भांगरभूंय | प्रतिनिधी
भांगरभूंय । प्रतिनिधी
फोंडेंः शापूर-बांदोडें हांगचे भौशीक संडास फाटल्या एक म्हयन्या सावंन बंद आशिल्ल्यान ह्या वाठारांत रावपी स्थलांतरीत लोकांचे सामके हाल चल्ल्यात. तांकां उक्ते सुवातेर परसाकडेन वच्चें पडटा. बायलांची चड गैरसोय जावपाक लागल्या. बांदकाम खात्यान संडास नितळ करपी कामगाराक नियुक्त करून संडास सुरू करपाची मागणी तांणी केल्या.
मंगळारा सकाळीं बंद आशिल्ल्या ह्या संडासा कडेन जमून स्थलांतरीत लोकांनी ताांका जातात त्या त्रासाची पत्रकारांक म्हायती दिली. शापूर वाठारांत फाटल्या कांय वर्सां सावन स्थलांतरीत लोक खोपी बांदून रावतात. ते एके खाजगी सुवातेंत सैमीक विधी खातीर वताले. ताका लागून सुदिन ढवळीकार बांदकाम मंत्री आसतना तांणे ह्या लोकां खातीर 24 संडास बांदल्ले. ताची नितळसाण करपा खातीर एका कामगाराक दवोरल्लो. ताका कांय म्हयन्यां सावन पगार दिवंक नाशिल्ल्यान ताणे संडास नितळ करपाचें काम बंद केलां. ताका लागून संडास फाटल्या एक म्हयन्या सावंन बंद आसा. थळाव्या लोकांनी दिल्ले म्हायती प्रमाण सुमार 500 स्थलांतरीत लोक ह्या संडासाचो वापर करताले.
फाटल्या एक वर्सा सावन संडासाची देखरेख सारकी जायना. संडास नितळ करतालो ताका वेळार पगार मेळनाशिल्लो. संडास नाशिल्ल्यान शापूरांत खोपींनी रावपी सुमार 400 लोकांची सध्या जी गैरसोय चल्ल्या ती पयस करपा खातीर कामगाराची नियुक्ती करून तांकां थाकाय दिवपाची मागणी अब्दुल रहिम हाणे केल्या. उक्ते सुवातेर परसाकडेन वच्चें पडटा देखून बायलांक चड त्रास जातात अशें रुक्सार बेपारी हे बायलेन सांगलें. सध्या मलनिस्सारण प्रकल्पाच्या अभियंत्यांनी ह्या संडासां कडेन आडनदर केल्या. ह्या संडासा लागी कदंब बसस्टॅण्ड आसा. लोक उक्ते सुवातांनी सैमीक विधी करपाक वतात, ताका लागून दुयेंसा पातळपाची शक्यताय आशिल्ल्यान संडास परत सुरू करपाची गरज आसा अशें कवळेचो आदलो सरपंच राजेश कवळेकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
