भांगरभूंय | प्रतिनिधी
गोंयच्या राजकी मळाचेर प्रभावी आनी लोकप्रीय अशे फोंडेंचे आमदार, कृशीमंत्री रवी नायक हांकां आयज आमचे मदल्यान वचून बारा दीस जातात. तांच्या राजकी जिणेची सुरवात एक नगरसेवक म्हूण जाली. मागीर कालांतरान ते गोंयचे मुख्यमंत्री, उपमुख्यमंत्री, गृहमंत्री, खासदार जाले. साबार व्हडलीं पदां तांणी सोबयलीं. ते भोवजन समाजाचे सध्याचे आघाडेचे फुडारी आशिल्ले. गोरगरीब लोकांचे आधार आशिल्ले. सगल्या धर्माच्या लोकांक, विरोधकांकूय ते मानान वागयताले. राजकी मळाचेर आपलो वेगळो ठसो तांणी उमटयला. स्वकर्तृत्वाचेर तांणी आपली कारकीर्द उबारली. स्वकर्तृत्ववान अशे ते फुडारी. रवीबाबान चार दशकां परस चड काळ गोंयच्या राजकारणांत सक्रीय भुमिका केली. दोन फावटी मुख्यमंत्रीपद सांबाळ्ळें. फोंडेचे ते सगल्यांत कर्तृत्ववान फुडारी.
शहरी आनी गांवगिऱ्या वाठारांतल्या बांयलांची उदरगत जावची म्हूण तांणी बरेच उपक्रम चालीक लायले. आपमजत गट उक्ते करून तांकां मजतीचो हात दिलो. आयज फोंडे मतदारसंघातल्यो बऱ्योच बायलो स्वताच्या पांयांचेर उब्यो आसात. रात दीस कश्ट करतात. बायलांचे मेळावे घेवन तांणी बायलां सशक्तीकरणाचो यत्न केलो. घर, वित्त, भुरग्यांचो विकास, शेतकी विकासाचेर तांणी भर दिलो. गोंयचो सर्वांगी विकास हेंच तांचें ध्येय आशिल्लें.
कुळ मुंडकार कायदो संघटना तांणी स्थापन केली. कसता ताची जमीन उरतली, ताचें घर ताका मेळटलें, अशे दोन कायदे तांणी हाडले. चौदा वर्सां ते मुंडकारां खातीर वावुरले. निमणें जैत तांचेंच जालें. गोंयांतली गुंडगिरी मोडून काडपाक रवीबाबान योगदान दिलां. व्हडल्या गुंडांक तांणी भारतीय सुरक्षा कायद्या खाला बंदखणींत धाडल्यात. भंडारी समाजाचो हो पयलो फुडारी. समाजाची संख्या खूब व्हडली. तांचे मदीं एकी घडोवन हाडपाचें काम रवीबाबान केलें.
तांच्या मरणाक लागून गोंयचो एक दूरदृश्टी आशिल्लो, गरिबांची कळवळ आशिल्लो फुडारी आमी वगडायला. तांचे फुडारपण राजकी मळाक प्रेरणा दिवपी आसा. तांकां आर्गां.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
