भांगरभूंय | प्रतिनिधी
दामू नायक : भायल्यान आयिल्ल्यांनी भाजपाची विचारधारा आपणावची
भांगरभूंय । प्रतिनिधी
पणजी : हेर पक्षांतल्यान भाजपांत आयिल्ल्या कांय जाणांनी ल्हवू ल्हवू पक्षाची विचारधारा आनी शिस्त आपणावपाक सुरवात केल्या. तेचवरी हेरांनी लेगीत ह्यो गजाली आपणावप गरजेचें आसा. भौशीक सुवातांचेर उलयतना चुकीचीं विधानां करचीं न्हय, अशें भाजप प्रदेशाध्यक्ष दामू नायक हांणी आयतारा पत्रकारां कडेन उलयतना स्पश्ट कलें.
आदले उपमुख्यमंत्री मनोहर आजगांवकार आनी पेडणें भाजपा मंडळांत फाटल्या कांय दिसां सावन वाद चालू आसा. हे फाटभुंयेर नायक उलयतना नायक हांणी सांगलें, लोकशायेंत वेंचणूक लडोवपाचो वा ते संबंदांत उलोवपाचो अधिकार दरेकल्याक आसा. पूण भाजपांत शिस्तीक खूब म्हत्व आसा. पक्षाचे फुडारी, पदाधिकारी आनी कार्यकर्त्यांनी पक्षाची शिस्त पाळपाकूच जाय. फाटल्या कांय वर्सांत हेर पक्षांतल्यान जे फुडारी भाजपांत आयल्यात, तातूंतल्या खूब जाणांनी ल्हवू ल्हवू भाजपाची विचारधारा, शिस्त आपणायल्या. तेच तरेन हेरांनी लेगीत ह्या गजालींक पाळो दिवप गरजेचें आसा, अशें दामू नायक हांणी सांगलें.
पक्षाची शिस्त वा विचारधारे संबंदांत परतून परतून पक्षां भितर चर्चासत्रां, कार्यावळी जायत आसतात. अश्या कार्यावळींक सगळ्याच फुडाऱ्यांनी हाजीर रावप गरजेचें आसा, अशेंय नायक हांणी सांगलें.
पयस गेल्ल्यांक परतून सक्रीय करतले
प्रदेश भाजपाचे जडणघडणींत गोंयांतल्या सगळ्याच पोरण्या फुडाऱ्यांचें व्हड योगदान आसा. तातूंतले कांय फुडारी पक्षा पसून पयस गेल्यात, जाल्यार कांय जाण सक्रीय नात. अश्या सगळ्याच फुडाऱ्यांक परतून पक्षा कडेन जोडून फुडली वाटचाल करतले, अशें दामू नायक हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
