भांगरभूंय | प्रतिनिधी
फाटल्या सुमानाक एके कार्यावळीक गेल्ले कडेन जिणेचो बरोच अणभव आशिल्ल्या म्हज्या एका गांवकार जाणट्या मनशाक मेळपाचो योग आयलो. हांवे ताका ‘काका’ म्हूण उलो मारतकच ताणें म्हाका म्हजी वळख विचारिल्ली. म्हजी वळख पटले बराबर ताच्या तोंडार हांसो फांकिल्लो पळोवन म्हाकाय सुखाचो अणभव आयिल्लो. म्हणटां म्हणसर ताणें म्हज्या मुखार प्रस्नांची वळेरीच सुरवात केली. विचारपाक लागलो निवृत्त जालो तर तूं? हांवे ना म्हणलें. अजून कांय वर्सां आसात. अशी जाप दिवन हांव ताच्या म्हर्यांत उबो रावलां मात, म्हणपाक लागलो, हांगा पळयले मरे पुराय हॉलांत केस पिके, साठी हुपिल्ले मनीसच वावुरतना दिसतात. मुखार ताणें म्हणलें जायत्या सुवातींनी हांव पळयतां गांवचे तरनाटेय मुखार आसतात. तेच फुडाकार घेवन वेग- वेगळ्यो सामाजीक वा भौशीक कार्यावळी घडोवन हाडटात. तरी लेगीत बरेच फावटीं तरनाट्यांचो भौशीक क्षेत्रांत दोळ्यांत भरपा सारको वावर दिसना. कित्याक काय? हीं ताचीं उतरां मात म्हज्या मनान घर करून रावलीं. हांवें चोंय वटेन नदर मारली तेन्ना काका म्हणटा तें खरें, ही गजाल म्हाका पटपाक कळाव लागलो ना. उपरांत ते कार्यावळींत म्हजें मन लागना जालें. म्हजें कान भेड्डेल्ले वरी जावन एकय उतर म्हाका आयकूंक येना जालें. ताणें जे- जे प्रस्न म्हाका केले ते म्हजे तकले वेल्यान गेले. हांगा एकय तरनाटो वावुरतना कित्याक दिसना, हो प्रस्न म्हाकाय पिडपाक लागलो आनी म्हजें विचारचक्र घुंवपाक लागले.
हांव जे कार्यावळीक हाजीर जावंक गेल्लो ती कोणाचोच पालोव घेवंक नाशिल्ले सामाजीक संस्थेन घडोवन हाडिल्ली. घडये ह्या कारणांक लागून तरनाट्यांचो आसपाव उणो आसूं येता, असो हांवें अदमास लायलो. हरशीं जेन्ना आमदार वा राजनितीक पक्ष कार्यावळी घडोवन हाडटात तेन्ना तरनाट्यांचो आंकडो हिसपा भायर पळोवंक मेळटा. कित्याक काय म्हणल्यार थंय तांची येवपा- वचपाची तजवीज केल्ली आसता. खाणां- जेवणाची, कितें जाय नाका हाचो पुराय बंदोबस्त तयार आशिल्ल्या कारणान तरनाट्यां सयत सगले पिरायेचे लोक थंय आकर्शीत जाल्ले पळोवंक मेळटात. त्या भायर जंय सरकार वा राजनितीक वा खाजगी वेवसायीक कार्यावळी पुरस्कृत करतात अशा कार्यावळींतय तरनाट्यांचो आंकडो दोळ्यांत भरपा सारको आसताच. पूण जेन्ना खंयचीय बीगर सरकारी सामाजीक संस्था कार्यावळी घडोवन हाडटा तेदे वेळार मात तरनाटे कूस मारतात. कारण तांच्या मतान असल्यो कार्यावळी म्हणल्यार ‘लो बजेट कार्यावळी’ जावन आसात. थंय वचून आमी कितें करतले अशें ते म्हणपाक लागतात.
