भांगरभूंय | प्रतिनिधी
बांदकाम खात्याचे अभियंते आनी पंचायत मंडळा सयत खाशेली ग्रामसभा घेवपाचोय थाराव
भांगरभूंय । प्रतिनिधी
फोंडें: भोम गांवांतल्या लोकांनी बायपास रस्त्या खातीर आयतारचे ग्रामसभेंत आक्रमक जावन परतून बायपास रस्त्याचे मागणेचो थाराव घेतलो. राष्ट्रीय म्हामार्गा संबंदांत म्हायती दिवचे खातीर बांदकाम खात्याचे अभियंते आनी पंचायत मंडळा सयत खाशेली ग्रामसभा घेवपाचो म्हत्वाचो थाराव लोकांनी घेतलो. पंचायत कार्यालयांत सुवात उणी पडपाक लागिल्ल्यान लोकांचे मागणे प्रमाण कार्यालया भायर उबे रावून म्हत्वाचे थाराव घेतले.
सरपंच दामोदर नायक हांचे अध्यक्षते खाला आयतारा ग्रामसभा घेतली. त्या वेळार सचीव विराज नायक आनी हेर पंच वांगडी हाजीर आशिल्ले. तातूंत दरेकल्याक बांदकाम खात्या कडल्यान नोटीस मेळिल्ल्यान चडांत चड लोकांनी हाजेरी लायिल्ली.
बायपास रस्त्याची मागणी करपी भोम गांवांतल्या लोकांनी आयतारा सकाळीं परतून आक्रमक भुमिका घेवन राष्ट्रीय म्हामार्ग संबंदांत बांदकाम खात्याच्या अभियंत्या कडल्यान पुराय म्हायती दिवचे खातीर खाशेली ग्रामसभा घेवपाचो थाराव ग्रामसभेंत घेतलो. तशेंच पंचायत मंडळान बायपास रस्त्या खात्यार थळावे आमदार तशेंच मंत्री गोविंद गावडे हांचे कडेन चर्चा करपाचो थाराव लेगीत लोकांनी घेतलो.
ह्या वेळार पंचायत मंडळान लोकां वांगडा रावपाचो निर्णय जाहीर केलो. घोग्यांनी पावस पडिल्ल्यान ग्रामसभा ल्हान आशिल्ल्या पंचायत कार्यालयांत सुरू केली. पूण चड संख्येन आयिल्ले लोक कार्यालया भायर उरिल्ल्यान अखेर ग्रामसभा कार्यालया भायर घेवपाची मागणी केली. पावसान आसोर केल्ल्यान पंचायत मंडळान कार्यालया भायर वचून ग्रामसभा घेतली. ताका लागून लोकांनी समाधान उक्तायलें.
संजय नायक हांणी 14 फेब्रुवारीक जाल्ले ग्रामसभेंत राष्ट्रीय म्हामार्ग संबंदांत पंचायतीन म्हायती दिवपाचो थाराव घेतिल्लो. ते प्रमाम पंचायतीन म्हायती मेळयल्या. आयतारा जाल्ले ग्रामसभेंत परतून बायपास रस्त्याची मागणी करपाच थाराव घेतलो. थळावे लोक आपल्या मागण्यांचे ठाम आसा, सरकारान हे संबंदांत गांभिर्यान लक्ष दिवपाची गरज आशिल्ल्याचें सांगलें.
सरपंच दामोदर नायक हांणी सांगलें, पंचायत मंडळ लोकां वांगडा आसा. तांचे मागणे प्रमाण आयज मेरेन फाटपुरवण केल्या. आयतारा जाल्ले ग्रामसभेंत खाशेली ग्रामसभा घेवपाच्या थारावा वांगडाच थळावे आमदार तशेंच मंत्री गांवडे हांचे वांगडा पंचायत मंडळ चर्चा करतले, अशें तांणी सांगलें.
सरपंच म्हणटा उड्डाण पूल बांदतले
भोमा राष्ट्रीय म्हामार्गाचें रुंदीकरण करतले, अशी म्हायती लोकांक बांदकाम खात्यान दिल्या. पूण आयतारा सरपंच दामोदर नायक हांणी ग्रामसभेंत मेळिल्ल्या कागदपत्राच्या आदाराचेर भोमा उड्डाण पूल बांदतले अशें सांगिल्ल्यान ग्रामसभेंत हाजीर आशिल्ल्या लोकां मदीं घुस्पागोंदळ निर्माण जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
