भांगरभूंय | प्रतिनिधी
फोंडें: भोमा गांवच्या लोकांनी आयतारा परतून एकठांय येवन बायपास रस्त्याची मागणी केली. फाटल्या कितल्याश्याच वर्सां सावन थळावे लोक बायपास रस्त्याची मागणी करतात. विधानसभा अधिवेशन चालू आशिल्ल्यान सरकारान थळाव्या लोकांची दिशाभूल करचे परस भोमा संबंदांत स्पश्ट धोरण जाहीर करचें, अशी मागणी थळाव्या लोकांनी केल्या.
संजय नायक हांचे अध्यक्षते खाला बायपास रस्त्या खातीर आयतारा बसका घेतली. त्या वेळार 50 परस अदीक लोक हाजीर आशिल्ले. भोमा गांवांतलीं फक्त तिनूच घरां वतलीं अशें सांगपी सरकार गांवांतलीं 100 परस अदीक घरां मोडपा खातीर तयार जालां. ताका लागून खुबळिल्ल्या लोकांनी विधानसभा अधिवेशनांत सरकारान धोरण स्पश्ट करपाची मागणी केल्या.
थळावी पंचायत लेगीत लोकांची दिशाभूल करता. सरकाराच्या धोरणा प्रमाण भोमा गांवांतल्या सुमार 100 परस अदीक घरांक धोको निर्माण जाला. ताका लागून विधानसभा अधिवेशनांत भोमाच्या प्रस्नाचेर सरकारान धोरण स्पश्ट करून लोकांच्या मनांतलो भंय पयस करपाची मागणी लोकांनी बसकेंत केली. संजय नायक हांणी अदीक म्हायती दितना थळावी पंचायत तशेंच सरकार भोमाच्या विशया वयल्यान दिशाभूल करता, अशें सांगलें. सरकारान आयज मेरेन भोमा गांवांतल्या लोकांची दिशाभूल केल्या, पूण सरकारान तयार केल्लीं सगळीं कागदपत्रां लोकांच्या हाताक मेळ्ळ्यात. फक्त तीन घरां वतलीं अशें सांगपी सरकार 100 परस अदीक घरा मोडपाची प्रक्रिया करता. ताका लागून भोम गांवाचें अस्तित्व धोक्यांत आयलां. विधानसभा अधिवेशनांत सरकारान धोरण स्पश्ट केलें ना जाल्यार थळावे लोक फुडली कृती करपाक तयार आसा, अशें तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
