भांगरभूंय | प्रतिनिधी
कें द्रीय म्हामार्ग मंत्री नितीन गडकरी हे स्पश्ट वक्ते. ते उलयतात तेन्ना तांचे भितर मनीसपण दिसता. येद्या व्हडल्या पदार आसुनूय तांचे पांय जमनीर आशिल्ल्याचें दिसता. लोकां विशीं तळमळ दिसता. मोग-माया ही तांचे भितर भरभरून दिसता आनी सगल्या जाती धर्माक बरोबर घेवन वचपाची खरी भावना दिसता. अशा राजकी फुडाऱ्यान राज्य, देशाचें फुडारपण करचें, तांचे बरोबर बऱ्या विचारांचे मनीस चलतलेच चलतले.
मगो पक्षाचे फुडारी आनी वीज मंत्री सुदिन ढवळीकार हे तांचे बरे इश्ट अशें म्हणटात. 2019 वर्सा जेन्ना शिरोडें मतदारसंघांत पोटवेंचणूक जाली तेन्ना युतींत आशिल्ल्या मगो पक्षान ह्या मतदारसंघांतल्यान वेंचणूक लडयली. तेन्ना नरेंद्र सावयकार हांच्या लोकसभेच्या प्रचारा खातीर आयिल्ले नितीन गडकरी हांणी गोंयचे उदरगतीची वळेरी वाचतना, ढवळीकार भावांचो राजकी फुडार सोंपोवपाचो उलो मारिल्लो. हो उलो मारतनाय ते हांसताले आनी हांसून हांसून ढवळीकार भावांक चिमटे काडटाले. 2022२ चे वेंचणुके उपरांत सुदिन ढवळीकार परतून भाजपाच्या मंत्रीमंडळांत पावले ही लोकां खातीर अजापाची गजाल आशिल्ली.
नितीन गडकरी हे स्पश्ट वक्ते आशिल्ल्यान तांणी पक्षांतराचेरय भाश्य केलां आनी अशे प्रकार आडावपाचें फक्त लोकांच्या हातांत आसा अशें गोंयांत आयिल्ले कडेन आदीं म्हणलां.
फाटल्या सप्तकांत ते गोंयांत आयिल्ले तेन्ना तांणी ‘रिंग रोडा’ विशीं उलयतना, खंयचोय रस्तो जावचे आदीं तो खंयच्यान खंयच्यान वता हाची वासपूस काडपाक आपले कडेन राजकारणी येतात, कारण तांकां थंय जमनी घेवपाच्यो आसतात अशें तांणी स्पश्टपणान सांगलें. ‘टोपी फीट बसली असेल तर माफ करा’ अशें गोंयचे विशीं उलयतना तांणी म्हणलें. हाचो अर्थ गोंयांतय बी अशें जाता जाल्यार आपणें जें उलयलां ते खातीर आपल्याक माफ करात अशें हो येदो व्हडलो राजकारणी सांगता. तांच्या ह्या उतरांतल्यान ‘नम्रपणा’ दिसतात. आमच्या गोंयच्या राजकारण्यां मदीं अशीं नम्रपणां दिसतात?
‘किटली पेक्षा चहा गरम’ अशें म्हणत ते राजकारण्यांच्या खाजगी सहाय्यकां (पीए) विशींय सांगतात. पीएंक कितलो मद आसता आनी ते सत्तेचो वापर कशे करतात हेंवूय ते सांगतात. इतलेंच न्हय तर ह्या मंत्रीपदां भितर कांयच आसना, ज्या दिसा सत्ता वता त्या दिसा आशीकुशीक आशिल्ले सुरक्षा रक्षक, सरकारी अधिकारी, गाडी, सगलें एका खिणाक ना जाता हाचेरय ते बिंधास्त उलयतात. खंयच्याय राजकारण्याक तांचो राग येवचो अशे ते हांसून हांसून सत्यस्थिती सांगतात.
पयर ते ज्या ‘टोपये’ (टोपी फीट बसली असेल तर माफ करा) विशीं उलयले, तें गोंयां खातीर नवें न्हय. मोपा वांठारांत विमानतळ जावपाचो आसा म्हूण कळटकच कितल्याशाच जाणांनी थंय जमनी घेतल्यो आनी आतां जेन्ना प्रेस बरो मेळटा तेन्ना ते विकपाक लागल्यात. ते मागीर त्यो दिल्लीकारांक विकतात काय आनीक कोणाक ताचो नेम ना. जमनी विकूं नाकात म्हूण सांगपी राजकारणीय गोंयांत सांपडटले. विचार खूब बरो आसा, कित्याक एकदां विकिल्ली जमीन परतून मेळप कुस्तार. पूण आमच्या खंयच्या राजकारण्यां कडेन विकत घेतिल्ली जमीन ना? हे जल्मतनाच इतले पयशेकार आशिल्ले की लाखांनी चौखण मिटर जमीन, हॉटेलां, सभाघरां हांच्या नांवांर जालीं वा दुसऱ्यांच्या नांवार करून दवरलीं!!! कांय जाण आमदार जावचे आदीं गांव इबाडटलो अशें आड्डून भुंयखंडां कडेन वचपी सरकारी रस्ते आंदोलनां करून आडायताले, अशे राजकारणी लेगीत आयज ‘मालामाल’ जाल्यात आनी त्या भुंयखंडां मेरेन रस्ते पावल्यात.
