भांगरभूंय | प्रतिनिधी
पणजी : भोम गांवांतल्यान प्रस्तावीत राष्ट्रीय महामार्ग चारपदरीकरणाचे फाटभूंयेर निर्माण जाल्लो वाद मिटोवपा खातीर मुख्यमंत्री डॉ. प्रमोद सावंत हांणी आयज मंत्रालयांत ग्रामस्थांच्या शिश्टमंडळा कडेन चर्चा केली. हे बसकेंत तांत्रीत समिती वरवीं महामार्ग प्रकल्पाचो सविस्तर आराखडो ग्रामस्थां मुखार मांडलो. हो प्रकल्प पुराय पारदर्शकपणान राबयतले. तशेंच फकत चार घरांक हाचो फटको बसतलो. त्या घरांचें पुनर्वसन जातलें. तशेंच खंयच्याच धर्मीक थळाक कसलेच तरेचो धपको बसचो ना, अशें मुख्यमंत्र्यानी ह्या वेळार म्हणलें.
ह्या प्रकल्पा विशीं ग्रामस्थां मदीं गैरसमज निर्माण जालो आनी तो पयस करपा खातीर अभियंते प्रत्यक्ष गांवांत वचून ग्रामस्थां मुखार मेजणी करतले. हाका लागून कोणाचेंच लुकसाण जायनासतना रस्त्याचें काम जातलें असो आशावाद तांणी उक्तायलो.
आमकां बायपासूच जाय : भोमकार
मजगतीं, तांत्रीक समितीच्या सादरीकरणा उपरांतूय ग्रामस्थांनी आपली भुमिका बदलूंक ना. फ्लायओव्हर नाकाच, आमकां बायपासूच जाय, असो आग्रो ग्रामस्थांनी केला. तशेंच अभियंते चुकीची म्हायती दिता असो आरोपूय तांणी केलो.
ग्रामस्थांच्या म्हणण्या प्रमाण, सादर केलेल्या नकाशांत वस्तुस्थिती लिपयिल्ल्यान प्रत्यक्षांत रस्तो देवळा लागसारच्यान वतलो. हाका लागून धर्मीक थळांकूच धोको निर्माण जातलो. तशेंच, गांवाच्या मदल्यान वचपी महामार्गाक लागून शाळा, बाजार आनी इतिहासीक दायज थळांचेरूय परिणाम जातलो असो ग्रामस्थांचो दावो आसा.
फाल्यां अभियंत्यां कडल्यान प्रत्यक्षांत मेजणी आनी माप घेतले. हाचे उपरांतूच ग्रामस्थांचे दुबाव पयस जातले, अशे अपेक्षा सरकारी यंत्रणेन उक्तायल्या. मात, ग्रामस्थांचो विरोध कायम आशिल्ल्यान प्रशासन आनी नागरिकां मदीं समन्वय सादप हेंच सध्या मुखेल आव्हान आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
