भांगरभूंय | प्रतिनिधी
पावसाचें आगमन जालां. सैम झाडां, पेडांनी फुलून गेला. परमळीत फुलांनी सगल्यो वेली भारेवन गेल्यात. वाऱ्या वांगडा फुलांचो सुगंध चारुय वटेन व्हांवत आसा. जळीमळी पावसाचें उदक व्हांवता. जमनीचेर पाचवेचार हरयाळीचो गालिचो पळोवन मन सामकें धादोशी जाता. धर्तरीमाय सोनेरी बुटे आशिल्लो पाचवो शालू न्हेसून शांत न्हिदल्या असो भास जाता.
ह्या दिसांनी न्हंयो, बांयो, झरी काठोकाठ भरून व्हांवतात. दोंगर माथ्या वयल्यान दुदाचे फेसाळ घसघशे सकयल कोसळटात. तें पळोवन मन पिशें जाता. हजारांनी तरणाटे त्या उदकांत न्हांवपाक वतात. तांचे उमेदीक शिममेर नासता. इंद्रधनुश्यी रंगाचो पिसारो फुलोवन मोर रानांनी, शेतांनी नाचता. ताचें दर्शन फक्त पावसाच्या दिसांनीच जाता. बेबक्यांचेंय सुरात गावप आयकूंक येता. ल्हान भुरगीं तर विचारूंच नाकात. आंगणांत भरिल्ल्या उदकांत ल्हान- ल्हान कागदीं व्हडीं सोडटात.
पावसाक भोवरुपी म्हणटात. मनोहारी, नयनरम्य पावस धो धो पडत रावता. एकेकदा वत आनी पावसाचो खेळ चलता. केन्ना दोन, तीन दीस पावस दडी मारून बसता. ताचीं अशीं अनेक रुपां. मनशाक भुरळ, मोनेळ पडलो ना, तर अजापूच.
शेतकार खोशयेन पावसाक येवकार दिता. ताचे नदरेन पावस म्हणल्यार राजा. पावसाक लागून ताका पीक घेवपाक मेळटा. तो पावस पडून माती ओली जाली काय बैल, नांगर घेवन शेतांत देंवता. कामाक लागता. तीन म्हयने कश्ट करून भात पिकयता.
पावसाच्या दिसांनी ताळखिळो, कुड्डूक, आळूं, तेरें तकली वयर काडटात. केन्ना एकदां ह्या भाजयांचो सुवाद घेता अशें आमकां दिसता. ह्यो पावसाळी भाजयो खावपाक एकदम रुचीक, पुश्टीक. पणसाचीं भिकणां घालून केल्यार खूबच घोस्ताक वतात. पावसाच्या दिसांनी रांदपाचो वास वाडोभर पातळटा. मागीर तीं गरमागरम भजीं जांव. भजीं आनी वांगडा हुनहुनीत दुदाची च्या पिवप म्हणल्यार सर्गसुख. घो घो करून पावस घालून घेता तेन्ना मेथयांची पेज भुरकावप हाचे सारकें भाग्य ना.
पावसाच्या दिसांनी पानां पानांतल्यान टप टप गळपी थेंब पळोवन, तांचो आवाज आयकून मोगी आनी मोगिकेच्या मोगाक उधाण येता. पावस म्हणल्यार चैतन्य, पावस म्हणल्यार राजा. थंडसाण, रिमझीम, शिरशिरपी पावस आंगार घेतना ओठांचेर गीत येता…. रिमझीम गिरे सावन, सुलग सुलग जाये मन, भिगे आज इस मौसम मे, लगी कैसी ये अगन…
सिद्धी तिळवे
9158200956
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
