भौशीक प्रस्न मांडचे

भांगरभूंय | प्रतिनिधी

कार्यालयांक भेट दितकच ज्यो समस्या, बेशिस्त मुखार येता, ताचेर सासणाचो उपाय नाका? मन लावन काम करपी कर्मचाऱ्यांक बडटी दिवची.

लोकांच्यो समस्या तशेंच राज्या मुखार आशिल्ले प्रस्न जाणून घेवपाक भाजपा आमदार, खासदारांनी जनसंपर्क मोहीम सुरू केल्या. जनते वांगडचें नातें तुटचें न्हय, तांच्यो सुचोवण्यो घेवन राज्याचे उदरगतींत भर घालची, हो ताचे फाटलो हेतू. राज्यांची सर्वांगी उदरगत करपाचें काम सरकार आपल्या प्रशासना वरवीं करता. तरीय कांय गजाली तातूंतल्यान सुट्टात. लोकां कडेन उलयल्यार त्यो नदरे सामकार येतात. तशे लोक दिसाळीं, सरकारा कडेन पत्रवेव्हार करून आपले प्रस्न मांडीत आसतात. मात, मुखार ताची फाटपुरवण जायना, ते प्रस्न, समस्या बरोच काळ हुमकळत उरतात. गेंड्या परस दाट कातीचीं कांय सरकारी खातीं, म्हामंडळां, तांचे मुखेली लोकांच्या समस्या कडेन सरळ आडनदर करतात. म्हणटकच आमदार, खासदारांनी लोकांक प्रत्यक्ष मेळून तांच्यो समस्या जाणून घेवप सामकें गरजेचें. मात, ते प्रस्न तीन म्हयन्यां भितर तरी सुटावे जावंक जाय. नाजाल्यार सरकार सदांच लोकांच्या दारांत येवन पसून कांयच फायदो जावचो ना. ती फक्त भोगावळ थारतली.
मुख्यमंत्री सांखळे लोकांक मेळटात. मात प्रत्येकाच्या वाड्यार भोंवून तांकां मेळप वेगळें. खासदार सदानंद तानावडे हेवूय जनसंपर्क मोहीम सुरू करपाचे आसात. तांणी सरकारी कार्यालयांक भेट दिवन थंयच्यो समस्या जाणून घेवपाचें थारायलां. सरकारी कर्मचाऱ्यांच्या विशयाचेर सहज पीएचडी करूं येता. इतलीं तासां ह्या विशयाक आसात. तांची काम करपाची पद्दत अभ्यास करपा सारकी. अर्थांत बरेच कर्मचारी, अधिकारी प्रामाणीक, मेहनती आसात. तांच्याच जिवार प्रशासनाची गाडी चलता, हेंवूय फट न्हय. सरकारी कर्मचारी (उत्तर भारतांत तांकां बाबू म्हणटात) जितले कार्यक्षम, तितलें राज्य आनी पर्यायान देश मुखार वता, हें वेगळें सांगपाक नाका. भारताक महासत्ता करतलो जाल्यार दरेकल्यान प्रामाणिक, परोपकारी आनी मेहनती आसचें पडटलें. चार- चवगांत उलयतना वा सोशल मिडियाचेर पोके झेत, बढायो मारल्यो आनी प्रत्यक्षांत आळशाच्या पाय सारके वागले जाल्यार तें देशाक मारक थारतलें. मुखार आयिल्लें काम फटाफाट हाता मेकळे करपी कितली कर्मचारी आसात. हार्ड वर्क करपी कितले आसात. आपलें काम करून दुसऱ्याक मजत करपी कितले आसात…. ह्या प्रस्नांच्यो जापो दरेकल्यान सोदच्यो. पोरू आॅगस्टांत मुख्यमंत्री डाॅ. सावंत अचकीत सरकारी कार्यालयांक भेट दिताले. ताचे पयलीं मुख्यमंत्री पर्रीकार हांणी हो प्रयोग केल्लो. आरोग्यमंत्री राणे हांणीय अदींमदीं कार्यालयांत पासय मारल्या. खरें म्हणल्यार चाळीसूय आमदारांनी म्हयन्याक एक फावट तरी गुपचूप आपल्या आनी हेर मतदारसंघांतल्या सरकारी कचेऱ्यांनी वचपाक जाय. ज्या कार्यालयांचो लोकां कडेन चड संबंद येता, थंय राज्य पांवड्या वयल्या अधिकाऱ्यांनीय पळोवणी करुंक जाय. म्हणटकच कर्मचारी, अधिकारी लोकां कडेन कशे वागतात, काम कशें करतात, कितल्यांक कामार येतात, घरा वताच, तें सगलें कळटलें.
खंयच्या कार्यालयांत चड कर्मचारी, खंय उणे, ताचेंय चित्र स्पश्ट जातलें. खंयच्या कर्मचाऱ्याक चड काम आसता, कोण चकाटां मारता, ताचोय अदमास येतलो. कार्यालयांत फेस रिडींग यंत्र, सीसीटीव्ही कॅमेरे बसयल्यात, जंय नात, थंय ते बसोवचे. ताचो दर म्हयन्याक नियाळ घेवचो. सरकारी कर्मचारी हे लोकांचे नोकर, म्हणटकच तांणी लोकांक बरी वागणूक दिवंकूच जाय. कार्यालयांक भेट दितकच ज्यो समस्या, बेशिस्त मुखार येता, ताचेर सासणाचो उपाय नाका? मन लावन काम करपी कर्मचाऱ्यांक बडटी दिवची. कामचुकारांक घरा धाडचे. तशें जाल्यारुच हेर कर्मचाऱ्यांक शिस्त लागतली आनी कार्यालयांक अचकीत भेट दिवपाचो हेतू सुफळ जातलो.
लोकां मुखार साबार समस्या आसात. पूण, भलायकी, येरादारी, वीज, उदकाची समस्या मुखेल. उत्तर गोंयांतल्यान पणजे येवप्यांक फाटलीं 4- 5 वर्सां येरादारीची समस्या सतायता. मात कोणाचें ताचे कडेन लक्ष ना. फाटलीं चार वर्सां भौशीक बसींचो आंकडो देंवला…. ताचें कोणाकूच पडून गेल्लें ना. लोकांक सारकें उदक मेळना. कांय कडेन विजेची टंचाय आसा. पूण थोड्या शारांनी, उपनगरांनी हालींच लायटीचे नवे खांबे बसोवन, झगमगाटांत आनीक भर घाल्या. गोरवांची, कोयराची, घुंवळे वखदांची समस्या सुटून सुटना. लोकप्रतिनिधी कडेन शंबरांतले 80 लोक स्वताच्यो वैयक्तीक समस्या मांडटात. गांवच्या, राज्याच्या प्रस्नाचें तांकां सोयर, सुतक नासता. गांवांनी शिक्षणाचो प्रस्न आसा, रोजगार समस्या तर चिरंतन म्हणटात तशी. तरणाटे वायट मार्गाक लागत आसात. विशाल नदर दवरून लोकांनी भौशीक समस्या जनता दरबारांत वा लोकप्रतिनिधी भेट दिवपाक येतात, तेन्ना मांडच्यो. कोणेच स्वता पुरतें पळोवचें न्हय.