भांगरभूंय | प्रतिनिधी
प्रसाद गावडे: गोमंत विद्या निकेतनाचें तिसरें पुश्प
नावेली: आनंद मेळोवप हे दरेकाचें ध्येय आसा. पूण हो आनंद मेळोवपाची दरेकाची व्याख्या वेगळी आसा. आयजकाल भौतीक सुखाकूच आनंद मेळोवप अशें समजतात. ताका लागून ताचेर पयसो जोडपा खातीर दुसरो वेवसाय सुरू जाता, अशें प्रसाद गावडे हांणी काल (शुक्रारा) गोमंत विद्या निकेतनाच्या सभाघरांत विचारवेध व्याख्यानमाळे खाला तिसरे पुश्प गुथतना ‘आनंदाचे अर्थकारण’ ह्या विशयाचेर उलयतना सांगलें.
सैम जैन्ना ऋतू बदलता तेन्ना त्या ऋतू बदलाचो उत्सव म्हणून मीनस विवीध उत्सव मनयता. संवसारपाडवो, महाशिवरात, होळी बी परब आमी मनयतात, ते ऋतू बदलाचे उत्सव आसात. ऋतू बदलप म्हणल्यारूच जिणेचो उत्सव मनोवप. हो उत्सव मनयतना आमी सैमाचे गणीत कितें आसा तें समजून घेतात. सैम हें व्हड विद्यापीठ आसा. स ऋतूंचे स सुवाळे हो जिणेचो खरो आनंद घरा बसून मेळना जाल्यार तो अणभवपाक सैमा कडेन जुळोवन अणभवून मेळटा. हो आनंद मेळोवपाचो आसत जाल्यार ते खातीर सगल्यांत व्हड साधन आसा तें म्हणल्यार गांवची जीण जगप अशें प्रसाद गावडे हांणी सांगलें.
सैम वाटयात हें संवसारीक फॅड जालां. प्लास्टिकाच्यो चार बाटल्यो उबारप म्हणल्यार सैम वाटावप न्हय. आमी जी जिणेशैली जगतात ती कितली पर्यावरणपुरक आसा हें अदीं सगल्यांनी समजून घेवप गरजेचें आसा. गांवगिऱ्या वाठारांतले कुणबी, गावडा ही जमात पर्यावरणीय प्रणालीचो एक भाग आसा.
विकासाच्या नांवा खाला पर्यावरण नश्ट जायत आसा. यंत्राच्या जगण्यांत आनंद विकतात. भांडवलशायेच्या आयच्या युगांत पयशे मेळोवपा खातीर आमी जगपाचो खरो आनंद व्हगडावन बसल्यात. पूण समाजान जांकां मागास, गरीब म्हूण हिणयलें तीं मनशां खऱ्या अर्थान जीण जगतात. समाजान जरी हाची दखल घेतली ना तरी फुडारांत ह्याच मनशांची जीण ही जीण म्हणूंक येतली. आमी सगल्या तरांच्या यंत्रणाची जीण जगत आसात, अशेंय तांणी आपल्या उलोपांत सांगलें.
फाल्यां विचारवेध व्याख्यानमाळेचे चौथे पुश्प मानसी प्रसाद गुथतल्यो. तांच्या व्याख्यानाचो विशय ‘किपींग इट क्लासीकल: द रेलवंस ऑफ म्युजीक इन अवर टायम’ हो आसतलो. व्याख्यान सांजे स वरांचेर सुरू जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