फाटल्या म्हयन्यात पुराय गोंयांत सरकारी शिगमो व्हडा दबाजान मनयलो. कितलेशेच चले आनी चलयो तातूंत वांटेकार जाल्ल्यो पळोवंक मेळ्ळे. ताचे फाटलें कारण मागीर कितेंय आसूं. ह्या तरनाट्यांनीच आमचें संस्कृतीक दायज सांबाळून दवरूंक जाय, फुडले पिळगे मेरेन पावोवपाक जाय. आमचें दायज आनी संस्कृताय हांचें मोल कोण थारावंक शकनात. ती आमची गिरस्तकाय ही गजाल जेन्ना आमी गोंयकार जाणां जावंक पावतले, तेन्ना आमी कसल्याच प्रकारची अर्थीक अपेक्षा दवरीनासतना तांतूंत आपखोशयेन वांटेकार जातले. तेन्नाच आमचे लोककलेचो प्रसार आनी प्रचार खर्या अर्थान आमी करुंक पावतले.
शिक्षणाचे बाबतींत विचार करीत जाल्यार गोंयकार फाटीं नात. वाणिज्य, कला, विज्ञान, इंजिनीयर, वैजकी, वकिली, शिक्षण, हॉटेल आनी वेवसाय अशा साबार क्षेत्रांत तरनाटे एक- एक पावल मुखार वचत आसात. धार्मीक तशेंच सणा- परबेक लेगीत तरनाटे मुखार आशिल्ले पळोवंक मेळटात. गोंयभर तरनाट्यांचो वावर दोळे दिपकावपी असोच आसा. तरी लेगीत कांय सामाजीक कार्यावळींत तरनाट्यांचो आंकडो ‘ना के बराबर’ आसता. हें अशें कित्याक लागून घडटा हाची जाप सोदपाचो यत्न हांवें केलो तेन्ना कांय गजाली म्हज्या मुखार आयल्यो त्यो अश्यो.
जीं भुरगीं हौशी आसतात तांकां गायनाची, चित्रकलेची, संगिताची, लोककलेची आवड आसता ती आवड आपणायल्या बगर, कांय वेळ तांतूत रमल्या बगर तांकां चैन पडना म्हूण तीं कसल्या ना कसल्या कार्यावळींत वांटेकार जातात. शिगम्या वेळार हाची प्रचिती तुमकांय आयल्या आसतली. कारण खूपशे हौशी कलाकार जे रोमटां मेळांत वा लोककलेंत रंगतात ते एके वटेन आपल्या कामाचो वेळ सांबाळूनच ह्यो कला जोपासतात. आमचे संस्कतींत भर घालतात. शिगम्या दिसांनी रोमटां मेळ सुरू जावंक कळाव लागता तो भोव करून ह्याच कारणांक लागून अशें म्हाका दिसून आयलां. कारण आपलीं दिसपट्टीं कामां सोंपोवन अशा कार्यावळींनी वांटेकार जावंक ह्या कलाकारांक ऐस- पैस वच्चें पडिल्ल्यान अश्यो कार्यावळी लांबतात. तरी पूण कलेची ओड ह्या तरनाट्यांक एके माळेंत गुंथून दवरता आनी देखून ते तोखणायेक पात्र थारतात. ह्याच कारणाक लागून म्हाका दिसता हे लोक सुखी जिणेचो सुवाद चाखपाक पावतात.
हाचे उरफाटे कांय तरनाटे पुराय संवसाराचो पेज तांच्याच खांद्यार पडला असो समज करून आपली चिंतना वाडोवन घेतात आनी दुखी निरास जीण जगतात. तांकां चार चवगांत वावरूंक आवडना म्हूण घरा भायर सरनात. आपलें काम सोडून हेर कसल्याच गजालींनी ते लक्ष घालिनात. तांची असली वृत्ती ना करपा खातीर तांच्या आवय बापायक फुडाकार घेवचो पडटलो. तांकां सांगाताक घेवन घरा भायर सरून अडी अडचणींत सांपडिल्ल्या मनशांची मजत करची पडटली. सामाजीक कार्यांत तांकां वांटेकार करचे पडटले वेग-वेगळ्या क्षेत्रांत वावुरपी मनशां लागीं इश्टागत जोडून तांच्या हाता सकयल तांकां वावरूंक संद दिवची पडटली. कारण चार चवगांक मेळ्ळ्या बगर, तांकां समजून घेतल्या बगर, तांचे लागी भासा- भास केल्या बगर अशा तरनाट्यां मदीं बदल जावचो ना. ह्या तरनाट्यांक जापसालकी दिवन बरे तरेन मार्गदर्शन करीत जाल्यार सामाजीक कामां तांचे वरवी आमी करून घेवंक शकतले. होच एक गुणकारी रामबाण उपाय.
एच मनोज
9822441417
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
