भांगरभूंय | प्रतिनिधी
पेडणें म्हाल विकास समितीची मागणी
पेडणें, प्रतिनिधी: राष्ट्रीय म्हामार्ग ६६ वेले मालपें चडटचेर असैमीक रितीन दोंगर कांपून हम रस्त्याचें काम केलां. हाका लागून पावसांत दोंगराचो दोनूय वटांनचो भाग कोसळून मातयेची रास रस्त्याचेर पावल्या. फाटल्या तीन म्हयन्यां सावन हो रस्तो पुरायेन बंद जाला. ताका लागून आदल्या राष्ट्रीय मार्ग १७ वेल्यान येरादारी वळयल्या.
आदल्या राष्ट्रीय मार्ग १७ चेर पयलीं सावनूच फोंडकुलां आशिल्ली. उपरांत अंदूं घोग्यांनी पडिल्ल्या पावसाक लागून आनी येरादारीचे गर्देक लागून त्या फोंडकुलांनी आनीक भर पडल्या. हाका लागून जड वाहनां आनी दुचाकी चलयतना चालकांचे बरेच हाल जातात. तशेंच ह्या रस्त्याचे जाल्ले अवस्थेक लागून आंगा पांग हालपा वांगडा वाहनांचेंय लुकसाण जाता.
हो देड किलोमिटराचो रस्तो भौशीक बांदकाम खातें, रस्तो विभाग, कोलवाळे हाचे खाला येता.
राष्ट्रीय हमरस्त्यार पालसणां कोसळिल्ल्यान आनी बेगीनूच परतिच्या पावसाक सुरवात जावपाची आशिल्ल्यान ऑक्टोबर पुराय जायसर तरी कोसळिल्लीं पालसणां कुशीक करून हो रस्तो येरादारी खातीर उक्तो करप अशक्य जालां. तरी येरादारी खात्यान येरादारी वळयल्ल्यान आदलो हमरस्तो बेगीनूच सारको करचो अशी मागणी पेडणें तालुका विकास समिती करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
