भांगरभूंय | प्रतिनिधी
पणजी : भौशीक येरादारी बस ड्रायव्हरांची आल्कोमिटर चांचणी करपा खातीर बेगीनूच खाशेली मोहीम सुरू जातली अशें मुख्यमंत्री डॉ. प्रमोद सावंत हांणी सांगलें.
सोमारा पणजे येरादारी खात्याच्या तेराव्या रस्त्या सुरक्षेच्या सप्तकाच्या उक्तावण सुवाळ्यांत मुख्यमंत्री उलयताले. ह्या वेळार येरादारी मंत्री मॉविन गुदिन्य, संचालक प्रविमल अभिषेक, येरादारी पुलीस अधीक्षक प्रबोध शिरवयकार, मोहिमेचे मुखेली संदीप देसाय आनी हेर हजर आशिल्ले.
राज्यांतले अपघात दिसांन दीस वाडतूच आसात. गंभीर अपघातांत ८० टक्के ड्रायव्हर सोरो पियेवन आसतात अशें कळ्ळां. भौशीक येरादारी करपी बस ड्रायव्हरुय सोरो पियेवन गाडी चलयता अशें दिसून आयलां. कांय दिसां आदीं हांवें स्वता काणकोणांत असो प्रकार पळयिल्लो. त्या अपघातात प्रवाशांचो जीव गेल्लो. हाका लागून येरादारी खात्या वतीन राज्यांत तशेंच राज्या भायर बस व्हरपी बस ड्रायव्हरांची सोरो तपासणी करप गरजेचें अशें मुख्यमंत्र्यानी मुखार सांगलें.
येरादारी नेम मोडल्यार आनी तांकां पुलिसांनी धरल्यार तो मनीस राजकारण्याक फोन करून आपलो दंड माफ करपाक लायता. असल्यो गजाली बंद जावपाक जाय. म्हाकाय अशे फोन येतात. मात हांव तांकां दंडाची पुराय रक्कम भरपाचो सल्लो दिता, अशें मुख्यमंत्र्यान म्हणलें.
सरकार येरादारी सुरक्षितताये खातीर गरजेच्यो येवजण्यो राबयता. तरीय राज्यांत अपघात वाडतूच आसात. राज्यांत दिसाक ४० ते ५० रस्तो अपघात जातात. हातूंत एका मनशाक मरण येता, जाल्यार १० जाण तरी जखमी जातात. रस्त्याची सुरक्षा ही खरें म्हळ्यार वाहन ड्रायव्हरांची जापसालदारकी. सध्या राज्यांतली अपघातांची स्थिती पळयल्यार भिवपाची गरज आसा. अशेंच म्हणचें पडटलें सोरो पियेवन गाडी चलोवप बंद जावप गरजेचें अशेंय तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
