांनी रुपया मोडपी सरकारा कडेन दिव्यांग आनी जाण्ट्यां खातीर आयएमबी इमारतीत लिफ्ट बसोवपा खातीर 25 लाख ना काय किते, असो प्रस्न डिसा हांणी विचारलो.
राज्यांत 8 टक्के लोकसंख्या दिव्यांग आनी जाण्टी आसा. पूण सरकारान तांचो विचार पयली करचो सोडून उसरा करता. जेन्ना तांकां त्रास जाता तेन्ना सरकार धांवपळ करता. कोट्यांनी रुपया खर्च करून नवी इमारती बांदतांत पूण त्यो दिव्यांगा खातीर सुलभ नात. हांव सगळे सरकारी अधिकारी, मंत्री आनी आमदार हांचे कडेन हातूंत लक्ष घालचें. दिव्यांग लोक लेगीत कर भरतात, अशें डिसा हांणी मागलें.
जाल्यार ड्रेगाचे वांगडी प्रकाश कामत हांणी सांगलें, दिव्यांग हो घटक आता चॅरिटी न्हय तर हक्क पांवड्यार पावला देखून दिव्यांगाक हेर सामान्या लोकां भशेन सामान्य हक्क मेळपाक जाय. 2005त जाल्ले दिव्यांग हक्क संयुक्त राष्ट्र अधिवेशनाचे निर्देश भारत सरकारान 2008 आस्पावन घेवन दिव्यांगजन हक्क कायदो 2016 चालीक लायिल्लो. ह्या कायद्या प्रमाण शारिरीक आनी मानसीक नदरेन दुर्बळ आशिल्ल्या लोकां खातीर समाजातलीं आडमेळीं पयस करपाचो हेत आसलो अशी म्हायती कामत हांणी दिली.
दिव्यांग सगल्या मळार वांटेकार जातात. पूण तांकां सुलभताय मेळना जाल्यार ते वांटेकार जांवक शकनात आनी तांकां आस्पावन घेवपाचेर प्रस्न तयार जाता. देखून तांकां हे कार्यावळींत सामान्य लोकां भशेन वांटेकार जावपाक मेळपाक जाय ते समाजाचे घटक जावन आसात, अशें कामत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
