भौशीक बांदकाम, उदकास्रोत खात्यां मदीं समन्वय गरजेचो

भांगरभूंय | प्रतिनिधी

उदकाच्या प्रस्ना वयल्यान मंत्री रोहन खंवटे हांचो सल्लो

भांगरभूंय । प्रतिनिधी

पणजीः भौशीक बांदकाम खातें आनी उदकास्रोत खात्यां मदीं समन्वय आसप गरजेचो. तो नाशिल्ल्यान दर खेपे आमदारांक लोकांचे तिडकीक फुडो करचो पडटा. पर्वरे उदकाची समस्या सोडवपा खातीर आमी टँकर तयार दवरल्यात. बेगिनूच उदका पुरवणेचो प्रस्न सुटावो जातलो, मंत्री आनी पर्वरीचे आमदार रोहन खंवटे हांणी सांगलें.

तिळारी कानालाक खावटें पडिल्ल्यान बार्देसांत उदकाचो उणाव जाणवता आनी पर्वरीचे नळ सामकेच सुकल्यात. हे संबंदांत मंत्री खंवटे उलयताले.

भौशीक बांदकाम खातें आनी उदकास्रोत खातें हांची मदीं जे उणाव आसात ते समन्वय करून सोडवपाची गरज आसा. दरेक फावटी उदकाच्या प्रस्ना वयल्यान आमदार लोकांच्या आरोपाचे धनी जावपाक जायना. दर खात्यांतल्या अभियंत्यान हें करपाक जाय. आमी दूरदिश्टी दवरून सुरळीत उदका पुरवण करपाची मोख दवरल्या. जेन्ना हे संबंदांतले विशय येतात तेन्ना त्या खात्यांतल्या अधिकाऱ्यांनी आपलो अणभव वापरून ते जाग्यार घालपाक जाय. हे विशय परतू परतून उप्रासपाक जायना, असो सल्लो खंवटे हांणी दिला.

तिळारी कानालाक महाराष्ट्राचे वटेन खावटें पडलां. तशेंच भौशीक बांदकाम खातें आनी उदकास्रोत खातें आपल्या वेळा भायर काम करून महाराष्ट्रांतल्या कानाला वांगडाच आमठाणेचें उदक सोडपा खातीर यत्न करता. बुधवारा फांतोडेर उदक सोडून दर वराक 3770 क्युबीक मिटर उदकाचो प्रवाह सुरू जाला. शुक्रारा सांजवेळ मेरेन उदक सगळ्याक येवपाक लागतले, अशी म्हायती खंवटे हांणी दिली.

हे विशींय राजकारण जावपाक लागलां. पंच वांगडी घरा बसता, आपल्या प्रभागांत समन्वय दवरिना. कोणाकूच संपर्क करिनासतना सरकाराक दोश दीत सुटल्यात. त्या मनश्यां विशीं आपल्याक कांयच उलोवपाचें ना, अशें खंवटे हांणी म्हणलें. आपूण आमदार ह्या नात्यान जे कोण आपल्याक संपर्क करतात तांकां आपूण टँकर धाडटा. आपलो पंगड सेगीत काम करता आनी आमी सगळ्यांक हॅल्पलायन जारी केल्या. जे पंच वांगडी आमचे कडेन संपर्क करतात तांकां आमी टँकर धाडटात. सुमार 10 ते 12 टँकर आमी सेवेक दवरल्यात, अशी म्हायती खंवटे हांणी दिली.