भांगरभूंय | प्रतिनिधी
सहाय्यक म्हायती अधिकारी श्याम गांवकार हांकां सांगे- केपे पत्रकार संघटणेचो गजानन शेणवी बोरकार स्मृती ‘पत्रकार मित्र’ पुरस्कार जाहीर जाला. हो पुरस्कार शेनवार, 2 ऑगस्टाक, संघटनेच्या 42 व्या वर्धापन दीस सुवाळ्यांत भेटयतले.
कारापूर -सांखळी सारक्या गांवगिऱ्या वाठारांत रावून श्याम गांवकार हे पत्रकारिते वांगडाच स्तंभलेखक आनी समालोचक म्हणून गोंयांत नांवाजिल्ले आसात. सरकाराच्यो येवजण्यो आनी वावर तळागाळांत पावोवपाचें काम ते पणजी आकाशवाणी आनी गोवा दूरदर्शना वयल्यान करतात. कोविड काळांत गोंयांत आडकून पडपी हेर राज्यांतल्या लोकां खातीर सरकारान चालीक लायिल्ले मोहिमेत श्री. गांवकार हांणी ऑडियो-व्हिज्युअल माध्यमांचो उपेग केल्लो. कोरोनाच्या विशयाचेर डॉ. एडविन गोम्स हांची तांणी घेतिल्ली मुलाखत त्या काळांत चर्चेंत आशिल्ली. कोविड काळांत सरकारान तांकां ‘कोवीड वॉरियर’ म्हूण भोवमान केल्लो.
श्याम हे एक सुत्रसंचालक, निवेदक, नाट्यकलाकार, दिग्दर्शक, निर्मातो, समाजीक वावुरपी अशें भोवआयामी व्यक्तीमत्व.
सहाय्यक म्हायती अधिकारी म्हणून काम करतना तांणी आपलें लिखाण सोडलें ना. कोंकणी, मराठी, हिंदी, आनी इंग्लीश भाशांनी तांणी बरप केलां. कोंकणी विनोदी नाटक ‘शेवटाक जालें मरे’ (2012) आनी ‘व्हायरस आॅफ फियर’ (2025) अशीं दोन पुस्तकां उजवाडाक आयल्यांत. तांचीं ‘मनवेध’ आनी ‘अविरत’ हीं दोन मराठी निबंद पुस्तकां उजवाडाक येवपाचीं आसात.
श्याम हांचें मुळावें शिक्षण श्रीकेळबाय वाडो, मयेच्या सरकारी मुळावे शाळेंत जालें. तांणी कारापूरच्या ज्ञानज्योती हायस्कुलांतल्यान धावे मेरेनचें शिक्षण पुराय केलें. सांखळेच्या सरकारी उच्च माध्यमीक शाळेंतल्यान बारावी मागीर सांखळी सरकारी म्हाविद्यालयांतल्यान पदवी मेळयली. गोंय विद्यापिठांतल्यान कोंकणींतल्यान एम.ए., आनी उपरांत कोल्हापूरच्या शिवाजी विद्यापिठांतल्यान समाजशास्त्रांत एम.ए., पुण्यांतल्या टिळक विद्यापीठांतल्यान पत्रकारितेंत पदव्युत्तर पदवीय मेळयली. ताच्या ह्या शिक्षणाक लागून ताच्या भाग्याचो विस्तार जालो. श्याम हांणी 1994 वर्सा ‘तरुण भारतां’तल्यान ग्रामीण पत्रकार म्हणून पत्रकारितेची सुरवात केली. उपरांत पूर्णवेळ ‘वाणिज्य प्रतिनिधी’ म्हूण कामाक लागले. 2006 वर्सा ते म्हायती आनी प्रसिद्धी खात्यांत म्हायती सहाय्यक जाले.
तांणी पणजी आकाशवाणी, गोवा दूरदर्शन आनी हेर माध्यमां खातीर निवेदक म्हूण काम केलां. सांखळी पत्रकार संघाचे ते आदले अध्यक्ष आनी दिवचल पत्रकार संघाचे आदले वांगडी. अ. गों. ग्रामीण पत्रकार संघटनेचे सल्लागार म्हणून ते वावुरतात. हाचे भायर राज्यांतल्या विविध संघटनां कडेन ताचो संबंद आसा. श्याम हांणी निवेदक म्हणून राश्ट्रीय खेळां सर्ती खातीर, आंतरराश्ट्रीय चित्रपट महोत्सवां खातीरय काम केलां. वेंचणुकेचे आनी समाजीक संबंदीत कार्यावळींचें तांणी सुत्रनिवेदन केलां.
वेवसायीक नाटकांचें दिग्दर्शन, अभिनय आनी सादरीकरण करून श्याम गांवकार हांणी तोखणाय मेळयल्या. श्याम गांवकार हांकां नेहरू युवा केंद्राचो जिल्लो युवा पुरस्कार, कोविड वॉरियर प्रमाणपत्र आनी हेर पुरस्कार मेळळ्यात. सांगे- केपे पत्रकार संघटणेचो ‘पत्रकार मित्र’ पुरस्कार मेळयिल्ले खातीर तांकां परबीं.
प्रकाश नायक, शिरोडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