फाटल्या कांय वर्सां सावन भोम गांवचे लोक आपली परंपरा, गांव, संस्कृती, भक्तीमय वातावरण, देवळां वाटावपाचो उलो मारून आंदोलनां करतात. गांवचें विभाजन करून म्हामार्ग व्हरचे परस, शेतांतल्यान बायपास व्हरात अशी मागणी लोक करतात, तेन्ना तांकां मात आमचे राजकारणी भितर उडयतात, नांवां दवरतात. हो विशय नितीन गडकरी हांचे कडेन लेगीत पावलो. मात आमच्या गोंयच्या वेंचीक राजकारण्यांक हो रस्तो भोमा गांव पाड घालूनच व्हरपाक जाय. कित्याक? नितीन गडकरी म्हणटा ती ‘टोपी’ हांगां फीट बसल्या. हे वटेच्यान आशिल्ले जमनीचेर ‘प्रकाश’ पडला? म्हामार्ग जातकच ती धा पटीन मायज प्रेसान विकपाची आसा?
कसलीच नितीमत्ता नाशिल्ले आमचे कांय राजकारणी नरकासूरा परस पाश्ट जाल्यात. फायदो आसता तेन्ना हांचे मदले दुस्मान -दुस्मान एक जातात आनी लोकांक चिड्डितात हें भोमाच्या ह्या पुराय प्रकरणा वयल्यान दिसून येता. मेल्ल्यांचो आंगठो काडून जमीन बळकावपी, आंदोलनां करून बिल्डरां कडेन ‘एक्स्टोरशन’ करपी, अशा नरकासूरांचो उणाव ना. पूण अशा व्यक्तींचो खरो चेरो नितीन गडकरी वळखना काय? काय तांची दिशाभूल करप चालूच आसा?
भोमा गांवांत आशिल्ल्या श्रीसांतेरीच्या देवळांत स्वयंभू रोयण आसा. ती वाडत आसता. फाटलीं वीस वर्सां हांव ह्या वांठारांतल्यान पासार जातां. केन्नाय रातचो उसरां जाल्यार आकाशवाणीची ड्युटी करपाक फांतोडेर पांचांक वता. फांतोडेर वतना ह्या देवळा कडलो वांठार, फांतोडेर उक्तें जावपी हॉटेल, काल्याक जावपी गर्दी, न्हिदेचो भार कुशीक दवरून गाड्याचेर च्या करून दिवपी जग्गू, हें सगलें चित्र म्हज्या दोळ्यांत आसा आनी श्रीसांतेरीक हॉर्न मारून मुखार वचपाची परंपरा आयजूय चालूच आसा. हे वटेच्यान म्हामार्ग जालो जाल्यार हें सगलें नश्ट जातलें. हे खातीरच घडये आदले केंद्रीय संरक्षण मंत्री सर्गेस्त मनोहर पर्रीकार हांणी हांगाच्या लोकांक हो म्हामार्ग भायल्यान व्हरपाचें उतर दिल्लें. पूण पर्रीकाराच्याय उतराचो मान आमचे राजकारणी दवरनात. ‘ऑपरेशन सिंदूर’ जातकच देशाच्या संरक्षण यंत्रणांची म्हायती दिवपी ‘आर्टवर्क’ जारी जालें. ताचेर पर्रीकार हांचो फोटो वापरिल्लो. तांणी भोमकारांक दिल्लें ‘उतर’ खरेपणांत हाडूनय अशी बरी गजाल करूं येता. हातूंतल्यान आमचें हिंदुत्व, परंपरा, संस्कृती जिवी उरतली.
मुखेल म्हणल्यार, सोशल मिडियाचेर हिंदुत्वाच्यो गजाली करपी आनी आपल्या विचारा विरोधांत उलोवपी लोकांच्या मतांचेर हल्लो करपी, एकलीय व्यक्ती भोमकारांक तेंको दितना दिसली ना. घडये तांकां हांगां देव आनी देवी आसा हें दिसच ना. दिशिल्लें जाल्यार ते भोमा येवन भक्तीच्या संरक्षणाचे शंख वाजोवपाचे, दर्यादेगांचेर आरत्यो सोडून भोमा येवन आरत दाखोवपाचे. हें सगलें ते करचे नात, कारण तांकां ‘आदार’ दिवपी राजकारण्यांक हो म्हामार्गा भोमा गांव काबार करूनच व्हरपाक जाय. एक मात खरें, भोमाच्या संस्कृतीचेर घाव घालतल्यांक देवी सोडची ना!!!
संजय बोरकार
9921343430
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
