भांगरभूंय | प्रतिनिधी
फोंडें : भोमाच्या राष्ट्रीय महामार्गार बिरेस्तारा रातीं गाडी आनी दुचाकी मदीं अपघात जालो. गाडयेन दुचाकीक धपको दिल्ल्यान रायू धुरी (७५, चोडण) हो जखमी जालो. जाल्यार दुचाकी फाटल्यान बशिल्ली मंदाकिनी धुरी (६६, चोडण) हिचेर गोमॅकोंत उपचार सुरू आसात. म्हाड्डोळ पुलिसांनी अपघाताचो पंचनामो केलो.
मेळिल्ले म्हायती प्रमाण, बिरेस्तारा रातीं जीए- ०७-एए- ५५९२ क्रमांकाची दुचाकी म्हाड्डोळच्यान पणजेचे दिकेन वताली. इतल्यान दुचाकेचेर फाटल्यान जीए – ०५- एफ -४७७७ क्रमांकाचे गाडयेचो धपको बसलो. दुचाकी वयलीं दोगांय रस्त्यार पडलीं. जखमींक गोमॅकोंत दाखल केलें. रायू धुरी हाचेर उपचार करून ताका घरा धाडलो. जाल्यार मंदाकिनी धुरी हिचेर उपचार सुरू आसात. निरीक्षक योगेश सावंत हे विशीं तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
