भांगरभूंय | प्रतिनिधी
लखनौ, खबरां संस्था ः भोपाळ विमानतळाक बॉम्ब घालून उडयतले अशी धमकी दिल्या. भोपाळाच्या राजा भोज विमानतळा सयत दिल्ली, जयपूर, अहमदाबाद, लखनौ, पाटना, आगरतळा, गुवाहाटी, जम्मू, औरंगाबाद, बागडोगरा आनी कालिकत विमानतळांनीय ईमेल वरवीं बॉम्बस्फोटाची धमकी मेळ्ळ्या.
आयतारा दनपारां सुमार 3 वरांचेर धाडिल्ल्या ईमेलांत विमानतळ इमारतींत बॉम्ब दवरतलें अशें सांगलें. संदेश धाडपी मनशान ग्रुपाचे नांव कोर्ट अशें दवरलें. भोपाळ विमानतळ वेवस्थापनान ही म्हायती पुलिसांक दिल्या.
भोपाळ सयत देशांतल्या 12 विमानतळांचेर बॉम्बस्फोट करपाची धमकी सीआयएसएफच्या अधिकृत ई-मेला वरवीं धाडल्या. विमानतळ इमारतींत स्फोटक उपकरणां लायिल्ल्याची म्हायती मेलांत दिल्या. कांय वरां उपरांत ताचो स्फोट जातलो. ह्या मेलाक धोको मानूं नाकात. बॉम्ब निकामी करात नाजाल्यार जायते निरपराधी लोक हांतूत मरतले अशें त्या ई- मेलांत बरयलां.
मजगतीं, 13 दिसां आदीं म्हळ्यार 29 एप्रीलाकय भोपाळ विमानतळ बॉम्ब घालून उडयतले अशी धमकी ईमेल वरवीं आयिल्ली. हाचे उपरांत राजभोज विमानतळाचे मुखेल सुरक्षा अधिकारी विशाल कुमार शर्मा हांणी गांधीनगर पुलीस स्टेशनाचेर कागाळ दाखल केली. तशेंच 8 सप्टेंबर 2022 दिसा इंडिगोच्या विमानाक राजा भोज विमानतळार बॉम्बस्फोटाची धमकी दिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
