भोजशाला कमाल मौला मशिद: पुरातत्त्व खात्याक मेळ्ळ्यो ९४ भग्न मुर्त्यो; हिंदू देवूळ आशिल्ल्याचो दावो

भांगरभूंय | प्रतिनिधी

इंदूर, खबरां संस्था: भारतीय पुरातत्व विभागान (ASI) सोमारा भोजशाला कमाल मौला मशिदी विशींचो सर्व्हेक्षण अहवाल मध्यप्रदेश उच्च न्यायालयाच्या इंदूर पिठा मुखार सादर केला. पुरातत्व खात्याचे वकील हिमांशू जोशी हांणी दोन हजार पानांचो हो अहवाल उच्च न्यायालयांत सादर केलो. जोशी हांणी सांगलें, हे विशींची फुडली सुनावणी २२ जुलयाक जातली.
४ जुलयाक उच्च न्यायालयान पुरातत्व खात्याक हे आदेश दिल्ले,भोजशाला मशिद प्रकरणांत वाद आसात. ह्या वाठारांत जो सर्वे तुमी केला ते विशीं अहवाल सादर करात. पुराय अहवाल १५ जुलय मेरेन सादर करचो. ही सुवात हिंदू धर्मस्थळ काय मुस्लीम धर्मस्थळ? हाचे वेल्यान वाद सुरू आसा. हे विशीं कोर्टान हे आदेश दिल्ले. आतां अहवालांत कांय गजाली मुखार आयल्यात.

वाद नेमको कितें?

हिंदू समुदाय भोजशालाक हिंदू धर्मान वाग्देवी म्हळ्यार देवी सरस्वतीचें देवूळ मानता.इकराव्या शेंकड्या सावन ह्या जाग्यार मशिदी आसा अशें मुसलमान पक्ष म्हणटात. भोजशाळाचो पुराय वाठार भारताच्या पुरातत्वीय सर्वेक्षणाच्या अधिकारक्षेत्रांत आसा. हिंदू फ्रंट फॉर जस्टिस नांवाचे संस्थेन अर्ज केल्ल्यान मध्य प्रदेश उच्च न्यायालयान ह्या प्रकरणांत सर्वेक्षण करपाचो आदेश दिल्लो. ते उपरांत २२ मार्चा सावन पुरातत्व खात्यान ह्या जाग्यार सर्वेक्षण सुरू केलें. जें कांय दिसां आदीं सोंपलें. आतां न्यायालयान पुरातत्व खात्याक १५ जुलयाक बेगोबेग ह्या विशयाचेर अहवाल दिवपाची मुजत दिल्ली. ते उपरांत हो अहवाल सादर केलो.
भोजशाला कमला मौला मशीद प्रकरणांत सादर केल्ल्या अहवाला विशीं वकील हरिशंकर जैन हांणी सांगलें, सर्वेक्षणाच्या वेळार ९४ मोडून पडिल्ल्यो मुर्ती मेळ्ळ्यात. ह्या जाग्यार फकत हिंदूक पुजा करूं येता अशेंय ताणें सांगलां. पुरातत्व खात्यान दिल्ल्या अहवाला वयल्यान स्पश्ट जाता की, ही भोजशाला कमला मौला मशिदी न्हय तर हिंदू देवूळ आशिल्ली. देखून ह्या जाग्यार फकत हिंदूंकच पुजा करपाचो अधिकार आसा. २००३ वर्सा पुरातत्व खात्यान हे सुवातेर नमाज दिवपाची परवानगी दिली. पूण ही गजाल चुकीची आसा. तशेंच ह्या सुवातेर आमकां ९४ परस चड मोडून पडिल्ल्यो मूर्ती मेळ्ळ्यात अशें जैन हांणी सांगलें.